Luka 1 - Le Nouveau Testament en Kikwango 1950

Luyantiku

¹ Bantu mingi imene kumeka kusonika nsamu, ya mambu ya imene kumaniswa nakati na beto,

² mpilamosi bau pesaka yo kwa beto, bau ya vandaka bantemo ya monaka, ye basielo ya mambu tuka luyantiku.

³ Sambu na yai mono mpe, bu mono imene kulanda mambu yonso tuka luyantiku, mono banzaka ikele mbote kusonika kwa nge, Teofilo ya luta mbote, mambu mpilamosi yo landana, Bis. 1:1

⁴ na nge lenda kuzaba kieleka mambu yina ya nge longwaka.

Lubutuku ya Yoane mbotiki samunwa

⁵ Mu bilumbu ya Elode, ntinu ya Yuda, nganga vandaka, nkumbu ya yandi Zakalia, mu kabu ya Abia, nkento ya yandi ikele muntu ya kikanda ya Alona, nkumbu ya yandi Elisabeti. 1 Lus. 24:10, 19

⁶ Bau zole vandaka balunungu nantwala ya Nzambi, bau tambulaka mu nsikudukusu yonso ye ndinga ya Mfumu, bau konda kusembwa.

⁷ Bau vandaka ve na mwana, sambu na Elisabeti vandaka sita; bau zole nunaka mu mvu ya bau.

⁸ Ye yo vandaka, bu yandi vandaka kusala kisalu ya kinganga nantwala ya Nzambi mu lulandu ya kabu ya yandi,

⁹ bonso ikele kifu ya kisalu ya kinganga, kisalu ya yandi vandaka kukota mu tempelo ya Mfumu ye kukwika bima ya mfwitila mwisi. 2 Mose 30:7; Eb. 9:6

¹⁰ Kibuka yonso ya bantu vandaka kulomba nanganda mu lokula ya mfwitila mwisi. 3 Mose 16:17

¹¹ Ye kuna monikaka kwa yandi wanjo ya Mfumu, yandi telemaka na diboko kibakala ya zikwa ya mfwitila mwisi.

¹² Ye bu Zakalia monaka yandi, yandi titaka; boma simbaka yandi.

¹³ Kansi wanjo tubaka kwa yandi: Zakalia, vanda na boma ve, kadi lombilu ya nge imene kuwakana ye nkento ya nge Elisabeti tabutila nge mwana bakala, nge tabinga nkumbu ya yandi Yoane.

¹⁴ Ye nge tayangalala ye vanda na kiese, ye bantu mingi tayangalala sambu na lubutuku ya yandi,

¹⁵ kadi yandi tavanda yanene nantwala ya Mfumu, yandi takunwa vinia ve keti bima ya ngolo, kansi yandi tafuluka na Mpeve Yanlongo, tuka ntangu ya yandi tabutukwa. 4 Mose 6:3; Mfund. 13:4; Yel. 1:5

¹⁶ Yandi tapindula bana mingi ya Isaeli kwa Mfumu, Nzambi ya bau. Yes. 25:6

¹⁷ Yandi kibeni taluta nantwala ya luse ya yandi mu mpeve ye ngolo ya Elia, kupindudisa mintima ya batata kwa bana; ye bakolami kwa ngangu ya balunungu, kuyidikila Mfumu bantu ya yidikwa. Malaki 4:5; Mal. 9:12

¹⁸ Zakalia tubaka kwa wanjo: Mpila nki mono tazaba yai, sambu na mono imene kununa, ye nkento ya mono mpe imene kununa mvu mingi ? 1 Mose 17:17

¹⁹ Wanjo vutulaka kutuba kwa yandi: Mono ikele Ngabileli ya telema nantwala ya Nzambi; mono fidiswa kutuba kwa nge ye samuna kwa nge nsamu yai ya mbote.

²⁰ Tala, nge tavanda baba ye talenda kutuba ve, ti na lumbu yina ya mambu yai tamaniswa, sambu na nge kwikila ve ndinga ya mono, yau tamaniswa mu ntangu ya yau.

²¹ Bantu vingilaka Zakalia ye bau yitukaka, sambu na yandi vandaka ntama mu tempelo,

²² Kansi bu yandi basikaka, yandi lendaka kutuba kwa bau ve; bau zabaka, yandi imene kumona mona-meso mu tempelo, sambu na yandi bikaka ve kulabisa bau ye vandaka baba.

²³ Yo vandaka bu bilumbu ya kisalu ya yandi lungaka, yandi kwendaka ku nzo ya yandi.

²⁴ Bu bilumbu yina lutaka, buna Elisabeti, nkento ya yandi yimitaka, yandi diswekaka ngonda tanu, kutuba:

²⁵ Mfumu imene kusadila mono mpilayai, mu bilumbu yina ya yandi tala mono sambu na katula nsoni ya mono nakati na bantu. 1 Mose 30:23

Lubutuku ya Yesu samunwa

²⁶ Mu ngonda ya sambanu wanjo Ngalileli fidiswaka tuka Nzambi ku mbanza ya Ngalili, nkumbu ya mbanza Nazaleti,

²⁷ kwa nkento ya zaba bakala ve, ya silwa kwa bakala, nkumbu ya yandi Yosefi, ya nzo ya Davidi, nkumbu ya nkento ya zaba bakala ve, ikele Malia. Mat. 1:18

²⁸ Wanjo kwizaka kwa yandi, ye tubaka: Vanda na kiese nakati ya bankento, nge imene kumona nlemvo mingi, Mfumu ikele na nge.

²⁹ Kansi yandi titaka mingi sambu na mambu yina, yandi yindulaka, pesa ya mbote yai ikele mutindu nki ?

³⁰ Wanjo tubaka kwa yandi: Malia, vanda na boma ve, sambu na nge imene kumona nlemvo na Nzambi.

³¹ Tala, nge tayimita mu divumu ye buta mwana bakala, nge tabinga nkumbu ya yandi YESU. Yes. 7:14; Mat. 1:21; Luk. 2:21

³² Yandi tavanda ya nene ye tabingwa Mwana ya Nzambi Mpungu ye Mfumu Nzambi tapesa yandi kiti ya nkembo ya tata ya yandi Davidi.

³³ Yandi tavanda ntinu ya nzo ya Yakobi mvu ya mvu, kimfumu ya yandi ikele na nsuka ve. 1 Lus. 17:14; Nk. 45:6; 89:25; Yel. 23:5; Dan. 2:44; Mika 4:7

³⁴ Malia tubaka kwa wanjo: Mpila nki yo tavanda, sambu na mono kuzaba bakala ve ?

³⁵ Wanjo vutulaka ye tubaka kwa yandi: Mpeve Yanlongo takwiza va nge ye ngolo ya Nzambi Mpungu tafika nge, mpilayai yandi ya nlongo ya nge tabuta, tabingwa Mwana ya Nzambi.

³⁶ Tala Elisabeti, kibutu ya nge, yandi mpe imene kuyimita mwana bakala mu ndununu ya yandi, yai ikele ngonda ya sambanu na yandi ya bingwa sita.

³⁷ Kansi kwa Nzambi kima ikele ve, ya konda kusalwa. Yel. 32:17; Mat. 19:26

³⁸ Kansi Malia tubaka: Tala, mpika nkento ya Mfumu. Bika yo vanda kwa mono bonso mu mambu ya nge. Ye wanjo katukaka na yandi.

Malia kwenda kutala Elisabeti

³⁹ Malia telemaka mu bilumbu yina ye kwendaka nswalu ku ntoto ya bamongo mu mbanza ya Yuda;

⁴⁰ yandi kotaka mu nzo ya Zakalia ye pesaka Elisabei mbote.

⁴¹ Yo vandaka bu Elisabeti kuwa kupesa ya mbote ya Malia, mwana tambulaka mu divumu ya yandi, ye Elisabeti fulukaka na Mpeve Yanlongo,

⁴² yandi bokaka mu ndinga yanene ye tubaka: Nge sakumunwa nakati ya bankento ye mbutu ya kivumu ya nge ikele kusakumunwa.

⁴³ Yai ikele mpila nki, na ngudi ya Mfumu ya mono imene kwiza kwa mono ?

⁴⁴ Kadi tala, bu ndinga ya nge ya pesa mbote kotaka mu makutu ya mono, mwana tambulaka mu divumu ya mono na kiese.

⁴⁵ Kiese ikele na yandi ya imene kukwikila, kadi mambu yonso ya Mfumu tubaka kwa yandi tamaniswa.

⁴⁶ Malia tubaka: Mwela ya mono ikele kuzitisa Mfumu,

⁴⁷ mpeve ya mono ikele kuyangalala mu Nzambi, Mvulusi ya mono;

⁴⁸ kadi yandi monaka dikulumusa ya mpika nkento ya yandi, kadi tala, tuka ntangu yai mbandu yonso tabinga mono nkwa kiese. 1 Sam. 1:11; 1 Mose 30:13

⁴⁹ Kadi Nkwa Ngolo imene kusadila mono mambu yanene, nkumbu ya yandi ikele yanlongo.

⁵⁰ Nkenda ya yandi ikele kwa bambandu na bambandu va bau ya vumina yandi. 2 Mose 20:6; Nk. 103:17

⁵¹ Yandi songaka ngolo na diboko ya yandi; yandi mwangisaka bankwa lulendo mu mabanza ya ntima ya bau. Nk. 33:10; Yes. 51:9; 52:10; 1 Pet. 5:5

⁵² Yandi imene kulumusa bankwa ngolo na bakiti ya bau; ye tombola bau ya dikulumusa. 1 Sam. 2:7; Yobi 5:11; Nk. 113:6

⁵³ Yandi yukutisaka bau ya vandaka nzala na bima ya mbote; bamvwama yandi sindikaka bau maboko mpamba. 1 Sam. 2:5

⁵⁴ Yandi imene kusadila sielo ya yandi Isaeli, na yandi lenda kubambuka nkenda ya yandi, Yes. 41:8; Yel. 31:3, 20

⁵⁵ mpilamosi yandi tubaka kwa batata ya beto, kwa Abalahami ye kwa nkuna ya yandi mvu ya mvu. 1 Mose 17:19

⁵⁶ Ye Malia vandaka na yandi kiteso ya ngonda tatu, ye vutuka ku nzo ya yandi.

Lubutuku ya Yoane mbotiki

⁵⁷ Bu ntangu ya Elisabeti ya bu: ta kulungaka; yandi butaka mwana bakala.

⁵⁸ Bamfinangani ya yandi ye babutu ya yandi kuwaka, Mfumu imene kusonga nkenda ya yandi yanene kwa yandi; bau yangalalaka na yandi.

⁵⁹ Yo vandaka mu kilumbu ya nana, bau kwizaka kuzenga mwana, bau bingaka yandi Zakalia, nkumbu ya tata ya yandi, 1 Mose 17:12

⁶⁰ Kansi ngudi ya yandi vutulaka ye tubaka: Yai ve, kansi yandi tabingwa Yoane.

⁶¹ Bau tubaka kwa yandi: Mu kibutu ya nge ikele muntu ve ya bingwa nkumbu yai.

⁶² Kansi bau labisaka tata ya yandi, nki nkumbu yandi zola kubinga mwana.

⁶³ Yandi lombaka dibaya ya sonika, ye sonikaka, ye tubaka: Nkumbu ya yandi ikele Yoane. Ye bau yonso yitukaka.

⁶⁴ Nswalu munoko ya yandi ye ludimi ya yandi kangukaka, ye yandi tubaka, ye sakumunaka Nzambi.

⁶⁵ Ye boma kubwilaka bamfinanangani ya bau yonso, ye mambu yai yonso mwanganaka mu ntoto yonso ya bamongo ya Yuda.

⁶⁶ Bau yonso ya kuwaka yau lundaka yau mu mintima ya bau, kutuba: Mpila nki mwana yai tavanda ? Kadi diboko ya Mfumu vandaka na yandi.

⁶⁷ Tata ya yandi Zakalia fulukaka na Mpeve Yanlongo, yandi bikulaka, kutuba:

⁶⁸ Mfumu Nzambi ya Isaeli, ikele Nkwa Lusakumunu, kadi yandi kwiza kutala bantu ya yandi ye sadila bau nkudulu; Luk. 2:30

⁶⁹ yandi nangulaka mpoka ya mpulusu kwa beto mu nzo ya sielo ya yandi Davidi, Nk. 132:17

⁷⁰ —bonso yandi tubaka mu munoko ya bambikudi ya yandi ya nlongo tuka luyantiku ya ntangu— Yel. 25:5

⁷¹ sambu na kuvulusa beto na bambeni ya beto, ye na maboko ya bau yonso ya ikele na beto makasi,

⁷² ye kusongaka nkenda kwa batata ya beto ye kubambuka luwawanu ya yandi ya nlongo, Yel. 31:31; 1 Mose 22:16; Nk. 105:8

⁷³ ikele ndefi ya yandi kudiaka kwa tata ya beto Abalahami,

⁷⁴ kupesa kwa beto, na beto lenda kuvuluswaka na maboko ya bambeni ya beto, na beto tasadila yandi na kutita ve,

⁷⁵ mu nlongo ye mu lunungu nantwala ya yandi mu bilumbu ya beto yonso. 1 Pet. 1:15

⁷⁶ Kansi nge, mwana, tabingwa mbikudi ya Nzambi Mpungu, kadi nge takwenda nantwala ya luse ya Mfumu, kuyidikila nzila ya yandi, Malaki 3:1

⁷⁷ ye kupesa ngangu ya mpulusu kwa bantu ya yandi, mu mvidisilu ya masumu ya bau, Luk. 3:3

⁷⁸ sambu na ntima ya nkenda ya Nzambi ya beto; buna ntangu tuka zulu imene kwiza kutala beto,

⁷⁹ kukienzudila bau ya ikele kuvanda mu mpimpa ye mu kini ya lufwa, ye kusonga makulu ya beto mu nzila ya yenge. Yes. 9:2; 42:7; 60:1

⁸⁰ Ye mwana kulaka ye kwizaka ngolo mu mpeve ye vandaka mu nsi ya mpamba ti na kilumbu ya songwa kwa Isaeli. Luk. 2:40