Luka 14 - Le Nouveau Testament en Kikwango 1950

Yesu kudia mu nzo ya mufalisi

¹ Yo vandaka bu yandi kotaka mu nzo ya nkuluntu mosi ya bafalisi, mu kilumbu ya luvundu na kudia, bau langidilaka yandi.

² Tala, nantwala na yandi vandaka muntu ya maladi ya nitu ya kuvimba.

³ Yesu vutulaka, ye tubaka kwa bazabi ya nsiku ye bafalisi, kutuba: Nsiku pesa nzila kubelula mu kilumbu ya luvundu keti ve ? Luk. 13:14

⁴ Bau vandaka napi. Yandi bakaka yandi, ye belulaka yandi ye sindikaka yandi.

⁵ Yandi vutulaka ye tubaka kwa bau: Nani nakati na beno ya ikele na mpunda keti ngombe, kana yo kubwa mu dibulu, yandi tatombisa yo nswalu ve mu kilumbu ya luvundu ?

⁶ Bau lendaka ve kuvutudila yandi ndinga sambu na yo.

Yesu longa bau kusosa ve sika ye nzitusu

⁷ Yandi tubaka kingana kwa bau, ya bingwa, bu yandi monaka bonso bau disodilaka sika yantete; yandi tubaka kwa bau:

⁸ Bu nge bingwa na muntu ku fete ya makwela, vanda na sika yantete ve, kadi kana muntu ya luta nge luzitu tabingwa;

⁹ buna yandi ya bingaka beno zole, takwiza ye tuba kwa nge; Pesa sika kwa muntu yai, mu nsoni nge tayantika kubaka sika ya nsuka.

¹⁰ Kansi bu nge bingwa, kwenda kuvanda na sika ya nsuka, bu yandi ya bingaka nge kwiza, yandi tatuba kwa nge: Nduku, kwenda nantwala; buna nge tabaka nzitusu nantwala ya bau yonso ya vanda kwa nge na mesa.

¹¹ Kadi konso muntu ya ditombola, yandi takulumuswa, yandi ya dikulumusa yandi tatombulwa. Yobi 22:29; Bing. 29:23; Luk. 18:14; 1 Pet. 5:5

Yesu longa sambu na mfumu ya bingaka bantu ku fete

¹² Yandi tubaka mpe kwa yandi ya bingaka yandi: Bu nge yidika madia ya nsuka keti ya nkokila, binga ve banduku ya nge keti bampangi ya nge, keti bibutu ya nge, keti bamfinangani ya kimvwama, sambu na bau tabinga nge diaka, ye nge ikele kuvutudilwa yo.

¹³ Kansi bu nge sala fete, binga bansukami, babieta, ye batembidi, ye bampofo.

¹⁴ Kiese tavanda na nge, kadi bau ikele na kima ve kuvutudila nge; kadi nge tavutudilwa mu mfulukulu ya balunungu.

Yesu fwanikisa kimfumu ya Nzambi na fete yanene

¹⁵ Bu muntu mosi vandaka na bau na mesa; bu yandi kuwaka ndinga yai, yandi tuba kwa yandi: Kiese ikele na yandi ya kudia mu kimfumu ya Nzambi.

¹⁶ Yandi tubaka kwa yandi: Muntu yidikaka madia ya nkokila, ye yandi bingaka bantu mingi. Yes. 25:6

¹⁷ Yandi fidisaka mpika ya yandi mu lokula ya madia, kutuba kwa bau ya bingwaka: Beno kwiza, sambu na bima yonso imene kuyidikwa.

¹⁸ Bau yonso yantikaka kulomba, bika beto. Yantete tubaka kwa yandi: mono sumbaka dilanga, mono fwiti kwenda kutala yo. Mono yuvula nge bika mono kwenda.

¹⁹ Yankaka tubaka: Mono sumbaka bangombe kumi, mono kwenda kumeka yau. Mono yuvula nge bika mono kwenda.

²⁰ Yankaka tubaka: Mono imene kukwela nkento, sambu na yai mono lenda kwiza ve.

²¹ Mpika kwizaka kusonga kwa mfumu ya yandi mambu yai. Buna mfumu ya nzo vandaka na makasi, yandi tubaka kwa mpika ya yandi: Basika mu banzila ye balabala ya mbanza kotisa bansukami awa ye babieta ye bampofo ye batembidi.

²² Mpika tubaka: Mfumu, yo imene kusalwa mpilamosi nge tubaka, kansi sika ikele.

²³ Mfumu tubaka kwa mpika: Basika mu banzila yanene ye mu nseke ye kotisa bau mu nzo, na nzo ya mono lenda kufuluka;

²⁴ kadi mono tuba kwa beno, babakala yai ya mono bingaka, mosi tameka ve madia ya mono.

Kifu ya balandi

²⁵ Bibuka nene kwendaka na yandi, yandi pindukaka, tuba kwa bau:

²⁶ Kana muntu kwiza kwa mono, ye buya ve tata ya yandi ye ngudi ya yandi, ye nkento ya yandi, ye bana ya yandi ye bampangi ya yandi, ye bampangi bankento ya yandi, ye moyo ya yandi mpe, yandi lenda kuvanda nlonguki ya mono ve. Mat. 10:37

²⁷ Konsonani ya konda kunata kulunsi ya yandi ye landa nanima na mono yandi lenda kuvanda nlonguki ya mono ve. Mal. 8:34; Luk. 9:23

²⁸ Buna nani nakati na beno ya zola kutunga nzo ya yongi, tavanda ntete ve; ye yindula ntalu, kana yandi ikele ya lunga kumanisa yo ?

²⁹ Keti bu yandi imene kutula lufulu, ye lenda kumanisa yo ve, bau yonso ya mona yo tayantika kuseka yandi, kutuba:

³⁰ Muntu yai yantikaka kutunga, kansi yandi lenda kumanisa yo ve.

³¹ Keti nki ntinu ya zola kunwanisa ntinu yankaka mvita, tavanda ntete ve, ye yindula kana yandi lenda na basoldat mafunda kumi kukutana na yandi ya kwiza kwa yandi na basoldat mafunda makumi zole ?

³² Keti mpilayina ve, bu yandi ikele ntama yandi tafidisa ntumwa ye yuvula sambu na yenge.

³³ Mpilayai mpe konsonani ya beno ya bika ve yonso ya ikele na yandi, yandi lenda kuvanda nlonguki ya mono ve.

³⁴ Mungwa ikele mbote; kansi kana mungwa katulwa nzenzo, na nki yo tazenzulwa diaka ?

³⁵ Buna yo lunga ve va ntoto keti mu tuvi, kansi bantu losa yo. Yandi ya ikele na makutu ya kuwa, bika yandi kuwa.