Loma 10 - Le Nouveau Testament en Kikwango 1950

Mbedoso ya baYuda ikele mambu ya bau

¹ Bampangi, lutondo ya ntima ya mono ye lombilu ya mono kwa Nzambi sambu na Isaeli, ikele na bau tavuluswa.

² Kadi mono tubila bau kitemo, na bau ikele kutula ngolo kwa Nzambi, kansi mu nzailu ve. Bis. 22:3

³ Kadi bu bau konda kuzaba lunungu ya Nzambi, bau sosaka kusikidisa lunungu ya bau kibeni, buna bau lemvukaka ve ku lunungu ya Nzambi. Lom. 9:31; Fili. 3:9

⁴ Kadi Klisto ikele nsuka ya nsiku mu lunungu kwa konsonani ya kwikila. Ngal. 3:24; Eb. 9:28—10:15

⁵ Kadi Mose sonikaka na muntu ya sala lunungu ya ikele ya nsiku tavanda na moyo, sambu na yo.

⁶ Kansi lunungu ya katuka na lukwikilu ikele kutuba mpilayai: Tuba mu ntima ya nge ve: Nani tatomboka ku zulu ? Ikele mpilamosi kulumuna Klisto.

⁷ Keti: Nani takulumuka mu dibulu ya konda nsuka ? Ikele kutombola Klisto tuka bafwa.

⁸ Kansi yo tuba nki ? Mambu ikele mfinama na nge, mu munoko ya nge ye mu ntima ya nge, ikele mambu ya lukwikilu ya beto ikele kusamuna.

⁹ Sambu na kana nge tuba kitemo na munoko ya nge Yesu ikele Mfumu, ye kwikila mu ntima ya nge na Nzambi fulukisaka yandi tuka bafwa, buna nge tavuluswa. Mat. 10:32

¹⁰ Kadi mu ntima muntu ikele kukwikila ku lunungu, kansi mu munoko muntu ikele kutuba kitemo ku mpulusu.

¹¹ Kadi masonukwa tuba: Konsonani ya kwikila mu yandi tamoniswa nsoni ve. Nk. 25:3; 62:5; 91:1

¹² Kadi diswaswana ikele ve na muYuda ye muElene, kadi Mfumu mosi ikele Mfumu ya bau yonso, ye yandi ikele kimvwama kwa bau yonso ya bombidila yandi. Bis. 15:9; Lom. 3:22, 29

¹³ Kadi konsonani ya bombidila nkumbu ya Mfumu tavuluswa.

Bau lenda ve kubuya yau

¹⁴ Mpila nki bau tabombidila yandi ya bau konda kukwikila ? Mpila nki bau takwikila mu yandi ya bau imene kuwa ve ? Mpila nki bau takuwa kana bau konda nsamuni ?

¹⁵ Mpila nki bau tasamuna kana bau fidiswa ve ? Bonso yo ikele kusonama: Makulu ya bau ya twala nsamu mbote ya mambu ya mbote ikele kitoko mingi. Yes. 52:7; Neh 2:1

¹⁶ Kansi bau yonso ndimaka ve kwa nsamu mbote, kadi Yesaya tubaka: Mfumu, nani imene kukwikila nsangu ya beto. Yes. 53:1

¹⁷ Mpilayai, lukwikilu kwiza sambu na kuwa, ye kuwa sambu na mambu ya Klisto.

¹⁸ Kansi mono tuba: Bau kuwaka ve ? Bau kuwaka kieleka. Ndinga ya bau kwendaka mu nsi yonso, ye mambu ya bau ti nsuka ya bansi ya ikele na bantu.

¹⁹ Kansi mono tuba: Isaeli zabaka ve ? Mose tubaka ntete: Mono tatula kimpala nakati na nge ye bau ya ikele kikanda ve, ye mono tasala nge makasi kwa kikanda ya konda ngangu.

²⁰ Yesaya vandaka na kikesa ya ngolo ye tubaka: Mono monwaka kwa bau ya sosaka mono ve, mono monikaka kwa bau ya yuvulaka sambu na mono ve.

²¹ Kansi kwa Isaeli, yandi tubaka: Lumbu yamvimba mono lambulaka maboko ya mono kwa bantu ya kolama ye ya kilau. Yes. 65:2