Filipi 2 - Le Nouveau Testament en Kikwango 1950

Vanda na yenge ye fwana Klisto

¹ Mpilayai, kana mbombodolo ikele mu Klisto, kana mbombolo ya zola, kana kintuadi ya Mpeve, kana nzolakani, kana nkenda,

² buna beno lungisa kiese ya mono, ye beno vanda na mabanza mosi, bu beno ikele na zola mutindu mosi ye kintuadi ye mabanza mosi Nk. 133:1; Lom. 12:16; 15:5; 1 Kol. 1:10; Fili. 3:16; 4:2

³ beno sala mambu ve mu ntembe keti mu nkembolo ya mpamba, kansi mu kudikulumusa, bika muntu na muntu banza yandi kibeni ikele fioti ye bankaka luta nene. Loma 12:10; 1 Pet. 5:5; Ef. 5:21

⁴ Muntu na muntu banza ve sambu na mambu ya yandi kibeni kansi ya bankaka mpe. 1 Kol. 10:24

⁵ Beno vanda na mabanza mu beno, ya vandaka mu Klisto Yesu. 1 Pet. 2:21; 1 Yoa. 2:6

⁶ Yandi vandaka mu nitu ya Nzambi, kansi banzaka yo ikele kima ya kukeba ve, kuvanda mutindu mosi na Nzambi, Yoa. 1:1; 17:5; 2 Kol. 4:4; Kolo. 1:15; Eb. 1:3

⁷ kansi yandi kitukaka mpamba, kubaka nitu ya mpika, bu yandi kitulwaka mu kifwani ya muntu. Mat. 20:28; Lom. 15:3; 2 Kol. 8:9; Ngal. 4:4

⁸ Yandi monwaka mu kifwani bonso muntu, yandi dikulumusaka ye lemvukaka ti lufwa, e, ikele lufwa ya kulunsi. Mat. 26:42; Yoa. 10:17; Eb. 2:9; 5:8; 12:2

⁹ Mpilayai mpe Nzambi tombolaka yandi mingi, ye pesaka yandi nkumbu ya luta bankumbu yonso, Nk. 110:1; Yoa. 17:1; Bis. 2:33; Ef. 1:20; Lom. 3:17; 2 Tim. 2:12; Eb. 2:9

¹⁰ buna makungunu yonso tafukama mu nkumbu ya Yesu, bau ya ikele mu zulu ye bau ya ikele va ntoto, Yes. 45:23; Lom. 14:11

¹¹ tudimi yonso tatuba kitemo, Yesu Klisto ikele Mfumu, ku nkembo ya Nzambi, Tata. Bis. 2:36

Sosa sambu na mpulusu ye tambula mbote

¹² Mpilayai, bazolwa ya mono, bonso beno lemvukaka ntangu yonso, kaka ve, bu mono ikele nakati na beno. Kansi ntangu yai beno luta kusala mpilayai, bu mono ikele ve, beno sala sambu na mpulusu ya beno mu boma ye zakama.

¹³ Kadi Nzambi ikele kusala mu beno, luzolo ye bisalu, bonso luzolo ya yandi ya mbote. 2 Kol. 3:5; Eb. 13:21

¹⁴ Beno sala mambu yonso mu konda kubamina ye ntembe,

¹⁵ na beno lenda kukonda lusembo ye nsumukunu, ye vanda bana ya Nzambi ya konda kieta nakati na mbandu ya mbi ye ntu ngolo, nakati ya bau beno ikele kumonika bonso mwini mu nsi. 5 Mose 32:5; Mat. 5:14; Ef. 5:8

¹⁶ Nangula mambu ya moyo, na mono lenda kuyana mu kilumbu ya Klisto, na mono tezaka ntinu mpamba ve ye salaka mpamba ve. Yes. 49:4; 2 Kol. 1:14; 1 Tes. 2:19

¹⁷ Kansi kana moyo ya mono tatulwa bonso nkailu ya zikwa sambu na lukwikilu ya beno, mono ikele na kiese ye yangalala sikamosi na beno yonso. 1 Tes. 2:8; 2 Tim. 4:6

¹⁸ Ikele mpilayai beno mpe vanda na kiese ye yangalala sikamosi na mono.

Paulu silaka na fidisa Timoteo kwa bau

¹⁹ Mono tula vuvu mu Mfumu Yesu kana ntama ve mono tafidisa Timoteo kwa beno, na mono lenda kumona kiese bu mono zaba mambu ya beno.

²⁰ Kadi mono ikele na muntu yankaka ve ya ikele na mabanza mpilamosi yandi, ya tavanda na mabanza ya kieleka sambu na beno.

²¹ Kadi bau yonso ikele kusosa mambu ya bau mosi, kansi mambu ya Klisto Yesu ve. 1 Kol. 10:24; 13:5

²² Kansi beno zaba kwikama ya yandi, bu yandi salaka sikamosi na mono kumwangisa nsamu mbote bonso mwana ikele kusadila tata ya yandi.

²³ Mpilayai mono tulaka vuvu kufidisa yandi ntama ve, bu mono zaba mpilamosi yo tavanda na mono.

²⁴ Kansi mono ikele na vuvu mu Mfumu, ntama ve mono kibeni takwiza mpe.

Epafolodito fidiswa kwa bau

²⁵ Kansi mono banzaka yo lunga kufidisa Epafolodito kwa beno, mpangi ya mono ye sielo sikamosi na mono ye soldat sikamosi na mono, kansi ntumwa ya beno ye sielo mu nsatu ya mono.

²⁶ Yandi tondaka mingi kutala beno yonso ye yandi vandaka na ntantu sambu na beno kuwaka yandi vandaka na maladi.

²⁷ Kadi kieleka yandi vandaka mfinama kulufwa, kansi Nzambi kuwilaka yandi nkenda, yandi kaka ve kansi mono mpe, na mono tabaka ntantu ve va zulu na ntantu.

²⁸ Mpilayai mono tulaka ngolo kufidisa yandi, buna bu beno mona yandi, beno lenda kuyangalala ye ntantu ya mono lenda kulumuka.

²⁹ Beno baka yandi mu Mfumu mu kiese yonso, ye pesa bau ya mpilayai luzitu;

³⁰ kadi sambu na kisalu ya Klisto yandi vandaka, mfinama kulufwa, bu yandi pesaka moyo ya yandi kulungisa yina ya konda mu kisielo ya beno kwo mono. 1 Kol. 16:17