Loma 4 - Le Nouveau Testament en Kikwango 1950

Abalahami nungiswaka mu lukwikilu, beto mpe tanungiswa mu lukwikilu kaka

¹ Buna beto tatuba nki sambu na Abalahami tata ya beto mu nsuni ?

² Kadi, kana Abalahami nungiswaka mu bisalu, yandi ikele na mambu na kuyana, kansi nantwala na Nzambi ve.

³ Kadi masonukwa ikele kutuba nki ? Abalahami kwikilaka Nzambi, yo tangwa kwa yandi lunungu. 1 Mose 15:6; Ngal. 3:6

⁴ Kansi kwa yandi ya sala, nsendo tangwa ve bonso ya nlemvo kansi bonso mfuka. Lom. 11:6

⁵ Kansi kwa yandi ya sala ve, kansi ya kwikila yandi ya nungisa bankwa ya konda lunungu, lukwikilu ya yandi tangwa ku lunungu. Lom. 3:28

⁶ Bonso Davidi sakumunaka muntu, ya Nzambi tangwa lunungu, kansi na bisalu ve, kutuba:

⁷ Lusakumuna ikele ya bau, na kimpimbulu ya bau imene kuvidiswa, ye masumu ya bau imene kufukwa. Nk. 32:1

⁸ Kiese ikele na muntu ya Mfumu tanga masumu kwa yandi ve.

⁹ Buna kiese yai ikele kaka kwa bau ya nzengolo, keti kwa bau ya konda nzengolo mpe ? Kadi beto ikele kutuba: Lukwikilu ya Abalahami tangwa lunungu.

¹⁰ Buna yo tangwaka kwa yandi mpila nki ? Bu yandi vandaka mu nzengolo keti ya konda nzengolo. Yo ikele mu nzengolo ve, kansi mu konda nzengolo.

¹¹ Yandi bakaka kidimbu ya nzengolo bonso kidimbu ya lunungu mu lukwikilu ya yandi vandaka na yo, bu yandi konda nzengolo. Yandi sala yai sambu na kuvanda tata ya bantu yonso ya kwikila, bu bau ikele mu konda nzengolo, na lunungu lenda kutangwa kwa bau; Ngal. 3:7

¹² yandi ikele tata ya nzengolo kwa bau ya nzengolo kaka ve, kansi kwa bau ya tambula mpe mu bitambi ya lukwikilu ya vandaka na Abalahami tata ya beto, bu yandi konda nzengolo.

¹³ Kadi mu nsiku ve, nsilulu peswaka kwa Abalahami keti kwa nkuna ya yandi, na yandi tavanda mvingidi ya difwa ya nsi, kansi yo peswa mu lunungu ya lukwikilu.

¹⁴ Kadi, kana bau ya ikele ya nsiku ikele bamvingidi ya difwa, buna lukwikilu imene kukituka mpamba, ye nsilulu imene kukituka mpamba mpe.

¹⁵ Kadi nsiku ikele kubasisa makasi, kansi bu nsiku ikele ve, kufwa ya nsiku mpe ikele ve. Yoa. 15:22; Lom. 5:13; 7:8, 10; 1 Kol. 15:56

¹⁶ Sambu na yai yo ikele ya lukwikilu, na yo lenda kuvanda sambu na nlemvo, na nsilulu lenda kuvanda kieleka kwa nkuna yonso; kwa bau ya ikele na nsiku kaka ve, kansi kwa bau mpe ya ikele na lukwikilu ya Abalahami, ya ikele tata ya beto yonso, Ngal. 3:9, 16, 18, 28

¹⁷ bonso yo ikele kusonama: Mono tulaka nge tata ya makanda mingi ya bansi ya bantu; nantwala na Nzambi ya yandi kwikilaka, yandi kwikilaka Nzambi ya pesa bafwa moyo, ye yandi binga bima ya ikele ve bonso yo ikele. 1 Mose 17:4

¹⁸ Bu Abalahami konda vuvu, yandi kwikilaka mu vuvu, na yandi kituka tata ya bansi mingi ya bantu, bonso yo tubwaka: Nkuna ya nge tavanda mpilayai. 1 Mose 15:4; Eb. 11:11

¹⁹ Yandi kwiza lebakana ve mu lukwikilu, bu nitu ya yandi vandaka bonso kufwa, yandi vandaka mfinama mvu nkama mosi, ye divumu ya Sala vandaka bonso ya kufwa. 1 Mose 17:17

²⁰ Kansi mu nsilulu ya Nzambi yandi vandaka mtembe ve mu konda ya lukwikilu, kansi yandi kwizaka ngolo mu lukwikilu ye kembilaka Nzambi,

²¹ yandi zabaka mbote na yina ya Nzambi silaka, Nzambi lenda kusala yo mpe. Nk. 115:3; Luk. 1:37

²² Sambu na yai mpe, yo tangwa kwa yandi lunungu.

²³ Kansi yo sonikwa sambu na yandi kaka ve, na yo tangwaka kwa yandi. Lom. 15:4

²⁴ Kansi yo sonikwa sambu na beto mpe, ya tatangwa mpilayina mpe, beto ya kwikila mu yandi ya fulukisaka Yesu Mfumu ya beto, tuka bafwa.

²⁵ Yandi ya yekulwaka sambu na masumu ya beto, ye fulukiswaka kunungisa beto.