Loma 16 - Le Nouveau Testament en Kikwango 1950

Kubakwa ya Foibe

¹ Mono zabisa kwa beno, mpangi ya nkento ya beto Foibe, yandi ikele sielo ya dibundu ya ikele mu Kenkelea.

² Beno baka yandi mu Mfumu, bonso yo lunga na banlongo, sadisa yandi mu mambu yonso ya yandi ikele na nsatu nakati na beno; kadi yandi kibeni mpe vandaka nsadisi ya bantu mingi ye ya mono kibeni mpe.

Kufidisa ya mbote

³ Pesa mbote kwa Pliska ye Akila basadi sikamosi na mono mu Klisto Yesu.

⁴ Bau zolaka kupesa malaka ya bau sambu na moyo ya mono; mono kaka ve pesa matondo kwa bau, kansi mabundu yonso ya bapaien mpe.

⁵ Pesa mbote kwa dibundu ya ikele mu nzo ya bau. Pesa mbote kwa Epaineto zolwa ya mono, mukwikidi ya ntete mu Klisto mu Asia.

⁶ Pesa mbote kwa Malia, ya sadilaka beno mingi.

⁷ Pesa mbote kwa Andoloniko ye Yunia kibutu ya mono ye bantu ya boloko sikamosi na mono, ya ikele na luzitu nakati na bantumwa, ya vandaka mu Klisto ntete na mono.

⁸ Pesa mbote kwa Ampilia, zolwa ya mono mu Mfumu.

⁹ Pesa mbote kwa Ulubanu musadi sikamosi na beto mu Klisto ye Staki zolwa ya mono.

¹⁰ Pesa mbote kwa Apele ya lunga mu Klisto. Pesa mbote kwa bau ya nzo ya Alistobulo.

¹¹ Pesa mbote kwa Elodioni kibutu ya mono. Pesa mbote kwa bau ya nzo ya Nalakiso ya ikele mu Mfumu.

¹² Pesa mbote kwa Tilifena ye Tilifosa bau ya sala mu Mfumu. Pesa mbote kwa Pelesi zolwa, ya salaka mingi mu Mfumu.

¹³ Pesa mbote kwa Lufo ya solwa mu Mfumu, ye kwa ngudi ya yandi ye ya mono.

¹⁴ Pesa mbote kwa Asinkilito, Felengoni, Eleme, Pataloba, Elemas ye bampangi ya ikele sikamosi na bau.

¹⁵ Pesa mbote kwa Filolongo ye Yulia, Neleo ye mpangi nkento ya yandi, ye Olimpa ye banlongo yonso ya ikele sikamosi na bau.

¹⁶ Pesana mbote na mfibulu ya nlongo. Mabundu yonso ya Klisto fidisa beno mbote.

¹⁷ Bampangi, mono bombidila beno, tala mbote bau ya basisa kabana ye mambu ya kuta sakuba, ye bau landa ve malongi ya beno longukaka, beno katuka mu bau.

¹⁸ Kadi bau ya ikele mpilayai ikele kusadila ve Mfumu ya beto Klisto, kansi bau ikele kusadila divumu ya bau, ye mu ndinga kitoko ye mu kutuba ya mbote bau ikele kukusa mintima ya bau ya konda kuzaba.

¹⁹ Kadi lemvukilu ya beno ikele kuzabakana kwa bantu yonso. Sambu na yai, mono yangalala sambu na beno, kansi mono tonda beno vanda na ngangu na mambu ya mbote ye konda ngangu na mambu ya mbi. 1 Kol. 14:20

²⁰ Nswalu Nzambi ya yenge tadiatikisa Satana nansi bitambi ya beno. Nlemvo ya Mfumu ya beto Yesu Klisto vanda na beno.

²¹ Timoteo musadi sikamosi na mono, ye Lukio ye Yasoni ye Sosipatalo bibutu ya mono fidisa beno mbote.

²² Mono Teleteo ya sonika nkanda yai fidisa beno mbote mu Mfumu.

²³ Ngayo nsadisi ya mono ye ya dibundu yamvimba fidisa beno mbote. Elasto mukebi ya mbongo ya mbanza ye Kwalato mpangi fidisa beno mbote.

²⁴ Nlemvo ya Mfumu ya beto Yesu Klisto vanda na beno yonso. Amen.

²⁵ Kwa yandi ya lenda kusikidika beno bonso ikele mu nsamu mbote ya mono, ye nsamunu ya Yesu Klisto, bonso nzaikusu ya mambu ya kinsweki ya vandaka mu kinsweki tuka na bantangu ya luyantiku, Ef. 3:20; Yud. 24

²⁶ kansi ntangu yai yo imene kuzabiswa mu masonukwa ya bambikudi bonso nsikudukusu ya Nzambi ya mvu ya mvu. Yo imene zabiswa kwa bansi ya bantu yonso kwa lemvukilu ya lukwikulu. Ef. 1:1

²⁷ Kwa Nzambi yandi kaka ya ngangu, nkembo kwa yandi mu Yesu Klisto mvu ya mvu. Amen. Lom. 11:36; 1 Tim. 1:17