Luka 13 - Le Nouveau Testament en Kikwango 1950

Yesu tula kingana ya nti ya figi

¹ Mu ntangu yina bankaka vandaka na sika yina, bau tubaka kwa yandi sambu na bantu ya Ngalili, Pilatu tulaka menga ya bau sikamosi na bankailu ya bau ya yokwa.

² Yandi vutulaka ye tubaka kwa bau: Beno banza bantu ya Ngalili yai, lutaka bantu ya Ngalili yonso na masumu, sambu na bau monaka mpasi yai ?

³ Mono tuba kwa beno: Ve, kansi kana beno pindula mabanza ve, beno yonso takufwa mpilamosi mpe.

⁴ Keti bayina kumi ye nana ya kubwilwaka nzo ya yongi mu Siloa ye kufwaka bau, beno banza, bau lutaka bantu yonso ya vandaka mu Yelusalemi na mbi ?

⁵ Mono tuba kwa beno. Ve, kansi kana beno pindula mabanza ve, beno yonso takufwa mpilamosi mpe.

⁶ Yandi tubaka kingana yai: Muntu vandaka na nti ya figi ya bau kunaka mu dilanga ya yandi ya vinia; yandi kwizaka kusosa mabundu va yo, kansi yandi monaka yau ve.

⁷ Buna yandi tubaka kwa musadi ya dilanga: Tala, mvu yai tatu mono kwizaka kusosa mabundu va nti ya figi, ye monaka yau ve. Zenga yo, sambu na nki yo ikele kubebisa ntoto yai ?

⁸ Yandi vutulaka kutuba kwa yandi: Mfumu, bika yo mvu yai mpe, ti mono timina ya na nsi ye tula yo tuvi.

⁹ Kana yo buta mabundu ve mu mvu ya kwiza, zenga yo.

Yesu belula nkento ya kimbevo

¹⁰ Yandi longaka mu nzo mosi ya sambilu, mu kilumbu ya luvundu.

¹¹ Tala, nkento ya vandaka na mpeve ya kimbevo mvu kumi ye nana; nitu ya yandi yinamaka, ye yandi lendaka ve sungama.

¹² Bu Yesu monaka yandi, yandi bingaka yandi ye tubaka kwa yandi: Nkento, nge ikele kukangulwa na kimbevo ya nge.

¹³ Yandi tulaka yandi maboko; ye nswalu yandi sungamaka ye kembilaka Nzambi.

¹⁴ Kansi nkuluntu ya nzo ya sambilu vandaka na makasi, sambu na Yesu belulaka yandi mu kilumbu ya luvundu, yandi vutulaka ye tubaka kwa bantu: Bilumbu sambanu ikele ya muntu fwiti kusala; mpilayina beno kwiza kubelulwa mu yau, mu kilumbu ya luvundu ve. 2 Mose 20:9; Yoa. 7:23; Luk. 6:7

¹⁵ Mfumu vutulaka kwa yandi, ye tubaka: Beno bantu ya luvunu, bankaka ya beno ikele kukangula ve ngombe ya yandi keti mpunda ya yandi tuka edilu ye twala bau ve ku masa mu kilumbu ya luvundu ?

¹⁶ Kansi nkento yai ikele mwana ya Abalahami, ya Satana kangaka, tala, na mvu kumi ye nana yai, yo lunga ve yandi kangulwa na luvambu yai mu kilumbu ya luvundu ?

¹⁷ Bu yandi tubaka mambu yai, bambeni ya yandi yonso kuwaka nsoni ye kibuka yonso vandaka na kiese sambu na mambu yonso ya nkembo ya yandi salaka.

Yesu fwanikisa kimfumu ya Nzambi na nkeni ya mutade

¹⁸ Yandi tubaka: Kimfumu ya Nzambi ikele mpilamosi nki ? Mu nki mono tafwanikisa yo ?

¹⁹ Yo ikele mpilamosi nkeni ya mutade ya muntu bakaka, ye losaka yo mu dilanga ya yandi; yo kulaka, ye kwizaka nti ye bandeke ya zulu kwizaka kuvundisa mu mavala ya yo. Mat. 13:31; Mal. 4:31

Kingana ya lufunusu

²⁰ Yandi tubaka diaka: Mu nki mono tafwanikisa kimfumu ya Nzambi ? Mat. 13:38

²¹ Yo ikele mpilamosi lufunusu ya nkento bakaka, ye swekaka yo mu kitezo tatu ya fufu ti yonso funuswa.

Yesu longa bantu mu nzila ya Yelusalemi

²² Yandi kwendaka kuluta mu mbanza ku mbanza ye mu bwala ku bwala, ye longaka, bu yandi kwenda ku Yelusalemi.

²³ Muntu tubaka kwa yandi: Mfumu, bau ya vuluswa ikele ndambu ? Yandi tubaka kwa bau:

²⁴ Beno nwana kukota mu mwelo ya fioti; kadi mono tuba kwa beno: Mingi tasosa kukota, kansi bau talenda ve.

²⁵ Bu mfumu ya nzo imene kutelema ye kukanga mwelo, ye beno yantika kutelema nanganda ye kunkuta na mwelo, kutuba: Mfumu, kangudila beto, yandi tavutula ye tuba kwa beno: Mono zaba ve sika ya beno katuka.

²⁶ Buna beno tayantika kutuba: Beto kudiaka ye kunwaka nantwala ya nge, nge longaka mu balabala ya beto.

²⁷ Kansi yandi tatuba: Mono tuba kwa beno, mono zaba ve sika ya beno katuka. Katuka na mono, beno yonso ya ikele basadi ya konda lunungu. Mat. 7:22

²⁸ Kuna tavanda kudila ye nkweteso ya meno, bu beno mona Abalahami ye Isaki ye Yakobi ye bambikudi yonso mu kimfumu ya Nzambi, kansi beno kibeni loswa nanganda. Mat. 8:11

²⁹ Bau takatuka na ndambu ya este ye weste ye node ye sude, ye tavanda na mesa mu kimfumu ya Nzambi.

³⁰ Tala, nanima takwiza nantwala, ye ya ntwala takwiza nanima. Mat. 19:30; 20:16

Yesu luengisa bantu sambu na Elode

³¹ Na lokula yina bafalisi yankaka kwizaka, kutuba kwa yandi: Basika, katuka awa, kadi Elode zola kufwa nge.

³² Yandi tubaka kwa bau: Beno kwenda kutuba kwa bulu yina: Tala, mono ikele kubasisa mpeve mbi ye belula kilumbu yai ye mbazi, ye kilumbu ya tatu mono talungisa.

³³ Kansi kilumbu yai ye mbazi ye kilumbu ya landa mono fwiti kwenda kaka, na yo lenda kuvanda ve na mbikudi kufwa nanganda ya Yelusalemi.

Ndola ya Yelusalemi

³⁴ O, Yelusalemi, Yelusalemi, ya kufwa bambikudi ye losa bau matadi ya fidiswaka kwa yandi; mbala mingi mono zolaka kutikisa bana ya nge bonso nsusu ikele kutikisa bana ya yandi na nsi ya maveve ya yandi, kansi beno zolaka ve. Yes. 31:5; 65:2; Yel. 7:13; Mat. 23:37

³⁵ Tala, nzo ya beno bika mpamba. Ye mono tuba kwa beno: Beno tamona mono ve, ti beno tatuba: Nkwa lusakumunu ikele yandi ya kwiza mu nkumbu ya Mfumu. Yes. 1:7; Mika 3:12; Nk. 118:26; Luk. 19:38