Loma 6 - Le Nouveau Testament en Kikwango 1950

Bau ya botikwa mu Klisto bau fwiti kuvanda mu masumu diaka ve

¹ Buna beto tatuba nki ? Beto tavanda mu masumu na nlemvo lenda kwiza mingi ?

² Mpilayai ve. Beto ya imene kufwa ku masumu, mpila nki beto tavanda mu yau diaka ?

³ Keti beno zaba ve na beto yonso ya botikwaka mu Klisto Yesu, botikwaka mu lufwa ya yandi. Ngal. 3:27

⁴ Buna beto zikwaka sikamosi na yandi mu mbotika mu lufwa, na bonso Klisto fulukiswaka tuka bafwa mu nkembo ya Tata, buna beto mpe fwiti kutambula mu moyo yampa. Kolo. 2:12

⁵ Kadi kana beto bundana na yandi mu kifwani ya lufwa ya yandi, beto tavanda mpe mu kifwani ya mfulukulu ya yandi, Fili. 3:10

⁶ kadi beto zaba yai, na muntu ya beto ya nkulu komwaka va kulunsi sikamosi na yandi, na nitu ya masumu lenda kukatulwa, na beto tavanda mpika ya masumu diaka ve. Ngal. 2:19; 5:24; Ef. 4:22; 5:19—6:17

⁷ Kadi yandi ya kufwaka imene kukatulwa na masumu.

⁸ Kansi kana beto kufwaka na Klisto, beto kwikila beto tavanda na moyo na yandi mpe. 2 Tim. 2:11

⁹ Beto zaba bu Klisto fulukiswaka tuka bafwa, yandi takufwa diaka ve, lufwa lenda kuyala yandi diaka ve. Nzai. 1:18

¹⁰ Kadi lufwa ya yandi kufwaka, yandi kufwaka ku masumu kimakulu, kansi moyo ya ikele na yandi ikele kwa Nzambi. Eb. 9:27

¹¹ Mpilayai beno mpe banza beno imene kufwa ku masumu, kansi kwa Nzambi beno ikele na moyo mu Klisto Yesu. Ngal. 2:20

¹² Sambu na yai, bika masumu yala ve mu nitu ya beno ya lufwa, na beno talemvuka lutondo ya yo;

¹³ mpe pesa ve biela ya beno bonso binwaninu ya konda lunungu ku masumu, kansi beno dipesa kwa Nzambi bonso na moyo ya imene kutelemiswa tuka bafwa, ye pesa biela ya beno bonso binwaninu ya lunungu kwa Nzambi. Lom. 12:1; 1 Pet. 4:1

¹⁴ Kadi masumu tayala beno ve, kadi beno ikele nansi nsiku ve, kansi nansi nlemvo. Ngal. 5:18

Kimpika ya masumu ye kimpika ya lunungu

¹⁵ Buna nki ? Beto tasala masumu sambu na beto ikele nansi nsiku ve, kansi nansi nlemvo ? Mpila yai ve!

¹⁶ Beno zaba ve, kwa muntu ya beno dipesa bonso bampika, ku lemvukilu, buna beno ikele bampika ya yandi ya beno lemvuka, keti ya masumu ku lufwa, keti ya lemvukilu ku lunungu. Yoa. 8:34; 2 Pet. 2:19

¹⁷ Kansi matondo kwa Nzambi, bonso beno vandaka bampika ya masumu, beno imene kulemvuka tuka ntima ya beno malongi yina ya longwa kwa beno.

¹⁸ Ye beno imene kukangulwa tuka masumu, beno imene kukituka bampika ya lunungu. 1 Kol. 7:22

¹⁹ Mono tuba mu kimuntu sambu na lebakana ya nsuni ya beno, kadi bonso beno pesaka biela ya beno bonso bampika ku nsumukunu, ku kimpumbulu ye ku bifu ya kimpumbulu, mpilayai beno pesa biela ya beno bonso bampika ku lunungu na kuvanda ya nlongo.

²⁰ Kadi bu beno vandaka bampika ya masumu, beno vandaka ya pwanza ya lunungu.

²¹ Buna beno vandaka na mabundu nki ntangu yina, mu bisalu ya beno ikele na nsoni ntangu yai ? Kadi nsuka ya mambu yina ikele lufwa. Lom. 8:6; Fili. 3:19

²² Kansi ntangu yai, beno imene kukangulwa tuka masumu ye kukituka bampika ya Nzambi, beno ikele na mabundu ya beno mu bifu ya nlongo, ye nsuka ya yo ikele moyo ya mvu ya mvu. 1 Pet. 1:9

²³ Kadi lufutu ya masumu ikele lufwa, kansi matabisi ya nlemvo ya Nzambi ikele moyo ya mvu ya mvu, mu Klisto Yesu Mfumu ya beto. 1 Mose 2:17; Lom. 5:12, 18; Yak. 1:15