Loma 8 - Le Nouveau Testament en Kikwango 1950

Mbedoso ikele ve kwa bau ya ikele mu Klisto

¹ Buna ntangu yai mbedoso ikele ve kwa bau ya ikele mu Klisto Yesu.

² Kadi nsiku ya Mpeve ya moyo mu Klisto Yesu, kangulaka mono tuka nsiku ya masumu ye ya lufwa.

³ Kadi yina ya nsiku lenda ve kusala sambu na yo ikele lebakana mu nsuni, Nzambi salaka yo bu yandi fidisaka Mwana ya yandi mu kifwani ya nsuni ya masumu, ye sambu na masumu, yandi bedisaka masumu mu nsuni, Fili. 2:7

⁴ na mambu ya nsiku lenda kulunga mu beto, ya tambula ve mu kinsuni kansi mpu Mpeve. Kolo. 1:22

⁵ Kadi bau ya ikele mu kinsuni ikele na mabanza ya mambu ya nsuni, kansi bau ya ikele mu Mpeve ikele na mabanza ya mambu ya Mpeve.

⁶ Kadi mabanza ya nsuni ikele lufwa, kansi mabanza ya Mpeve ikele moyo ye yenge,

⁷ sambu na mabanza ya nsuni ikele kimbeni kwa Nzambi, kadi yo ikele kulemvuka nsiku ya Nzambi ve, mpe yo lenda kusala mpila yai ve.

⁸ Bau ya ikele mu nsuni lenda kuyangidisa Nzambi ve.

⁹ Kansi beno ikele mu nsuni ve, kansi mu Mpeve, kana yo ikele na Mpeve ya Nzambi ikele kuvanda mu beno. Kansi kana muntu konda Mpeve ya Klisto, yandi ikele ya yandi ve. Ngal. 4:6

¹⁰ Kana Klisto ikele mu beno, nitu ikele kufwa sambu na masumu, kansi mpeve ikele na moyo sambu na lunungu.

¹¹ Kansi kana Mpeve ya yandi ya fulukisaka Yesu tuka bafwa ikele kuvanda mu beno, buna yandi ya fulukisaka Klisto tuka bafwa tapesa moyo mpe kwa banitu ya beno ya lufwa, sambu na Mpeve ya yandi ikele kuvanda mu beno. 1 Kol. 6:14; 2 Kol. 4:14

Beto pukumunwa kwa nsuni ve

¹² Buna, bampangi, beto ikele bantu ya mfuka kwa nsuni ve na beto tambula mu kinsuni. Lom. 6:18

¹³ Kadi kana beno tambula mu kinsuni, beno fwiti kufwa, kansi kana beno kufwa bifu ya nitu mu Mpeve, beno tavanda na moyo. Kolo. 3:5

¹⁴ Kadi bau yonso ya twadiswa mu Mpeve ya Nzambi, bau ikele bana ya Nzambi.

¹⁵ Kadi beno bakaka ve mpeve ya kimpika na kuvanda na boma diaka, kansi beno bakaka Mpeve ya kimwana, ya beto ikele kuboka: Aba, Tata! 2 Tim. 1:7

¹⁶ Mpeve kibeni tuba kitemo sikamosi na mpeve ya beto na beto ikele bana ya Nzambi. 2 Kol. 1:22; 5:5; Ef. 1:13; 4:30

¹⁷ Kana beto ikele bana, buna beto ikele bamvingidi ya difwa mpe, bamvingidi ya difwa ya Nzambi, ye bamvingidi ya difwa sikamosi na Klisto; kana yo ikele na beto mona mpasi sikamosi na yandi, beto lenda kukembiswa sikamosi na yandi mpe. Bis. 14:22; Ngal. 4:7

Bima yonso ya Nzambi salaka takembiswa diaka

¹⁸ Kadi mono banza na mpasi ya ntangu yai lunga ve kuteza na nkembo ya tazaikiswa kwa beto. Mat. 5:11; 2 Kol. 4:17; 1 Pet. 1:6; 4:13

¹⁹ Kadi nsemono ikele kuvingila na vuvu mingi nzaikusu ya bana ya Nzambi.

²⁰ Kadi nsemono lemvukwa lulendo kansi na luzolo ya yo mosi ve, kansi mu mambu ya yandi ya lemvukaka yo mu vuvu,

²¹ na nsemono, yo kibeni tavuluswa tuka kimpika ya mbivisu ye takwiza ku kimpwanza ya nkembo ya bana ya Nzambi.

²² Kadi beto zaba nsemono yamvimba ikele kuvumuka ye kumona nsongo sikamosi ti ntangu yai.

Mpukumuni ya bana ya Nzambi

²³ Kaka yai ve, kansi beto kibeni mpe, ya ikele na mabundu ya ntete ya Mpeve, beto mpe ikele kuvumuka mu beto kibeni, bu beto ikele kuvingila kimwana, yo ikele nkudulu ya nitu ya beto.

²⁴ Kadi mu vuvu beto vuluswaka, kansi vuvu ya ikele kumonika ikele vuvu ve, kadi nani tatula vuvu na yina ya yandi ikele kumona ? Eb. 11:1

²⁵ Kansi kana beto tula vuvu na yina ya beto mona ve, buna beto ikele kuvingila yo mu mvibudulu.

²⁶ Mpilayai mpe, Mpeve sadisa lebakana ya beto, kadi beto zaba kulomba ve bonso beto fwiti kulomba, kansi Mpeve, yandi kibeni ikele kutubila beto mu mvumukunu ya lenda kutuba ve.

²⁷ Kansi yandi ya yunsa mintima zaba mabanza ya Mpeve, sambu na yandi ikele kutubila banlongo, bonso luzolo ya Nzambi. 1 Lus. 28:9

Kusola ya Nzambi

²⁸ Beto zaba, kwa bau ya zola Nzambi mambu yonso sala sikamosi ku mbote, yo ikele kwa bau ya bingwa bonso lukanu ya yandi.

²⁹ Kadi bau ya yandi zabaka ntete, yandi mpe solaka bau na kuvanda kifwani ya Mwana ya yandi, na yandi lenda kuvanda mwana ya ntete nakati bampangi mingi.

³⁰ Bau ya yandi solaka ntete, yandi bingaka bau mpe; ye bau ya yandi bingaka, yandi nungisaka bau mpe, ye bau ya yandi nungisaka, yandi kembisaka bau mpe.

Kima ikele ve ya lenda kukabisa nkwa lukwikilu tuka zola ya Klisto

³¹ Buna beto tatuba nki sambu na mambu yai ? Kana Nzambi ikele na beto, nani lenda kuvanda na beto kimbeni. Nk. 56:11; 118:6

³² Yandi ya buyaka ve Mwana mosi ya yandi, kansi pesaka yandi sambu na beto yonso, yandi lenda ve mu yandi kupesa beto mpe bima yonso ya matabisi ? Yoa. 3:16; Lom. 4:25; 5:6, 9

³³ Nani tafunda basolwa ya Nzambi ? Nzambi ikele kunungisa. Yes. 50:8; Lom. 3:26

³⁴ Nani ikele kubedisa ? Yo ikele Klisto Yesu, ya kufwaka ye fulukiswaka tuka bafwa mpe, yandi ikele na diboko ya kibakala ya Nzambi, ye ikele kutubila beto ? Eb. 1:3; 7:25; 1 Pet. 3:22

³⁵ Nani takaba beto tuka zola kwa Klisto ? Mpasi, keti ntantu, keti nzomono, keti nzala, keti kinkonga, keti mambu ya boma, keti mbele ya mvita ?

³⁶ Bonso yo ikele kusonama; Sambu na nge beto ikele kufwa lumbu yamvimba, beto ikele kutangwa bonso mameme ya ikele sambu na kufwa. 2 Kol. 4:11

³⁷ Mu mambu yai yonso, beto luta kununga mu yandi ya zolaka beto. 1 Kol. 15:57; 2 Kol. 2:14

³⁸ Kadi mono kwikidiswa na lufwa, keti moyo, keti banjo, keti bakimfumu, keti bima ya ikele, keti bima ya takwiza, keti ngolo,

³⁹ keti ya zulu, keti mudindu, keti konso nsemono lenda kukabisa beto ve tuka zola ya Nzambi, ya ikele mu Klisto Yesu, Mfumu ya beto.