Kolosai 3 - Le Nouveau Testament en Kikwango 1950

Sosa bima ya zulu

¹ Mpilayai kana beno fulukiswaka na Klisto, sosa bima ya ikele mu zulu, sika ya Klisto ikele va diboko kibakala ya Nzambi. Nk. 110:1; Fili. 3:20

² Tula mabanza ya beno va bima ya ikele mu zulu, kansi bima ya ntoto ve.

³ Kadi beno kufwaka ye moyo ya beno ikele kuswekwa mu Klisto mu Nzambi.

⁴ Bu Klisto ya ikele moyo ya beno tamonika, beno mpe tamonika sikamosi na yandi mu nkembo. Fili. 3:1; 1 Yoa. 3:2

⁵ Mpilayai kufwa biela ya beno va ntoto, bizumba, nsumukunu, nsatu ya mbi, zola ya mbi, zola ya bima, ya ikele nsambilu ya biteki. Lom. 8:13; Ef. 5:3

⁶ Mambu yai ikele kubasisa makasi ya Nzambi va bana ya kukolama. Lom. 1:18; 1 Kol. 6:9; Ngal. 5:19; Ef. 5:6

⁷ Ntete beno tambulaka mu yau mpe, bu beno vandaka na moyo mu mambu yai. Ngal. 5:19; Ef. 2:3; 4:31

⁸ Ntangu yai beno mpe katula mambu yai yonso: Makasi, kimbeni, nsoki, kutuba mbi, kutuba ya nsoni mu munoko ya beno. Ef. 4:25; 6:3; Yak. 1:21

⁹ Tubana luvunu ve, sambu na beno imene kukatula muntu ya nkulu ye bisalu ya yandi,

¹⁰ ye beno imene kuvwata muntu yampa ya ikele kukitulwa yampa mu nzailu, bonso kifwani ya yandi ya semaka yandi. Lom. 6:4; Ef. 4:24

¹¹ Kuna ikele ve mwisi Elene keti muYuda, nzengolo keti konda nzengolo, nzenza, Nskite, mpika, mpwanza, kansi Klisto ikele yonso ye mu yonso.

Tambula mu zola

¹² Sambu na yai, beno vwata bonso basolwa ya Nzambi, banlongo ye bazolwa, ntima ya nkenda, ye zola, kudikulumusa ye nlembami ye mvibidulu, Ngal. 5:22; Ef. 4:2, 32

¹³ beno vibidilana, ye vidisana masumu, kana muntu ikele na yankaka mambu; bonso Mfumu vidisaka beno, beno sala mpilayai mpe. Mat. 6:14; Mal. 11:25

¹⁴ Kansi va zulu ya mambu 324 yonso, vwata zola, yo ikele kangu ya lunga yonso. Yoa. 15:12; 1 Kol. 13:13; Kolo. 2:2

¹⁵ Yenge ya Klisto ya beno bingwaka mu nitu mosi, bika yo kuyala mu mintima ya beno, ye vanda na matondo. Fili. 4:7; Ef. 4:4

¹⁶ Bika mambu ya Klisto vanda kimvwama mu beno, mu ngangu yonso beno longana ye sembana mu bankunga ye bankunga ya nsikulu ye bankunga ya kimpeve, yimba mu nlemvo kwa Nzambi mu mintima ya beno. 1 Kol. 14:15, 26; Ef. 5:19

¹⁷ Mambu yonso ya beno ikele kusala mu ndinga keti mu kisalu, sala yau yonso mu nkumbu ya Mfumu Yesu, kupesa matondo kwa Nzambi, Tata, mu yandi. 1 Kol. 10:31; Ef. 5:20; 1 Tes. 5:18; Eb. 13:15

Malongi kwa babakala ye bankento, batata ye bampika ye baMfumu

¹⁸ Bankento, lemvuka kwa babakala ya beno bonso ikele kulunga mu Mfumu. Ef. 5:22; 1 Pet. 3:1

¹⁹ Babakala, zola bankento ya beno, vanda na makasi na bau ve. Ef. 5:25; 1 Pet. 3:7

²⁰ Bana, lemvuka kwa batata ye bangudi ya beno mu mambu yonso, kadi yai ikele kuzolakana mu Mfumu. Ef. 6:1

²¹ Batata, pesa bana ya beno makasi ve, na bau takonda kikesa ve. Ef. 6:4

²² Bampika, lemvuka kwa bamfumu ya beno mu nsuni mu mambu yonso, kaka ve mu bisalu ya bau ikele kutala, na bantu tazola beno, kansi mu luzolo ya ntima beno vumina Mfumu. Ef. 6:5; 1 Tim. 6:1; Tit. 2:9; 1 Pet. 2:18

²³ Mambu yonso ya beno sala, sala yo mu zola ya ntima, bonso kwa Mfumu kansi kwa bantu ve. Ef. 6:7

²⁴ Sambu na beno zaba beno tabaka nsendo ya difwa tuka Mfumu. Beno sadila Mfumu Klisto.

²⁵ Kadi yandi ya sala mambu ya mbi, tabaka mambu ya mbi diaka ya yandi salaka, ye Mfumu ikele kutala luse ya muntu ve. Lom. 2:11; 1 Pet. 1:17