Luka 17 - Le Nouveau Testament en Kikwango 1950

Yesu longa sambu na mvidisilu ya masumu

¹ Yandi tubaka kwa banlonguki ya yandi: Basakuba lenda kwiza; kansi ndola kwa yandi ya ikele kupesa yo! Mat. 18:6; Mal. 9:42

² Luta mbote kwa yandi kana ditadi ya nikuna fufu kangwa va laka ya yandi, ye yandi loswa mu mbu, kana yandi tesisa mosi ya fioti ya bayai sakuba.

³ Dikeba. Kana mpangi ya nge sala masumu kwa nge, semba yandi; kana yandi pindula mabanza, vidisila yandi yau. 5 Mose 19:17

⁴ Kana yandi sala masumu kwa nge mbala nsambwadi mu kilumbu mosi, kansi yandi pindula mbala nsambwadi kwa nge ye tuba: Mono imene kupindula mabanza, buna nge tavidisila yandi yo. Yesu tuba ngolo ya lukwikilu

⁵ Bantumwa tubaka kwa yandi; Mfumu, tula lukwikilu ya beto kwiza nene.

⁶ Mfumu tubaka: Kana beno ikele na lukwikilu bonso nkeni ya mutade, beno lenda kutuba kwa nti yai ya sikomole: Vuzuka na mianzi ye loswa mu mbu; yo talemvuka beno. Mal. 11:23

Kingana ya kisalu

⁷ Nani na beno ya ikele na mpika ya ikele kutima ntoto keti kukeba mameme, tatuba kwa yandi, bu yandi katuka na dilanga: Kwiza nswalu, vanda na meza ?

⁸ Kadi yandi tatuba kwa yandi ve: Yidika sambu na mono kudia, kanga luketo ye sadila mono, ti mono manisa kudia ye kunwa, buna nge takudia ye kunwa ?

⁹ Yandi tavutula matondo kwa mpika, sambu na yandi salaka yina ya yandi tubaka na yandi ?

¹⁰ Mpilamosi beno mpe, bu beno imene kusala mambu yonso ya tubwaka kwa beno, beno tuba: Beto ikele bampika ya konda mfunu; beto kusala kisalu ya beto fwiti kusala kaka.

Yandi belula bankwa bwazi kumi

¹¹ Yo vandaka, bu bau kwendaka ku Yelusalemi, yandi kibeni lutaka nakati ya Samalia ye Ngalili.

¹² Bu yandi kotaka mu bwala mosi, babakala kumi ya vandaka na bwazi kutanaka na yandi, ye telemaka ntama.

¹³ Bau bokaka mu ndinga ngolo kutuba: Yesu, Mfumu, kuwila beto nkenda.

¹⁴ Bu yandi monaka bau, yandi tubaka kwa bau: Beno kwenda kudisonga kwa banganga. Yo vandaka, bau kwendaka ye bau vediswaka. Luk. 5:14

¹⁵ Mosi kaka ya bau, bu yandi monaka, yandi imene kubeluka, vutukaka ye mu ndinga nene kembilaka Nzambi.

¹⁶ Yandi kubwaka va luse na makulu ya Yesu, ye vutulaka matondo kwa yandi. Yandi vandaka muSamalia.

¹⁷ Yesu vutulaka, kutuba: Kumi imene kubeluka ve ? Uvwa ikele wapi ?

¹⁸ Mosi monika ve kuvutuka kupesa mkembo kwa Nzambi, kansi nzenza yai kaka ?

¹⁹ Yandi tubaka kwa yandi: Telema, kwenda, lukwikilu ya nge imene kuvulusa nge.

Yesu tendula kiuvu ya bafalisi

²⁰ Bu yandi yuvulwa kwa bafalisi ntangu ya kimfumu ya Nzambi takwiza, yandi vutulaka kwa bau, kutuba: Kimfumu ya Nzambi ikele kwiza ve na kumonika.

²¹ Bau tatuba mpe ve: Tala, awa keti kuna, kadi tala, kimfumu ya Nzambi ikele nankati na beno.

Yandi tuba sambu na vutuka ya yandi ya zole

²² Yandi tubaka kwa banlonguki ya yandi: Bilumbu takwiza, bu beno tatula luzolo kumona kilumbu mosi kaka ya Mwana ya muntu, kansi beno tamona yo ve.

²³ Bau tatuba kwa beno: Tala kuna, tala awa; beno kwenda ve, ye landa ve. Mal. 13:21; Luk. 21:8

²⁴ Bonso nzazi ikele kukienzula tuka ndambu mosi na nsi ya zulu, ti na ndambu yankaka na nsi ya zulu, buna Mwana ya muntu tavanda mpilayai mu kilumbu ya yandi.

²⁵ Kansi ntete yandi fwiti kumona mpasi mingi ye kubuya na bantu ya mbandu yai. Luk. 9:22; 18:31; 24:7, 26

²⁶ Bonso yo vandaka mu bilumbu ya Noa, yo tavanda mpilayai mpe mu bilumbu ya Mwana ya muntu. Mat. 24:37; 1 Pet. 3:20

²⁷ Bau kudiaka, bau kunwaka, bau kwelaka, bau kwediswaka, ti na kilumbu ya Noa kotaka mu nzaza, ye nkuka ya masa kwizaka, ye kufwaka bau yonso. 1 Mose 6:2; 7:7

²⁸ Bonso yo vandaka mu bilumbu ya Loti; bau kudiaka, bau kunwaka, bau sumbaka, bau tekaka, bau kunaka, bau tungaka; 1 Mose 19:14

²⁹ kansi mu kilumbu yina ya Loti basikaka na Sodoma, tiya ye solofo nokaka tuka zulu ye kufwaka bau yonso. Yud. 7

³⁰ Buna yo tavanda mpilayai mu kilumbu ya Mwana ya muntu tazaikiswa.

³¹ Kilumbu yina yandi ya ikele va nludi ya nzo, ye bima ya yandi ikele mu nzo, yandi takulumuka ve kubaka yau; ye mpilamosi, yandi ya ikele mu dilanga tavutuka ve. Mal. 13:16

³² Beno bambuka nkento ya Loti.

³³ Konso muntu ya sosa kuvulusa moyo ya yandi, tavidisa yo, konso muntu ya vidisa yo, tavulusa yo. Luk. 9:24; Yoa. 12:25

³⁴ Mono tuba kwa beno: Mpilayina mu mpimpa yina babakala zole tavanda va fulu ya kulala, mosi tabakwa, yankaka tabikwa.

³⁵ Bankento zole tavanda kunika fufu sikamosi, mosi tabakwa, yankaka tabikwa. Mat. 24:41

³⁶ Babakala zole tavanda mu dilanga, mosi tabakwa, yankaka tabikwa.

³⁷ Bau vutulaka kutuba kwa yandi: Mfumu, wapi sika ? Yandi tubaka kwa bau: Sika ya ikele nitu ya kufwa, kuna ikele kutakana bambemba.