Kolosai 2 - Le Nouveau Testament en Kikwango 1950

Ndongisilu sambu na banlongi ya luvunu

¹ Kadi mono zola beno kuzaba bonso mono kunwanaka nwana ya ngolo sambu na beno ye bau ye ikele mu Laodikia ye bau ya imene kumona ve luse ya mono mu nsuni, Kolo. 4:13

² na ntima ya bau lenda kubombwa, bu bau bundanaka mu zola ye kwa kimvwama yonso ya nzailu ya lunga, na bau lenda kuzaba mambu ya kinsweki ya Nzambi, ikele Klisto, Yoa. 17:3; Kolo. 1:27

³ mu yandi swekaka balundulu yonso ya ngangu ye nzailu.

⁴ Mono tuba yai, na muntu lenda kukusa beno ve mu ndinga ya mbote.

⁵ Kadi kana mono ikele na beno ve mu nsuni, mono ikele na beno mu mpeve; mono ikele kuyangalala ye kumona bifu ya beno ya mbote ye kikesa ya lukwikilu ya beno mu Klisto. 1 Kol. 5:3

⁶ Mpilamosi beno bakaka Klisto Yesu Mfumu; beno tambula mu yandi,

⁷ tulwa mianzi, ye tungwa mu yandi, ye vanda ngolo mu lukwikilu ya beno, bonso beno longwaka, kukula mu kupesa ya matondo. Ef. 2:21; 3:17

⁸ Dikeba na muntu bwila beno ve mu malongi ya mpamba ya luvunu, ya ikele nsiku ya nkulu ya bantu ye mabanza ya kinleke ya nsi, ya ikele ve ya Klisto, Mat. 15:2; Lom. 16:17; Ngal. 4:9; Eb. 13:9

⁹ kadi mu yandi ikele kuvanda mfulusu yonso ya kiNzambi mu nitu. Kolo. 1:19

¹⁰ Beno imene kufuluka mu yandi, yandi ikele ntu ya bikuluntu yonso ye bankwa ngolo. Ef. 1:21

¹¹ Mu yandi beno zengwa mpe nzengolo ya konda kusalwa na maboko, mu kukatulwa ya nitu ya nsuni mu nzengolo ya Klisto,

¹² sambu na beno zikwaka na yandi mu mbotika, beno fulukiswaka na yandi mu lukwikilu mu ngolo ya Nzambi ya fulukisaka yandi tuka bafwa. Lom. 6:4; Ef. 1:9; Kolo. 3:1

¹³ Beno mpe bu beno kufwaka mu ntulumunu ya beno ye mu konda nzengolo ya nsuni ya beno, yandi pesaka beno moyo sikamosi na yandi, bu yandi vidisaka beno kufwa nsiku yonso. Ef. 2:1; 5:11

¹⁴ Yandi imene kukatula bisono ya bansiku ya kangaka beto ye ya kanikinaka beto, yandi katulaka yo ye komaka yo va kulunsi.

¹⁵ Bu yandi katulaka binwaninu yonso ya bakuluntu ye bankwa ngolo, yandi songaka bau nantwala ya bantu yonso, yandi dikembilaka sambu na bau.

Vibidila mu lukwikilu kansi mu nsiku ya bantu ve

¹⁶ Sambu na yai bika muntu kufundisa beno ve mu kudia keti mu kunwa keti mu mambu ya kilumbu ya fete keti mu kumonika ya ngonda yampa keti mu kilumbu ya Luvundu, Lom. 14:2; Ngal. 4:10

¹⁷ bima yina yonso ikele kini ya yina ya takwiza, kansi nitu kibeni ikele ya Klisto. Eb. 8:5; 10:1

¹⁸ Bika muntu kuyiba ve nsendo ya beno ya kununga mu kudikulumusa ya luvunu ye kusambila ya banjo, bu yandi ikele kuyindula mona meso ya yandi kibeni monaka, ye kudiyana mu mabanza ya yandi ya kinsuni, Mat. 24:4; 1 Yoa. 4:1

¹⁹ bu bau konda kubundana na ntu, mu yandi nitu yamvimba ikele kukanga mu madikulu ye mianzi, ye ikele kukula mu kukula ya Nzambi.

²⁰ Kana beno kufwaka sikamosi na Klisto tuka mabanza ya kinleke ya nsi, sambu na nki beno dipesa ku bansiku, bonso beno ikele na moyo mu nsi:

²¹ Kusimba ve, kumeka ve, kuvalakana ve! 3 Mose 5:2

²² Mambu yai yonso takufwa bu bau kusala na yo, bonso ikele bansiku ye malongi ya bantu.

²³ Mu kieleka yau ikele kumonika bonso ngangu mu nsambilu ya luzolo ya bau kibeni, ye mu kudikulumusa, ye kumoniswa mpasi ya nitu; kansi yau ikele na mfunu ve kukanga luzolo ya nsuni.