Loma 5 - Le Nouveau Testament en Kikwango 1950

Mabundu ya mpulusu

¹ Mpilayai, sambu na beto imene kunungiswa mu lukwikilu, Mfumu Yesu Klisto ya beto ya imene kupesa beto yenge kwa Nzambi;

² yandi imene kusongaka beto nkotolo mu lukwikilu ku nlemvo yai mu yo beto telema ye beto yangalala mu vuvu ya nkembo ya Nzambi. Yoa. 14:6; Ef. 2:18; 3:12; 1 Pet. 5:12

³ Kaka yai ve, kansi beto ikele kuyangalala mpe mu mpasi ya beto, kuzaba na mpasi ikele kupesa mvibudulu; Fili. 1:29; Yak. 1:3

⁴ mvibudulu pesa kitezo ya lunga, kitezo ya lunga pesa vuvu; Eb. 10:36

⁵ ye vuvu monisa nsoni ve, sambu na zola ya Nzambi fuluka ntima ya beto mu Mpeve Yanlongo ya peswaka kwa beto. Nk. 22:5; 25:2, 19

⁶ Kadi bu beto vandaka lebakana, mu ntangu ya lunga Klisto kufwaka sambu na bankwa konda vumina Nzambi. 1 Pet. 3:18

⁷ Kadi muntu luta kuzola ve kufwila nkwa lunungu, kadi bankaka lenda kupesa na bau kufwila nkwa mbote.

⁸ Kansi Nzambi songaka zola ya yandi kwa beto, kadi bu beto vandaka bankwa masumu Klisto fwilaka beto.

⁹ Buna bu beto nungiswaka mu menga ya yandi, buna mu kieleka beto tavuluswa tuka makasi ya Nzambi sambu na yandi.

¹⁰ Kadi kana bu beto vandaka bambeni beto vutukaka kwa Nzambi mu lufwa ya Mwana ya yandi, buna beto imene kuvutuka kieleka kwwa Nzambi, beto tavuluswa mu moyo ya yandi;

¹¹ mpilayai kaka ve, kansi beto yangalala mpe mu Nzambi mu Mfumu ya beto Yesu Klisto, mu yandi beto imene kubaka vutuka kwa Nzambi. 1 Kol. 11:30

Masumu ye lufwa kwiza mu Adami lunungu ye moyo mu Klisto

¹² Sambu na yai, bonso masumu kotaka mu nsi mu muntu mosi, ye lufwa sambu na masumu, buna lufwa kotaka mu bantu yonso, kadi yonso imene kusala masumu, 1 Mose 2:17; 3:6; Lom. 6:23; 1 Kol. 15:21; 2 Kol. 5:18

¹³ kadi masumu vandaka mu nsi ti nsiku, kansi ya konda nsiku masumu ikele kutangwa ve. Lom. 4:15

¹⁴ Kansi lufwa yalaka tuka Adami ti Mose, va bau mpe ya salaka masumu ve, bonso masumu ya Adami salaka. Yandi ikele kifwani ya yandi ya takwiza. 1 Kol. 15:45

¹⁵ Kansi matabisi ya nlemvo ikele ve bonso masumu yina. Kadi kana mu masumu ya muntu mosi, bantu mingi kufwaka, buna ya luta nlemvo ya Nzambi ye matabisi ya yandi kwenda kwa bantu mingi, mu nlemvo ya muntu mosi, Yesu Klisto.

¹⁶ Matabisi ya nlemvo ikele ve bonso yina ya kwizaka mu muntu mosi ya salaka masumu, kadi mfundusu kwizaka mu muntu mosi ku mbedoso, kansi matabisi ya nlemvo kwizaka sambu na masumu ya bantu mingi ku mambu ya lunungu.

¹⁷ Kadi kana mu masumu ya muntu mosi, lufwa yalaka sambu na muntu mosi, buna ya luta, bau ya baka fuluka ya nlemvo ye matabisi ya lunungu tayala mu moyo sambu na muntu mosi, Yesu Klisto.

¹⁸ Buna bonso mbedoso kwizaka kwa bantu yonso sambu na masumu ya muntu mosi, buna ndungusu kwizaka ya pesa moyo kwa bantu yonso mu kisalu ya funungu mosi. Lom. 6:23

¹⁹ Kadi bonso bantu mingi kwizaka bankwa masumu mu nkolomono ya muntu mosi, buna mpe bantu mingi takwiza bankwa lunungu mu lemvuka ya muntu mosi.

²⁰ Kansi nsiku kwizaka mpe, na masumu lenda kwiza mingi, kansi sika na masumu ikele mingi, nlemvo lutaka mingi; Lom. 7:8

²¹ kadi bonso masumu yalaka mu lufwa, buna mpe nlemvo lenda kuyala mu lunungu mu moyo ya mvu ya mvu mu Yesu Klisto Mfumu ya beto.