Loma 15 - Le Nouveau Testament en Kikwango 1950

Kubombidila sambu na vanda na yenge

¹ Beto ya ikele ngolo fwiti kunata kimbevo ya bankwa lebakana, ye beto diyangidisa ve. 1 Kol. 9:22; Ngal. 6:1

² Bika muntu na muntu mu beto yangidisa bamfinangani ya yandi mu yina ya mbote ku ntungulu. 1 Kol. 10:24; Fili. 2:4

³ Kadi Klisto mpe diyangidisaka ve, kansi bonso yo ikele kusonama: Mafingu ya bau ya fingaka nge kubwaka va mono. Nk. 69:9

⁴ Kadi mambu yonso ya sonamaka ntete, sonamaka sambu na kulonga beto, na beto lenda kuvanda na vuvu mu mvibidilu ye mbombolo ya masonukwa. Lom. 4:23; 1 Kol. 10:11; 2 Tim. 3:16

⁵ Bika Nzambi ya mvibidilu ye ya mbombolo pesa beno kuvandana mabanza mosi bonso Klisto Yesu, 1 Kol. 1:10; Fili. 2:2; 3:15

⁶ na beno lenda kukembila Nzambi Tata ya Mfumu ya beto Yesu Klisto mu kintuadi ye mu munoko mosi.

⁷ Mpilayai beno bakana bonso Klisto bakaka beno mpe, ku nkembo ya Nzambi.

⁸ Kadi mono tuba Klisto salwaka sielo kwa bau ya nzengolo sambu na mambu ya kieleka ya Nzambi, na yandi lenda kusiamisa bansilulu ya peswaka kwa batata, Mat. 15:24; 20:28; Bis. 3:25

⁹ na bapaien lenda kukembila Nzambi sambu na nkenda ya yandi, bonso yo ikele kusonama: Sambu na yai, mono tazitisa nge nakati na bapaien ye yimbila nkumbu ya nge.

¹⁰ Diaka yandi tubaka: Beno bapaien, yangalala sikamosi na bantu ya yandi.

¹¹ Diaka: Beno yonso bapaien, sika Mfumu, bika bantu yonso pesa matondo kwa yandi. Nk. 117:1

¹² Yesaya tubaka diaka: Mwanzi ya Isai tavanda, ye yandi ya tatelema kuyala bapaien, bapaien tatula vuvu mu yandi.

¹³ Bika Nzambi ya vuvu fulusa beno na kiese yonso ye yenge mu lukwikilu, na beno lenda kukula mu vuvu mu ngolo ya Mpeve Yanlongo.

Paulu sabisa bau kisalu ya yandi ye nzila ya yandi takwenda

¹⁴ Bampangi ya mono, mono kibeni kwikidika sambu na beno, na beno kibeni ikele kufuluka na mambu ya mbote, ye fuluka na nzailu yonso, ye beno lenda kulongana mpe.

¹⁵ Kansi mu mambu yankaka mono sonika kwa beno mu kikesa, bonso kutula beno mu mbambukilu diaka, sambu na nlemvo ya Nzambi pesaka mono,

¹⁶ na mono fwiti kuvanda sielo ya Yesu Klisto kwa bapaien, bu mono sala kisalu ya nsamu mbote ya Nzambi, na bapaien bau kibeni lenda kuvanda nkailu ya lunga kubakwa, bu bau kutulwa nlongo mu Mpeve Yanlongo. Lom. 11:13

¹⁷ Buna mono kuyana mu Klisto Yesu mu mambu ya Nzambi.

¹⁸ Kadi mono tita kutuba mambu yankaka, kansi kaka yina ya Klisto salaka mu mono sambu na lemvukilu ya bapaien mu ndinga ye bisalu,

¹⁹ mono sala yai mu ngolo ya bidimbu ye nyitukulu, mu ngolo ya Mpeve Yanlongo, sambu na mono imene kulungisa nsamu mbote ya Klisto tuka Yelusalemi ye ndambu yonso ya yo, ti na Ililiko.

²⁰ Mono tula ngolo yonso sambu na kusamuna nsamu mbote sika na nkumbu ya Klisto imene kubingwa ve, na mono tatunga ve va lufulu ya muntu yankaka, 2 Kol. 10:15

²¹ kansi bonso yo ikele kusonama: Bau ya konda samunwa nsangu ya yandi, bau tamona, bau ya konda kuwa tazaba.

Yandi zola bau yindula yandi mu mabanza ya bau bu yandi kanaka kwenda kuna Spania

²² Sambu na yai mpe nzila kangwaka mbala mingi sambu na kwiza kwa beno.

²³ Kansi ntangu yai mono fwiti kuvanda na sika diaka ve mu ndambu yai, ye mvu mingi yai mono vandaka na lutondo kwiza kwa beno. Bis. 19:2; Lom. 1:10

²⁴ Buna bu mono kwenda ku Spania, mono ikele na vuvu kumona beno mu nzila, ye beno tasindika mono kuna, kana ntete mono imene kufuluka na kiese ntangu fioti sikamosi na beno.

²⁵ Kansi ntangu yai mono kwenda ku Yelusalemi sambu na sadila banlongo. Bis. 20:16; 21:17

²⁶ Kadi mu Makedonia ye Akaya bau zolaka kutikisa mbongo sambu na bansukami nakati banlongo ya ikele mu Yelusalemi. Bis. 24:17; 1 Kol. 16:1; 2 Kol. 8:1; 9:1

²⁷ Kadi bau zolaka mpilayina, ye bau ikele na mfuka kwa bau. Kadi kana bapaien ikele kubaka kintuadi na bima ya bau ya kimpeve, bau mpe fwiti kusadisa bau mu bima ya kinsuni. 1 Kol. 9:11

²⁸ Mpilayai, bu mono imene kumanisa kisalu yai, ye imene kupesa bau matabisi yai, buna mono takwenda kuluta beno ku Spania.

²⁹ Ye mono zaba bu mono kwiza kwa beno, mono takwiza mu mfulukisilu ya lusakumunu ya Klisto.

³⁰ Bampangi, mono bombidila beno mu Mfumu ya beto Yesu Klisto ye mu zola ya Mpeve, na beno tanwana sikamosi na mono mu lombilu ya beno kwa Nzambi sambu na mono, Kolo. 4:12

³¹ na mono tavuluswa tuka bau ya kolama mu Yuda, ye banlongo tazola kisalu ya lunga ya mono salaka mu Yelusalemi, 2 Tes. 3:2

³² na mono lenda kwiza kwa beno mu kiese mu luzolo ya Nzambi, ye baka luvundu sikamosi na beno.

³³ Bika Nzambi ya yenge vanda na beno yonso. Amen. Fili. 4:9; 1 Tes. 5:23; 2 Tes. 3:16