Filipi 4 - Le Nouveau Testament en Kikwango 1950

Vebidila ye vanda na yenge ye na kiese ye na bifu ya mbote

¹ Mpilayai bampangi ya mono ya zolwa, ya mono zola kumona, beno ikele kiese ya mono ye koloa ya mono, sambu na yai telema ngolo mu Mfumu bazolwa ya mono. Fili. 1:3; 1 Tes. 2:19

² Mono bombidila Evodia, ye mono bombidila Sintike kuvanda na ntima mosi mu Mfumu.

³ Ye nge mpe, kintuadi ya kieleka, mono lomba nge kusadisa bankento yina ya salaka na mono mu nsamu mbote ye Kleme ye basadi yankaka sikamosi na mono, bankumbu ya bau sonikwa mu nkanda ya moyo. Nzai. 20:15

⁴ Beno yangalala ntangu yonso mu Mfumu, diaka mono tuba; Yangalala. Fili. 2:18; 3:1; 1 Tes. 5:16

⁵ Bika nlembami ya beno zabakana kwa bantu yonso. Mfumu ikele mfinama.

⁶ Beno vanda na mabanza mu mambu ve, kansi mambu yonso bika nsatu ya beno zabakana kwa Nzambi mu lombilu ye mbombodolo ye mu matondo. Nk. 55:22; Mat. 6:25; 1 Pet. 5:7

⁷ Ye yenge ya Nzambi ya luta ngangu yonso takeba mintima ya beno ye mabanza ya beno mu Klisto Yesu. Yoa. 14:27

⁸ Mpilayai bampangi, konso mambu ya ikele kieleka, konso mambu ya ikele na luzitu, konso mambu ya ikele lunungu, konso mambu ya ikele vedila, konso mambu ya ikele ya zolwa, konso mambu ya ikele na nsangu mbote, kana bifu ya mbote ikele, kana nsikulu ikele, beno banza mambu yina.

⁹ Mambu ya beno longukaka ye bakaka ye kuwaka ye monaka mu mono, beno sadila yau, ye Nzambi ya yenge tavanda na beno. Lom. 5:3; 2 Kol. 13:11; Fili. 3:17; 1 Tes. 3:3

Paulu pesa bau matondo sambu na lusadusu ya bau fidisaka yandi

¹⁰ Mono yangalala mingi mu Mfumu sambu na ntangu yai beno bambuka mono diaka. Beno bambukaka mono ntete, kansi beno bakaka nzila ve kusala mambu.

¹¹ Mono tuba ve na mono kondaka kima, kadi mono imene kulonguka kuvanda na kiese mu mambu yonso ya ikele na mono.

¹² Mono zaba kuwa nsoni, mono zaba kuvanda na bima mingi mpe, mu bima yonso ye mambu yonso mono imene kulonguka mambu ya kinsweki kuyukuta ye kuvanda na nzala, kuvanda na bima ye kukonda bima,

¹³ Mono lenda kusala mambu yonso mu yandi ya ikele kusiamisa mono. 1 Tim. 1:12; 2 Tim. 2:1

¹⁴ Kansi beno salaka mbote bu beno vandaka kintuadi mu mpasi ya mono.

¹⁵ Ntangu yai beno bisi Filipi beno kibeni mpe zaba, mu luyantiku ya nsamu mbote, bu mono bikaka Makedonia, dibundu vandaka ve na kintuadi na mono mu mambu ya pesa ye baka, kansi beno kaka.

¹⁶ Kadi mu Tesalonika mpe beno fidisaka mono lusadusu mbala ya ntete ye mbala ya zole mpe sambu na nsatu ya mono.

¹⁷ Mono sosa matabisi ve, kansi mono sosa mabundu mingi kwiza kwa beno.

¹⁸ Mono ikele na bima yonso ye bima ya lunga, mono imene kufuluka, bu mono bakaka bima na Epafolodito ya beno fidisaka mono, nsunga mbote, nkailu ya zikwa ya lunga ye zolakana kwa Nzambi. Ef. 5:2; Eb. 13:16

¹⁹ Nzambi ya mono talungisa nsatu yonso ya beno, bonso ikele kimvwama ya yandi mu nkembo mu Klisto Yesu.

²⁰ Ntangu yai kwa Nzambi ye Tata ya beto, nkembo mvu ya mvu. Amen. Lom. 11:36; 16:27; Ef. 3:21

Mfidisulu ya mbote

²¹ Beno pesa mbote kwa banlogo yonso mu Klisto Yesu. Bampangi ya ikele na mono fidisa beno mbote.

²² Banlongo yonso fidisa beno mbote, kansi bau ya nzo ya Kaisaila luta.

²³ Bika nlemvo ya Mfumu Yesu Klisto vanda na mpeve ya beno. Ngal. 6:18; 2 Tim. 4:22; File. 5