Kolosai 4 - Le Nouveau Testament en Kikwango 1950

Bombidila mu lombilu ye lombila beto

¹ Bamfumu, pesa kwa bampika ya beno yina ya lunungu ye ya lunga, sambu na beno zaba, beno mpe ikele na Mfumu mu zulu. Ef. 6:9

² Vibidila ye tomatala mu lombilu mu matondo. Luk. 18:1; Bis. 1:14; Lom. 12:12; Ef. 6:18; 1 Tes. 5:17

³ Lomba sambu na beto mpe, na Nzambi lenda kukangudila beto mwelo sambu na mambu, kutuba mambu ya kinsweki ya Klisto, sambu na yo mono ikele kukangwa, Ef. 6:19; 2 Tes. 3:1

⁴ na mono lenda kuzabisa yo, bonso mono fwiti kutuba.

⁵ Tambula mu ngangu nakati na bau ya ikele nanganda, bika ntangu luta mpamba ve. Ef. 5:15; 1 Tes. 4:12

⁶ Bika mambu ya beno vanda na nlemvo ntangu yonso ye zenzulwa na mungwa, na beno lenda kuzaba, bonso beno fwiti kuvutula kwa muntu na muntu. Ef. 4:29

Tikoko ye Onesimo

⁷ Bonso mono ikele, Tikiko tasonga beno, yandi ikele mpangi ya zolwa ye sielo ya kwikama ye sielo sikamosi na mono mu Mfumu.

⁸ Mono fidisaka yandi kwa beno sambu na yai, na beno lenda kuzaba bonso beto ikele, ye na yandi lenda kubomba mintima ya beno, Ef. 6:22; Kolo. 3:25—4:18

⁹ sikamosi na Onesimo mpangi ya kwikama ye ya zolwa, mosi ya beno. Bau tasonga beno mambu yonso ya salwa awa.

Mfidisilu ya mbote

¹⁰ Alistalako muntu ya boloko sikamosi na mono, fidisa beno mbote, ye Malako mpangi ya Banaba, ya beno bakaka nsikudukusu ntete, kana yandi kwiza kwa beno, baka yandi,

¹¹ ye Yesu ya bingwa Yuste. Bayai ikele mu nzengolo, bayai kaka ikele basadi sikamosi na mono ya kimfumu ya Nzambi, bau bombaka mono.

¹² Epafala fidisa beno mbote, yandi ikele mosi ya beno, sielo ya Klisto Yesu, ya tula ngolo mu lombilu sambu na beno ntangu yonso, na beno lenda kutelema ya lunga ye zaba mbote luzolo yonso ya Nzambi.

¹³ Kadi mono ikele kutuba kitemo sambu na yandi, yandi ikele na kisalu mingi sambu na beno, ye sambu na bau ya ikele mu Laodikia, ye sambu na bau ya ikele mu Yelapoli.

¹⁴ Luka, munganga ya zolwa, ye Dema fidisa beno mbote. File. 1:24

¹⁵ Pesa mbote kwa bampangi yai ikele mu Laodikia ye kwa Nimfa ye dibundu ya ikele mu nzo ya bau.

¹⁶ Bu beno tanga nkanda yai nakati na beno, bika yo tangwa mpe mu dibundu ya bisi Laodikia, beno mpe tanga nkanda ya katuka na Laodikia. 1 Tes. 5:16

¹⁷ Tuba kwa Alakipo; Tomatala ku kisielo ya nge bakaka mu Mfumu, na nge manisa yo.

¹⁸ Mono kibeni Paulu na diboko ya mono pesa beno mbote. Beno bambuka tuvambu ya mono. Nlemvo vanda na beno!