Loma 7 - Le Nouveau Testament en Kikwango 1950

Bau ya kwikila Nzambi imene kukanguka tuka nsiku

¹ Bampangi, beno zaba ve, kadi mono tuba kwa bazabi ya nsiku, na nsiku ikele kuyala muntu ntangu yonso ya yandi ikele na moyo.

² Kadi nkento ya ikele na bakala ikele kukangwa na bakala mu nsiku bu yandi ikele na moyo, kansi kana bakala kufwa, yandi imene kukangulwa tuka nsiku ya bakala. 1 Kol. 7:39

³ Buna kana yandi bundana na bakala yankaka, bu bakala ya yandi ikele na moyo, yandi tabingwa nkwa bizumba; kansi kana bakala imene kufwa, yandi kangulwa tuka nsiku, buna yandi ikele nkwa bizumba ve kana yandi kwela na bakala yankaka. Mat. 5:32; 19:9; Mal. 10:11; Luk. 16:18

⁴ Sambu na yai, bampangi ya mono, beno imene kufwa ku nsiku mu nitu ya Klisto, na beno lenda kubundana na yankaka, na yandi ya fulukiswaka na bafwa, na beto lenda kubuta mabundu kwa Nzambi. Lom. 8:2; Ngal. 2:19; 5:18, 22

⁵ Kadi bu beto vandaka mu nsuni, lutondo ya masumu ya monikaka mu nsiku, salaka mu biela ya beto kubuta mabundu ku lufwa. Lom. 6:20

⁶ Kansi ntangu yai beto imene kukangulwa tuka nsiku, beto imene kufwa ku yina ya kangaka beto, buna beto ikele kuvanda bampika mu mambu yampa ya Mpeve, ye mu mambu ya nkulu ya bisono ve. 2 Kol. 3:6

Bonso ya bau ikele mu nsiku

⁷ Buna beto tatuba nki ? Nsiku ikele masumu ? Mpilayai ve! Kansi kana nsiku ikele ve, mono imene kuzaba masumu ve, kadi mono lendaka kuzaba zola ya bima ya muntu ve, kana nsiku imene kutuba ve: Vanda na zola ya bima ya mpangi ya nge ve. 2 Mose 20:17; Lom. 3:20

⁸ Kansi masumu bakaka nzila mu nsikudukusu kusala mu mono mutindu yonso ya zola ya bima ya muntu, kadi konda nsiku, masumu ikele kufwa. Yoa. 15:22; Lom. 4:15; 5:13, 20

⁹ Ntete mono vandaka na moyo mu konda ya nsiku, kansi bu nsikudukusu kwizaka masumu bakaka moyo ye mono kufwaka.

¹⁰ Mono monaka nsikudukusu ya ikele ku moyo vandaka ku lufwa.

¹¹ Kadi masumu bakaka nzila mu nsikudukusu ye kusaka mono ye kufwaka mono mu yo.

¹² Buna nsiku ikele ya nlongo ye nsikudukusu ikele ya nlongo ye ya lunungu ye ya mbote. 1 Tim. 1:8

Nsuni ikele kunwanisaka mabanza yampa

¹³ Buna yina ya ikele mbote kitukaka lufwa kwa mono ? Mpilayai ve! Kansi masumu, na yo lenda kumonika na yo ikele masumu, salaka lufwa kwa mono mu yina ya mbote, buna mu nsikudukusu masumu lenda kumonika mbi ya luta.

¹⁴ Kadi beto zaba nsiku ikele ya kimpeve, kansi mono ikele ya kinsuni, mono tekwa nansi masumu. Nk. 51:5

¹⁵ Kadi yina ya mono sala, mono zaba ve, kadi yina ya mono zola, mono sala yo ve, kansi yina ya mono zola ve, mono sala yo. Ngal. 5:17

¹⁶ Kansi kana mono sala yina ya mono zola ve, buna mono kundima nsiku, na yo ikele mbote.

¹⁷ Kansi ntangu yai, yo ikele mono diaka ve ya sala yo, kansi masumu ya ikele kuvanda mu mono.

¹⁸ Kadi mono zaba mu mono, ikele mu nsuni ya mono, mambu ya mbote ikele kuvanda ve; kadi luzolo kusala mambu ya mbote ikele, kansi ngolo kusala yo ikele ve.

¹⁹ Kadi mambu ya mbote ya mono zola, mono sala yo ve, kansi mambu ya mbi ya mono zola ve, mono sala yo.

²⁰ Kansi kana yina ya mono zola ve mono sala, yo ikele mono diaka ve ya sala yo, kansi masumu ya ikele kuvanda mu mono.

²¹ Buna mono mona nsiku yai, bu mono zola kusala mambu mbote, mambu mbi ikele na mono.

²² Kadi mono yangalala mu nsiku ya Nzambi, mu muntu ya mono nakati.

²³ Kansi mono mona nsiku yankaka mu biela ya mono, ikele kunwana na nsiku ya mabanza ya mono, ye ikele kutwala mono mu kimpika mu nsi ya nsiku ya masumu, yo ikele mu biela ya mono. Ngal. 5:17; 1 Pet. 2:11

²⁴ Mono ikele muntu ya ntantu mingi! Nani tavulusa mono na nitu yai ya lufwa.

²⁵ Matondo kwa Nzambi mu Yesu Klisto Mfumu ya beto. Buna mono kibeni ikele mpika ya nsiku ya Nzambi mu mabanza, kansi mu nitu ya mono, mono ikele mpika ya nsiku ya masumu. Yoa. 8:36; 1 Kol. 15:57