Loma 1 - Le Nouveau Testament en Kikwango 1950

Luyantiku

¹ Mono Paulu, mpika ya Yesu Klisto, ya bingwa kuvanda ntumwa ye solwa kusamuna nsamu ya mbote ya Nzambi, Bis. 13:2; 1 Kol. 1:1

² Nzambi silaka yai ntete mu bambikudi ya yandi, mu masonukwa ya nlongo

³ yai ikele Mwana ya yandi ya butukaka mu nsuni ya nkuna ya Davidi. Luk. 1:32

⁴ Yandi samunwaka kuvanda Mwana ya Nzambi mu ngolo mu Mpeve ya nlongo sambu na mfulukulu ya yandi tuka bafwa. Yesu Klisto, yandi ikele Mfumu ya beto, Eb. 1:5; 5:5

⁵ Mu yandi beto bakaka nlemvo ye kintumwa, kutwala bansi ya bantu yonso ku lemvuka ya lukwikilu sambu na nkumbu ya yandi. Lom. 12:3; 15:15; 16:26; 1 Kol. 15:10; Ef. 3:8

⁶ Mu bau beno mpe ikele kubingwa kuvanda bantu ya Yesu Klisto, Lom. 9:24

⁷ kwa bau yonso ya ikele mu Loma, bazolwa ya Nzambi, ya bingwa kuvanda banlongo. Kwa beno Nlemvo ye yenge ya katuka na Nzambi, Tata ya beto, ye na Mfumu Yesu Klisto. 2 Tim. 1:9; Ef. 1:1

Paulu zola kwenda kuna Loma

⁸ Ntete mono pesa matondo kwa Nzambi ya mono mu Yesu Klisto sambu na beno yonso, sambu na lukwikilu ya beno ikele kusamunwa mu nsi yamvimba. 1 Kol. 1:4; 1 Tes. 1:2

⁹ Kadi Nzambi ikele ntemo ya mono, ya mono ikele kusadila mu mpeve ya mono, mu nsamu ya mbote ya Mwana ya yandi. Mono bika ve kutuba sambu na beno ntangu yonso mu lombilu ya mono. Ef. 1:15; Fili. 1:3, 8

¹⁰ Mono lomba, ntangu yonso, kana yo ikele luzolo ya Nzambi, mono lenda kwiza kwa beno. Ef. 1:16

¹¹ Kadi mono zola kumona beno, na mono lenda kukabila beno matabisi ya kimpeve, na beno lenda kwiza ngolo, Lom. 15:23, 32

¹² na beto lenda kubombana sikamosi mu lukwikilu ya beto, yai ikele lukwikilu ya beno ye ya mono.

¹³ Bampangi, mono zola ve beno konda kuzaba, na mono zolaka mbala mingi kwiza kwa beno, na mono lenda kubaka mabundu nakati beno mpe, bonso nakati bapaien yankaka, kansi ti ntangu yai nzila kangaka.

¹⁴ Mono ikele nkwa mfuka kwa baElene ye kwa banzenza, kwa banduenga ye kwa banzoba. 1 Kol. 9:16

¹⁵ Mpilamosi ngolo ya ikele mu mono, mono fwiti kusamuna nsamu ya mbote kwa beno mpe ya ikele mu Loma.

¹⁶ Kadi mono ikele na nsoni ve sambu na nsamu ya mbote, kadi yo ikele ngolo ya Nzambi ku mpulusu kwa bau yonso ya kwikila, ntete kwa baYuda nanima kwa ba-Elene mpe, Nk. 40:10; Bis. 13:46; Lom. 2:9; 1 Kol. 1:18; 1:24; 2 Tim. 1:8

¹⁷ kadi mu yina, lunungu ya Nzambi moniswa tuka lukwikilu ku lukwikilu, bonso yo ikele kusonama: Nkwa lunungu tavanda na moyo mu lukwikilu. Lom. 3:21; Eb. 10:38

Nzambi zaikisa tombe ya bapaien

¹⁸ Kadi makasi ya Nzambi monikaka, tuka zulu, kwa bantu yonso ya sala masumu ye konda lunungu ye buya mambu ya kieleka mu konda ya lunungu, Ef. 5:6

¹⁹ kadi mambu ya Nzambi ya zabwa ikele kumonika kwa bantu, kadi Nzambi monisaka yo kwa bau. Bis. 14:17; 17:24

²⁰ Kadi tuka na nsemono ya nsi, mambu ya yandi ya monika ve, ngolo ya yandi ye kinzambi ya yandi ya mvu ya mvu ikele kumonika mu bisalu ya yandi, mpilayai bantu lenda ve dinungisa. Nk. 19:2

²¹ Sambu na bu bau zabaka Nzambi, bau kembilaka yandi ve bonso Nzambi, ye pesaka matondo kwa yandi ve, kansi bau kwizaka nzoba mu mabanza ya bau, ye ntima ya bau ya nzoba kwizaka tombe. Ef. 4:17

²² Bu bau tubaka beto ikele banduenga, bau kwizaka banzoba. Yel. 10:14; 1 Kol. 1:20

²³ Bau pindulaka nkembo ya Nzambi ya konda mbivisu sambu na kiteki ya kifwani ya muntu ya lenda kubivisa, ye ya bandeke, ye ya bambizi ya makulu iya, ye ya banioka ya dibenda. 2 Nt. 17:29; Nk. 106:20; Yes. 40:19; Yel. 2:11; Bis. 17:29

²⁴ Sambu na yai Nzambi pesaka bau mu lutondo ya mbi ya mintima ya bau, ku nsumukunu, na banitu ya bau tavanda na nsoni nakati na bau kibeni.

²⁵ Bau pindulaka mambu ya kieleka ya Nzambi na yau kituka luvunu, bau sambilaka ye sadilaka bima ya semwa kansi Musemi ve, yandi Nkwa lusakumunu mvu ya mvu. Amen. Lom. 9:5; 1 Kol. 11:31

²⁶ Kadi sambu na mambu yai Nzambi pesaka bau kwa zola ya nitu ya nsoni, kadi bankento ya bau sekulaka nsadulu yina ya kimuntu kwa yina ya kondwa kimuntu. 3 Mose 18:23; Ef. 5:11

²⁷ Mpilayina babakala mpe bikaka nsadulu ya bankento ya kimuntu, bau diyokana mu zola ya nsuni, babakala sadilana mambu ya nsoni na babakala, bau bakaka mu bau kibeni lufutu ya luvengumuni ya bau salaka. 3 Mose 18:22

²⁸ Mpilamosi bau buyaka kukeba Nzambi mu mabanza ya bau, buna Nzambi pesaka bau ku mabanza ya mbi ya lenda kupindula ve, sambu na kusala yina ya lunga ve.

²⁹ Bau fuluka na konda ya lunungu yonso, bau sala mambu mbi, bau tonda bima, bau sala nsoki, bau fuluka na kimpala, bau kufwa bantu, ntembe, lukusu, bungubi, bitubatuba, 1 Kol. 6:9; 2 Kol. 12:20; Ngal. 5:19; Ef. 5:3

³⁰ bantu ya tuba mbi sambu na bantu, bambeni kwa Nzambi, bankwa kilau, bankwa lulendo, ya tuba ndinga ya lulendo, bau ya yantika mambu ya mbi, ya kolama kwa tata ye ngudi,

³¹ bau konda ngangu, bau kufwa mambu ya luwawanu, bau konda zola, bau konda nkenda.

³² Bau zaba nsikudukusu ya lunungu ya Nzambi, na bau ya sala mpilayai lunga kufwa, bau sala yau kaka ve, kansi bau ndima na bau ya sala yau.