Loma 14 - Le Nouveau Testament en Kikwango 1950

Beto tasadisa bau ya ikele lebakana mu lukwikilu

¹ Konso ya ikele lebakana mu lukwikilu, beno baka yandi, kansi tudisa ntembe ve. Lom. 15:1, 7

² Muntu mosi ikele na lukwikilu kudia bima yonso, kansi yandi ya ikele lebakana ikele kudia bandunda.

³ Yandi ya kudia, bika yandi saula ve, yandi ya konda kudia. Ye yandi ya konda kudia, fundisa ve yandi ya kudia; kadi Nzambi imene kubaka yandi. Lom. 15:7; Kolo. 2:16

⁴ Nge ikele nani ya fundisa sielo ya muntu yankaka ? Yandi telema keti kubwa kwa mfumu ya yandi kibeni. Kansi yandi tatelema, sambu na Mfumu ikele na ngolo kutelemisa yandi. Yak. 4:12

⁵ Muntu mosi ikele kuteza na lumbu mosi luta yankaka, yankaka ikele kuteza bilumbu yonso mutindu mosi. Bika muntu na muntu zaba mbote mu mabanza ya yandi kibeni.

⁶ Yandi ya banza sambu na lumbu, banza sambu na yo mu Mfumu; yandi ya kudia, kudia mu Mfumu, kadi yandi pesa matondo kwa Nzambi. Yandi ya kudia ve, kudia ve mu Mfumu, ye pesa matondo kwa Nzambi. 1 Kol. 10:31

⁷ Beto ikele beto mosi ve, bu beto ikele na moyo; ye beto ikele beto mosi ve bu beto kufwa. 1 Pet. 4:2

⁸ Kadi kana beto ikele na moyo, beto ikele na moyo kwa Mfumu, kana beto kufwa, beto kufwa kwa Mfumu. Buna kana beto ikele na moyo keti kufwa beto ikele ya Mfumu. Ngal. 2:20

⁹ Sambu na mambu yai Klisto kufwaka ye ikele na moyo diaka, na yandi lenda kuvanda Mfumu ya bafwa ye ya bamoyo.

¹⁰ Kansi nge, sambu na nki nge fundisa mpangi ya nge ? Keti nge mpe, sambu na nki nge saula mpangi ya nge ? Kadi beto yonso tatelema nantwala ya kiti ya mfundusu ya Nzambi. 2 Kol. 5:10

¹¹ Kadi yo imene kusonama: Mfumu tubaka: kieleka bonso mono ikele na moyo, makungunu yonso tafukama kwa mono, tudimi yonso tazitisa Nzambi. Fili. 2:10

¹² Buna beto muntu na muntu tatuba mambu ya yandi kibeni kwa Nzambi. Mat. 12:36

Ye konda kutesisa muntu sakuba

¹³ Mpilayai, bika beto fundisana diaka ve, kansi luta fundisa mambu yai, na muntu tula ve ditadi ya nteso sakuba keti tula ntambu ya kubwisa mu nzila ya mpangi ya yandi.

¹⁴ Mono zaba ye kwikidiswa mu Mfumu Yesu, na kima mosi ikele kusumuka ve mu yo kibeni; kansi konsonani ya banza kima ikele kusumuka, yo ikele kusumuka kwa yandi. Bis. 10:14; 1 Kol. 8:7; Tit. 1:15; 1 Tim. 4:4

¹⁵ Kadi kana mpangi ya nge, ikele na ntantu sambu na madia ya nge, buna nge ikele kutambula diaka ve mu zola. Bivisa muntu ve na madia ya nge, sambu na yandi Klisto kufwaka. 1 Kol. 8:11

¹⁶ Buna bika mbote ya beno kutubwa mbi ve.

¹⁷ Kadi kimfumu ya Nzambi ikele ve kudia ye kunwa, kansi lunungu ye yenge ye kiese mu Mpeve Yanlongo. 1 Kol. 8:8

¹⁸ Kadi konso ya sadila Klisto mu mambu yai ikele kuzolakana kwa Nzambi ye lunga kwa bantu.

¹⁹ Buna bika beto landa mambu ye sala yenge ye mambu ya tungana.

²⁰ Kufwa kisalu ya Nzambi ve sambu na madia. Bima yonso ikele kuvedila, kansi yo ikele mbi kwa muntu yina ya kudia mu tesa ya sakuba. Tit. 1:15

²¹ Yo ikele mbote kudia mbizi ve keti kunwa vinia ve keti kusala ve, konso mambu ya lenda kutesa mpangi ya nge sakuba.

²² Lukwikilu ya ikele na nge, keba yo nge kibeni nantwala na Nzambi. Kiese ikele na yandi ya difundisa ve mu yina ya yandi zaba ikele ya lunga.

²³ Kansi konsonani ya ikele na ntembe bu yandi kudia, bediswa, sambu na yandi kudia ve mu lukwikilu; kansi yonso ya salwa mu konda lukwikilu ikele masumu.