Luka 18 - Le Nouveau Testament en Kikwango 1950

Kingana ya mfundisi ye fwola nsukami

¹ Yandi tubaka kingana kwa bau mpe, mpilamosi bau fwiti kulomba ntangu yonso ye lembwa ve. Luk. 11:5; Lom. 12:12; Ef. 6:18; Kolo. 4:2; 1 Tes. 5:17

² Yandi tubaka: Na mbanza mosi vandaka mfundisi ya vuminaka Nzambi ve, yandi konda kumona muntu nsoni.

³ Na mbanza yina vandaka fwola mpe. Yandi kwizaka kwa yandi, ye tubaka: Nungisa mono kwa mbeni ya mono.

⁴ Ntangu yina yandi zolaka ve; kansi kilumbu ya landa, yandi tubaka mu ntima ya yandi: Mono ikele kuvumina Nzambi ve, ye mono konda kumona muntu nsoni;

⁵ kansi sambu na fwola monisa mono mpasi, mono tanungisa yandi, sambu na kwiza ya yandi ya mbala na mbala tamonisa mono mpasi.

⁶ Mfumu tubaka: Kuwa mambu ya mfundisi ya konda lunungu, tubaka.

⁷ Kadi Nzambi tanungisa ve basolwa ya yandi ya ikele kubombidila yandi mwini ye mpimpa ? Yandi tavutala bau lusadusu nswalu ve ? Nzai. 6:10

⁸ Mono tuba kwa beno: Yandi tanungisa bau nswalu. Kansi bu Mwana ya muntu kwiza, yandi takuta lukwikilu awa va ntoto ? 1 Tim. 4:1; 2 Tim. 3:1

Kingana ya mufalisi ye mvakusi

⁹ Yandi tubaka kingana yai mpe kwa bantu yankaka ya ditula vuvu, na bau ikele balunungu, kansi bau ikele kusaula bankaka:

¹⁰ Bantu zole tombokaka ku tempelo kulomba, mosi ikele mufalisi, yankaka ikele mvakusi.

¹¹ Mufalisi telemaka ye lombaka yandi mosi mpiliyai: Nzambi, mono pesa nge matondo sambu na mono ikele ve bonso bantu yankaka, ya ikele bantani, bankwa konda lunungu, bankwa bizumba, ye mono ikele ve bonso mvakusi Nzai. 3:17

¹² Mono ikele kubuya madia mbala zole mu poso mosi, mono ikele kupesa mosi ya kumi ya bima yonso ya mono ikele kubaka.

¹³ Kansi mvakusi telemaka ntama, yandi zolaka ve kusendula meso ya yandi ku zulu, kansi yandi dibulaka va ntulu, kutuba: Nzambi, kuwila mono nkenda, mono nkwa masumu. Esala 9:6

¹⁴ Mono tuba kwa beno: Muntu yai kulumukaka ku nzo ya yandi ya nungiswa, kansi yina yankaka ve. Kadi konso muntu ya ditombola, takulumuswa; ye yandi ya dikulumusa, tatombolwa. Yobi 22:29; Bing. 29:23; Luk. 14:11; 1 Pet. 5:5

Yesu sakumuna bana

¹⁵ Bau twadilaka yandi bana fioti ya bau, na yandi tavalakana bau; kansi bu banlonguki monaka mpilayai, bau sembaka bau. Mat. 19:13; Mal. 10:13

¹⁶ Kansi Yesu bingaka bau, ye tubaka: Bika bana fioti kwiza kwa mono, kanikina bau ve, kadi kimfumu ya Nzambi ikele kwa bau ya mpilayai.

¹⁷ Kieleka, mono tuba kwa beno: Konsonani ya baka ve kimfumu ya Nzambi bonso mwana fioti, lenda ve kukota muna ta mbala mosi. Toko mvwama ikele kusosa moyo ya mvu ya mvu

¹⁸ Nkuluntu mosi yuvulaka yandi, kutuba: Nlongi mbote, nki mono tasala kubaka difwa ya moyo mvu ya mvu ? Mat. 19; 16; Mal. 10:17

¹⁹ Yesu tubaka kwa yandi: Sambu na nki nge binga mono mbote ? Mosi kaka ikele mbote, yandi ikele Nzambi.

²⁰ Nge zaba bansikudukusu: Sala bizumba ve, kufwa muntu ve, yiba ve, tuba kitemo ya luvunu ve, zitisa tata ya nge ye ngudi ya nge. 2 Mose 20:12; 5 Mose 5:16

²¹ Yandi tubaka: Yai yonso mono imene kukeba tuka kinleke ya mono.

²² Bu Yesu kuwaka mambu yai, yandi tubaka kwa yandi: Nge konda kima mosi ti ntangu yai; teka yonso ya ikele na nge ye kaba yo kwa bansukami, ye nge tabaka lundulu mu zulu; ye kwiza kulanda mono. Mat. 6:19; Luk. 12:33

²³ Bu yandi kuwaka yai, yandi vandaka na ntantu mingi, kadi yandi vandaka na kimvwama mingi.

²⁴ Bu Yesu monaka yandi, yandi tubaka: Mpasi mingi kwa bau ya ikele na kimvwama kukota mu kimfumu ya Nzambi. 1 Tim. 6:9

²⁵ Na mbizi yanene kamela kukota mu disu ya sindani ikele mpasi fioti, kansi nkwa kimvwama kukota mu kimfumu ya Nzambi luta mpasi.

²⁶ Bau ya kuwaka yo tubaka: Buna nani lenda kuvuluswa ?

²⁷ Yandi tubaka: Mambu ya konda kusalwa na bantu, lenda kusalwa na Nzambi. Yel. 32:17; Zak. 8:6; Luk. 1:37

Nsendo ya bantu ikele kulanda Yesu

²⁸ Petelo tubaka: Tala, beto imene kubika yonso ya beto, ye landaka nge. Mat. 19:27; Mal. 10:28; Luk. 5:11

²⁹ Yandi tubaka kwa bau: Kieleka mono tuba kwa beno: Kana muntu bika nzo keti nkento keti bampangi, keti tata, keti ngudi, keti bana sambu na kimfumu ya Nzambi,

³⁰ yandi tabaka mbala mingi mu ntangu yai ye mu ntangu ya kwiza moyo mvu ya mvu.

Yesu tuba kwa banlonguki diaka sambu na lutwa ye mfulukulu ya yandi

³¹ Yandi bakaka bau kumi ye zole ye tubaka kwa bau: Tala, beto takwenda ku Yelusalemi: Mambu yonso ya imene kusonama mu bambikudi sambu na Mwana ya muntu ta maniswa; Mat. 20:17; Mal. 10:32; Luk. 9:22; 17:31; 24:7, 26

³² kadi yandi tayekulwa kwa bapaien ye bau taseka yandi ye sadila yandi nsoni ye losila yandi mate; Luk. 23:1; Yoa. 18:28

³³ bau tabula yandi, ye takufwa yandi, ye kilumbu ya tatu yandi tafulukiswa.

³⁴ Bau zabaka ta mambu mosi ve mu mambu yai; mambu yai vandaka kuswekwa kwa bau, ye bau bakisa ve mambu ya yandi tubaka.

Yesu belula mpofo mu Yeliko

³⁵ Yo vandaka bu yandi kwizaka mfinama ku Yeliko, mpofo vandaka mfinama ku nzila kulomba. Mat. 20:29; Mal. 10:46

³⁶ Bu yandi kuwaka kibuka ikele kuluta, yandi yuvulaka: Nki mambu yai ?

³⁷ Bau tubaka kwa yandi, Yesu ya Nazaleti ikele kuluta.

³⁸ Yandi bokaka, kutuba: Yesu, nge mwana ya Davidi, kuwila mono nkenda.

³⁹ Bau ya vandaka nantwala sembaka yandi: Kuvanda napi. Kansi yandi lutaka kuboka mingi: Nge mwana ya Davidi, kuwila mono nkenda.

⁴⁰ Yesu telemaka ye tubaka kwa bantu kutwala yandi. Bu yandi kwizaka mfinama, yandi yuvulaka yandi:

⁴¹ Nki nge zola mono kusadila nge ? Yandi tubaka kwa yandi: Mfumu, mono zola kumona diaka.

⁴² Yesu tubaka kwa yandi: Mona diaka, lukwikilu ya nge imene kuvulusa nge. Luk. 17:19

⁴³ Nswalu yandi monaka diaka ye landaka yandi, ye kembilaka Nzambi, ye bu bantu yonso monaka yo, bau sikaka Nzambi.