Kolosai 1 - Le Nouveau Testament en Kikwango 1950

Luyantiku

¹ Paulu, ntumwa ya Klisto Yesu mu luzolo ya Nzambi, ye Timoteo mpangi ya beto,

² Pidisa mbote kwa banlongo ye bampangi ya kwikama mu Klisto ya ikele mu Kolosai. Nlemvo kwa beno ye yenge tuka Nzambi, Tata ya beto.

Matondo kwa Nzambi na lukwikilu ye zola ya baKolosai

³ Beto pesa matondo kwa Nzambi, Tata ya Mfumu ya beto Yesu Klisto ntangu yonso, bu beto lomba sambu na beno, Fili. 1:3

⁴ bu beto kuwaka sambu na lukwikilu ya beno mu Klisto Yesu ye zola ya ikele na beno kwa banlongo yonso,

⁵ sambu na vuvu ya ikele kulundilwa beno mu mazulu, ya beno kuwaka ntete mu kieleka ya nsamu mbote.

⁶ Mambu yai kwizaka kwa beno bonso yau ikele mpe mu nsi yamvimba, yau ikele kubuta mabundu ye kwiza mingi bonso mu beno mpe, tuka kilumbu yina ya beno kuwaka ye kuzabaka nlemvo ya Nzambi mu kieleka, Mal. 4:8; Bis. 6:7

⁷ bonso beno longukaka na Epafala, mpika ya zolwa sikamosi na mono, ya ikele sielo ya Klisto ya kwikama sambu na beno.

⁸ Yandi zabisaka beto mpe zola ya beno mu Mpeve.

Paulu lombila bau

⁹ Sambu na yai, tuka kilumbu yina ya beto kuwaka yo, beto bika ve kulomba ye bombidila sambu na beno, na beno lenda kufuluka na nzailu ya luzolo ya yandi mu ngangu yonso ya kimpeve ye kuzaba yonso, Ef. 1:8, 15; 5:10, 17; Fili. 1:9

¹⁰ kutambula ya lunga mu Mfumu mu zolakana yonso, kubuta mabundu mu kisalu yonso ya mbote ye kukula mu nzailu ya Nzambi. Ngal. 5:22; Ef. 4:1; Fili. 1:27; 1 Tes. 2:12; 4:1

¹¹ Sambu na ngolo ye nkembo ya yandi beno tasiamiswa mu ngolo yonso, mu kwikama ye mvibudulu mu mambu yonso.

¹² Mu kiese beno pesa matondo kwa Tata ya lungisaka beto kuvanda kintuadi mu difwa ya banlongo mu mwini. Bis. 26:18

¹³ Yandi vulusaka beto tuka ngolo ya tombe ye kitulaka beto mu kimfumu ya Mwana ya yandi ya zolwa. 1 Pet. 2:9

¹⁴ Mu yandi beto ikele na nkudulu, mvidusu ya masumu ya beto. Ef. 1:7

¹⁵ Yandi ikele kifwani ya Nzambi ya monwa ve, yandi ikele mwana ya mbuta mu bima yonso ya semwa. 2 Kol. 4:4; Eb. 1:3

Bifu ya Klisto

¹⁶ Kadi mu yandi, yonso semwaka mu mazulu ye va ntoto, bima ya monika ye bima ya konda kumonika, keti bakiti ya nkembo keti bimfumu keti bikuluntu keti bankwa ngolo; bima yonso semwaka mu yandi ye kwa yandi. Yoa. 1:3; 1 Kol. 8:6; Ef. 1:21; Eb. 1:2; 1 Pet. 3:22

¹⁷ Yandi ikele ya ntete ya bima yonso, bima yonso ikele kukangwa mu yandi.

¹⁸ Yandi ikele ntu ya nitu, nitu ikele dibundu, yandi ikele luyantiku, mwana ya mbuta tuka bafwa, na yandi lenda kuvanda ya ntete yonso mu mambu yonso. Bis. 26:23; 1 Kol. 15:20, 23; Ef. 1:22

¹⁹ Kadi yo vandaka nzolakani ya Nzambi na mfulusu yonso tavanda mu yandi.

²⁰ Nzambi zolaka mu yandi kudivutudila bima yonso, keti bima va ntoto keti bima mu mazulu, bu yandi sadilaka yenge mu menga ya kulunsi ya yandi. Lom. 5:10; 2 Kol. 5:18; Ef. 1:10; 2:16

²¹ Beno mpe vandaka ntete nanganda, beno vandaka bambeni mu mabanza ya beno mu bisalu ya mbi ya beno, kansi ntangu yai yandi vutulaka beno 2 Kol. 5:18; Ef. 2:12, 16

²² mu nitu ya nsuni ya yandi mu lufwa, sambu na kutula beno banlongo ye konda kieta ye konda kusemba nantwala na yandi kibeni, Ef. 5:27

²³ kana beno vanda mu lukwikilu ya lunga ye vanda ngolo ya konda kukatulwa mu vuvu ya nsamu mbote ya beno kuwaka, ya samunwaka mu nsemono yonso nansi ya zulu, mu yo, mono Paulu kitulwa sielo. Lom. 10:18; Ef. 3:7

Kiese ya Paulu mu kisalu ye mu bampasi ya yandi

²⁴ Ntangu yai mono ikele kuyangalala mu bampasi ya mono sambu na beno ye mono ikele kulungisa mu nsuni ya mono yina ya konda mu mpasi ya Klisto sambu na nitu ya yandi ya ikele dibundu. 2 Kol. 1:5; 4:10; Ef. 3:13; Fili. 1:29; 2:17

²⁵ Mu yai mono kitulwaka sielo, mpilamosi ikele kinlundi ya Nzambi, ya mono peswaka sambu na beno, kulungisa mambu ya Nzambi, Ef. 3:2

²⁶ ikele mambu ya kinsweki ya swekaka tuka luyantiku ya bantangu ye bambandu, kansi ntangu yai yo monikaka kwa banlongo ya vandi Mat. 13:11; Lom. 16:25; 1 Kol. 2:7; Ef. 1:9; 3:9

²⁷ Nzambi zolaka kuzabisa kwa bau bonso ikele kimvwama ya nkembo ya mambu ya kinsweki yai nakati bapaien, yo ikele Klisto mu beno, vuvu ya nkembo. Lom. 9:23; Ef. 1:18; 3:8

²⁸ Beto ikele kusamuna yandi bu beto ikele kusemba bantu yonso ye kulonga bantu yonso mu ngangu yonso, na beto lenda kutula bantu ya lunga mu Klisto. 2 Kol. 11:2

²⁹ Sambu na yai mono sala mpe ye nwanina bonso kisalu ya yandi ya ikele kusala ngolo mu mono. 1 Kol. 15:10; 1 Tim. 4:10