Filipi 3 - Le Nouveau Testament en Kikwango 1950

Ndongisilu sambu na banlongi ya luvunu

¹ Mpilayai bampangi ya mono, yangalala mu Mfumu. Kusonika mambu mutindu mosi kwa beno ikele mpasi kwa mono ve, kansi ikele kusadisa beno mbote. 2 Kol. 13:11; Fili. 4:4; 1 Tes. 5:16

² Beno dikeba sambu na bambwa; dikeba sambu na basadi ya mbi, dikeba sambu na bazengi. 2 Kol. 11:13

³ Kadi beto ikele ya nzengolo, ya sambila mu Mpeve ya Nzambi ye yana mu Klisto Yesu ye tula vuvu ve mu nsuni. 5 Mose 10:16; Yoa. 4:23; Lom. 2:29

⁴ Mono lenda kutula vuvu mu nsuni mpe. Kana muntu yankaka banza yandi lenda kutula vuvu mu nsuni, mono ya luta, 2 Kol. 11:21

⁵ mono zengwaka na kilumbu ya nana, muntu ya Isaeli mu kikanda ya Benjamini, Ebeleo mu baEbeleo, mu nsiku mono ikele mufalisi, 1 Mose 17:17; Bis. 22:3; Lom. 11:1; 2 Kol. 11:22

⁶ mu kutula ngolo, mono zomaka dibundu, mu mambu ya lunungu ya ikele mu nsiku, mono konda kusembwa. Bis. 8:3; 9:1; Ngal. 1:13

⁷ Kansi mambu ya vandaka ndandu kya mono, mono ikele kutanga yo bonso mvidusu sambu na Klisto.

⁸ Kieleka, mono ikele kutanga mambu yonso bonso mvidusu sambu na nzailu ya luta mbote ya Klisto Yesu, Mfumu ya mono, sambu na yandi mono vidisaka mambu yonso, mono ikele kutanga yo bonso kima ya sumuka na mono lenda kubaka Klisto ndandu,

⁹ ye monika mu yandi, na lunungu ya mono kibeni ve, ya ikele mu nsiku, kansi yina ya ikele mu lukwikilu mu Klisto, ikele lunungu tuka Nzambi mu lukwikilu, Lom. 1:17; 3:21; 10:3; Ngal. 2:16

¹⁰ na mono lenda kuzaba yandi ye ngolo ya mfulukulu ya yandi ye kintuadi ya mpasi ya yandi, ye kuvanda mpilamosi yandi mu lufwa ya yandi,

¹¹ buna kana mono lenda, mono takuma ku mfulukulu ya bafwa.

Paulu teza Ntinu sambu na yandi nunga

¹² Ikele ve na mono imene kubaka keti imene kulunga yonso, kansi mono ikele kutula ngolo kubaka yo, kadi Klisto Yesu bakaka mono kibeni sambu na yo.

¹³ Bampangi, mono ditanga ve bonso mono imene kubaka yo, kansi mambu mosi mono sala, mono vila mambu ya ikele nanima ye tala ku mambu ya ikele nantwala.

¹⁴ Mono tula ngolo kukuma na kitezo ya nsendo ya nunga ya mbokolo ya zulu ya Nzambi mu Klisto Yesu. 1 Kol. 9:24; 2 Tim. 4:7

¹⁵ Mpilayai, bika beto yonso ya lunga, vanda na mabanza mosi. Kana mu mambu yankaka beno ikele na mabanza yankaka, buna Nzambi tazabisa beno yai mpe.

¹⁶ Kansi bika beto tambula mu nsiku yai ya beto kumaka na yo.

Yandi songa bau kulanda yandi

¹⁷ Bampangi, vanda kintuadi mu kulanda ya mono, beno tomatala bau ya ikele kutambula bonso beto, sambu na beno ikele na kifwani mu beto. 1 Kol. 4:16; 11:1; Fili. 4:9; 1 Tes. 1:6; 2 Tes. 3:9

¹⁸ Kadi mingi ikele kutambula, ya mono tubaka kwa beno ntete mbala mingi sambu na bau, ye ntangu yai mono tuba kwa beno mu mansanga ya meso, bau ikele bambeni ya kulunsi ya Klisto.

¹⁹ Nsuka ya bau ikele lufwa, nzambi ya bau ikele divumu, nkembo ya bau ikele mu mambu ya nsoni ya bau, mabanza ya bau ikele mu bima ya ntoto.

²⁰ Kadi kisi ya beto ikele mu zulu, tuka kuna beto ikele kuvingila Mvulusi, ikele Mfumu Yesu Klisto. 1 Kol. 1:7; Ef. 2:6; Kolo. 3:3; 1 Tes. 1:10; Eb. 13:14

²¹ Yandi takitula yampa nitu ya beto ya kulumuswa na yo tavanda mpilamosi nitu ya yandi ya nkembo, bonso ikele nsadulu ya ngolo ya yandi, mu yo yandi lenda kulemvula bima yonso. 1 Kol. 15:35; 1 Yoa. 3:2