Loma 12 - Le Nouveau Testament en Kikwango 1950

Kubombidila sambu na kusala luzolo ya Nzambi mu ntima ya dikulumuna, kwikama ye zola

¹ Mpilayai mono bombidila beno, bampangi, mu nkenda ya Nzambi, pesa banitu ya beno nkailu ya moyo ya zikwa, ya nlongo ye ya zolakana kwa Nzambi, yo ikele kisalu ya beno ya ngangu.

² Beno difwanikisa ku nsi yai ve, kansi pinduka yampa mu mabanza ya beno, na beno lenda kuzaba yina ya ikele luzolo ya Nzambi ya mbote ye ya zolakana ye ya lunga. Ef. 4:23; 5:10, 17; Fili. 1:9

³ Kadi mu nlemvo ya peswaka kwa mono, mono tuba kwa muntu na muntu na yandi dibanzila ve mambu ya luta ya yandi fwiti kubanza, kansi kubanza mabanza ya lunga, bonso Nzambi kabaka kitezo ya lukwikilu kwa muntu na muntu. 1 Kol. 7:17

⁴ Bonso beto ikele na biela mingi mu nitu mosi, kansi biela yonso ikele na kisalu mosi ve,

⁵ mpilayai, beto ya ikele mingi ikele nitu mosi mu Klisto, kansi muntu na muntu ikele biela ya sadisana. 1 Kol. 12:12, 27; Ef. 4:16, 25; Kolo. 1:24

⁶ Beto ikele na matabisi ya mpila mu mpila bonso nlemvo ya peswaka kwa beto. Kana yo ikele matabisi ya mbikudulu, bika beto bikula bonso kitezo ya lukwikilu ya beto, 1 Kol. 12:4; Ef. 4:11; 1 Pet. 4:10

⁷ kana yo ikele kisielo ya dibundu bika beto sala mu kisielo ya dibundu, kana yo ikele kulonga bika yandi longa.

⁸ Yandi ya bombidila bika yandi bomba, yandi ye pesa, bika yandi pesa na ntima mosi; yandi ya yala, bika yandi yala na ntima ya mbote; yandi ya kuwila nkenda, sala yo na kiese.

⁹ Bika zola konda luvunu. Tina mambu ya mbi, tatamana na mambu mbote. Nk. 34:14; 37:27; 97:10; Amosi. 5:15

¹⁰ Mu zola ya bampangi, zolana na ntima yonso; mu nzisitu lutisana nantwala. 1 Tes. 4:9; Eb. 13:1; 1 Pet. 1:22; 5:5; Fili. 2:3

¹¹ Mu kisalu vanda bumolo ve, sadila Mfumu na nlemvo mu mpeve. Lom. 14:18; 16:18

¹² Yangalala mu vuvu, vanda na mvibudulu mu mpasi, ye tatamana mu lombilu. Mat. 10:22; Luk. 18:1; Bis. 1:14; Lom. 15:13; Kolo. 4:2; Ef. 6:18; 1 Tes. 5:16; 2 Tim. 2:12; Eb. 10:36; 12:1; Yak. 5:11; 1 Pet. 2:20

¹³ Sadisa mu nsatu ya banlongo, landa kudikila banzenza. 1 Kol. 16:1; 1 Tim. 5:10; Tit. 1:8; Eb. 13:2; 1 Pet. 4:9

¹⁴ Sakumuna bau ya zoma beno, sakumuna ya konda ndola. Luk. 6:28; 1 Kol. 4:12; 1 Pet. 3:9

¹⁵ Yangalala sikamosi na bau ya yangalala, dila sikamosi na bau ya dila.

¹⁶ Vandana na mabanza mosi. Tula mabanza ya beno na mambu ya ditombola ve kansi kulumuka ku yina ya ikele kulumusa. Ditombola ve mu ngangu ya beno kibeni. Nk. 133:1; Bing. 3:7; Yes. 5:21; Lom. 15:5; 1 Kol. 1:10; 2 Kol. 13:11; Fili. 2:2; 4:2

¹⁷ Vutula mbi mu mbi kwa muntu ve, kansi banza sambu na mambu mbote nantwala na bantu yonso. Bing. 3:4; 20:22; Mat. 5:38; 2 Kol. 8:21; 1 Tes. 5:15

¹⁸ Kana nge lenda, mu ngolo ya nge yonso, vanda na yenge na bantu yonso. Mal. 9:50; Eb. 12:14

¹⁹ Beno bazolwa, divutula ndinda ve, kansi pesa nzila kwa makasi ya Nzambi kadi yo ikele kusonama: Mfumu tubaka: Mvutulu ya ndinda ikele na mono, mono tavutula. 3 Mose 19:18; 5 Mose 32:35; Eb. 10:30

²⁰ Kansi kana mbeni ya nge ikele na nzala, dikila yandi, kana yandi ikele na kiwini, pesa yandi ya kunwa; kadi bu nge sala mpilayai, nge ikele kutula makala ya tia va ntu ya yandi.

²¹ Bika mbi bedisa nge ve, kansi bedisa mbi na mambu ya mbote.