Luka 16 - Le Nouveau Testament en Kikwango 1950

Kingana ya nlundi ya konda kwikama

¹ Yandi tubaka mpe kwa banlonguki ya yandi: Muntu ya mvwama vandaka na nlundi ya bima ya yandi, bau fundaka nlundi sambu na yandi bebisaka bima ya yandi.

² Yandi bingaka yandi, ye tubaka kwa yandi: Nki yai ya mono imene kuwa sambu na nge ? Tanga ntalu ya kinlundi ya nge, kansi nge lenda ve vutuka kuvanda nlundi ya bima diaka.

³ Kansi nlundi tubaka mu ntima ya yandi: Nki mono tasala ? Kadi Mfumu ya mono takatula kinlundi ya mono. Mono ikele na ngolo ve kutima ntoto, ye kulomba ikele na mono nsoni.

⁴ Mono zaba ya mono tasala, bu mono katulwa na kinlundi, na bantu lenda kubaka mono mu banzo ya bau.

⁵ Buna yandi bingaka bantu ya mfuka ya mfumu, ye yandi yuvulaka bau mosi mosi, ye tubaka kwa yantete: Nge ikele na mfuka ikwa kwa mfumu ya mono ?

⁶ Yandi tubaka: Manzanza nkama mosi ya mafuta. Yandi tubaka kwa yandi: Baka nkanda ya nge ye vanda nswalu ye sonika makumi tanu.

⁷ Buna yandi tubaka kwa yankaka: Nge ikele na mfuka ikwa ? Yandi tubaka: Kitezo nkama mosi ya nkeni ya ble. Yandi tubaka kwa yandi: Baka nkanda ya nge ye sonika makumi nana.

⁸ Mfumu zitisaka nlundi ya konda lunungu, kadi yandi salaka na mayele. Kadi bana ya ntangu yai mu mbandu yai luta bana ya mwini mu mayele.

⁹ Mono tuba kwa beno mpe: Beno dibakila banduku mu kimvwama ya konda lunungu, sambu na kana yo kumana, bau tabaka beno mu banzo ya mvu ya mvu. Mat. 19:21; Luk. 18:22; 1 Tim. 6:17

¹⁰ Yandi ya ikele kwikama mu bima fioti, ikele kwikama mu bima mingi mpe; yandi ya konda lunungu mu bima fioti, ikele kukonda lunungu mu bima mingi mpe. Luk. 19:17

¹¹ Kana beno ikele kwikama ve mu kimvwama ya konda lunungu, buna nani takwikila kupesa beno kimvwama ya kieleka ?

¹² Kana beno ikele kukwikama ve mu bima ya muntu yankaka, buna nani tapesa beno yina ya beno ?

¹³ Sielo lenda ve kusadila bamfumu zole; kadi yandi takuwa mosi makasi ye zola yankaka; keti yandi tavanda na mosi ye lewula yankaka. Beto lenda ve kusadila Nzambi ye kimvwama.

Lunungu ya bafalisi bediswa

¹⁴ Bafalisi ya vandaka bantu ya zola mbongo kuwaka mambu yai yonso ye bau fingaka yandi.

¹⁵ Yandi tubaka kwa bau: Beno ikele bau ya dinungisa na luse ya bantu, kansi Nzambi zaba mintima ya beno; kadi mambu ya ikele na luzitu kwa bantu, ikele mbi na luse ya Nzambi. 1 Sam. 16:7; Nk. 7:9

¹⁶ Bansiku ye bambikudi vandaka ti na Yoane. Tuka ntangu yina nsamu mbote ya kimfumu ya Nzambi ikele kusamunwa, ye bantu yonso ikele kukota muna na ngolo.

¹⁷ Ikele mpasi ve na zulu ye ntoto kuvila, kansi kitini mosi ya kisoni mu nsiku lenda kuvila ve. Luk. 21:33

¹⁸ Konso muntu ya bika nkento ya yandi ye kwela yankaka, ikele kusala bizumba, ye konso muntu ya kwela nkento, ya bikwa na bakala ya yandi, ikele kusala bizumba mpe. Mat. 5:32; Mal. 10:11; 1 Kol. 7:10

Kingana ya muntu mvwama ye Lazalo

¹⁹ Yo vandaka, muntu mvwama vwataka mvwatu ya mpumbu ye lino kitoko, ye yangalalaka mu nkembo kilumbu na kilumbu.

²⁰ Muntu nsukami, nkumbu ya yandi Lazalo, ya fuluka na bamputa, tulwaka na mwelo ya yandi,

²¹ yandi tulaka luzolo kuyukuta na bitini ya kubwaka tuka mesa ya mvwana; bambwa mpe kwizaka kuvenda mputa ya yandi.

²² Yo vandaka, muntu nsukami kufwaka. Banjo nataka yandi ku ntulu ya Abalahami. Muntu mvwama kufwaka mpe, ye zikwaka.

²³ Mu nsi ya bafwa yandi sendulaka meso ya yandi mu mpasi, ye monaka Abalahami ntama mingi ye Lazalo mu ntulu ya yandi.

²⁴ Yandi bokaka ye tubaka: Tata Abalahami, kuwila mono nkenda ye fidisa Lazalo, na yandi lenda kutula nsongi ya musapi ya yandi mu masa ye lembika ludimi ya mono, kadi mono ikele kumona mpasi mingi mu tiya yai.

²⁵ Abalahami tubaka: Mwana, bambuka, mu luzingu ya nge, nge imene kubaka bima ya nge ya mbote, mpilayai Lazalo mpe bakaka bima mbi; kansi ntangu yai yandi ikele kuvundisa awa, kansi nge ikele kumona mpasi. Yes. 66:24; Mal. 9:44

²⁶ Kansi mambu yankaka mpe ikele; nakati ya beto ye beno ikele benga nene ya lenda kukatulwa ve, buna bau ya zola kwiza kwa beno tuka awa lenda ve, ye bau ya ikele kuna, lenda ve kwiza awa kwa beto.

²⁷ Kansi yandi tubaka: Tata, mono lomba nge, fidisa yandi ku nzo ya tata ya mono,

²⁸ kadi mono ikele na bampangi tanu, na yandi lenda kutuba kitemo kwa bau, na bau takwiza ve ku sika yai ya mpasi.

²⁹ Kansi Abalahami tubaka: Bau ikele na Mose ye bamikudi; bika bau kuwa bau.

³⁰ Yandi tubaka: Ve, tata Abalahami, kansi kana mosi katuka na nsi ya bafwa, ye kwenda kwa bau, bau tapindula mabanza.

³¹ Kansi yandi tubaka kwa yandi: Kana bau kuwa ve Mose ye bambikudi, bau takwikila ve kana mosi fulukiswa tuka bafwa.