Loma 13 - Le Nouveau Testament en Kikwango 1950

Lemvuka kwa banyadi

¹ Muntu na muntu fwiti kulemvuka kwa banyadi. Kadi luyalu ikele ve, kaka ya Nzambi; ye banyadi ya ikele, ikele kutulwa tuka Nzambi. Bing. 8:15; Tit. 3:1; 1 Pet. 2:13

² Mpilayai, yandi ya buya luyalu, ikele kubuya nsikudukusu ya Nzambi, ye bau ya buya tabaka mfundusu kwa bau kibeni. Bing. 24:21

³ Kadi banyadi ikele na makasi ve ku bisalu ya mbote, kansi ku bisalu ya mbi. Nge zola ve tita nyadi ? Sala yina ya mbote, ye yandi tasika nge.

⁴ Kadi yandi ikele sielo ya Nzambi kwa nge mu mbote. Kansi kana nge sala yina ya ikele mbi, vanda na boma, kadi yandi nata mbele ya mvita mpamba ve, kadi yandi ikele sielo ya Nzambi, mvutudi ya ndinda mu makasi kwa bau ya sala mbi.

⁵ Sambu na yai beno fwiti kulemvuka bau, sambu na makasi kaka ve, kansi sambu na kansansa ya nge mpe.

⁶ Kadi sambu na yai beno futa mpaku mpe, kadi bau ikele basielo ya Nzambi, bau ikele kusala kisalu yai ntangu yonso.

Kufuta ya mfuka yonso

⁷ Futa mfuka ya beno kwa bantu yonso, mpaku ya nsi kwa nkwa mpaku ya nsi, mpaku ya bima kwa nkwa mpaku ya bima, boma kwa muntu ya lunga na yo, ye nzitusu kwa muntu ya lunga na yo. Mat. 22:21

⁸ Vanda na mfuka kwa muntu ve, kansi zolana kaka, kadi konso ya zola bamfinangani ya yandi ikele kulungisa nsiku. Mat. 22:37; Ngal. 5:14

⁹ Sambu na yai: Sala bizumba ve, kufwa muntu ve, yiba ve, tula zola kwa bima ya muntu ve, ye bansiku yonso yankaka ikele kubundana mu mambu yai mosi: Zola bamfinangani ya nge bonso nge kibeni. 2 Mose 20:13; 3 Mose 19:18; Ngal. 5:14; Yak. 2:8

¹⁰ Zola ikele kusala bamfinangani ya yandi mbi ve, buna zola ikele mfulukisilu ya nsiku. 1 Kol. 13:4

Kutambula ya balunungu

¹¹ Yo yai, beno zaba ntangu, na lokula imene kulunga na beno fwiti kusikama na tulu, kadi ntangu yai mpulusu ya beto luta mfinama na yo vandaka bu beto yantikaka kwikila. Ef. 5:14; 1 Tes. 5:6

¹² Mpimpa zola kumana, mwini ikele mfinama. Sambu na yai, bika beto katula bisalu ya tombe, ye vwata nkaku ya mwini. Ef. 5:11

¹³ Bika beto tambula ya kieleka bonso mu mwini, mu makinu ve ye kolwa ve, mu zola ya mbi ye mambu ya nsoni ve, mu nwaninu ye kimpala ve, Bing. 23:20; Luk. 21:34; Ngal. 5:19; 1 Kol. 6:9; Ef. 5:3; Fili. 4:8

¹⁴ kansi beno vwata Mfumu Yesu Klisto, ye banza sambu na nsuni ve, sambu na lungisa lutondo ya mbi na yo. 1 Pet. 2:11