Filemoni 1 - Le Nouveau Testament en Kikwango 1950

Paulu ye Timoteo fidisa Filemoni mbote

¹ Paulu, muntu ya boloko ya Klisto Yesu, ye Timoteo, mpangi ya beto, kwa Filemoni ya zolwa, ye musadi sikamosi na beto,

² ye kwa Apia, mpangi nkento ya beto, ye kwa Alakipo, soldat sikamosi na beto, ye kwa dibundu mu nzo ya nge.

³ Nlemvo vanda na beno, ye yenge tuka Nzambi Tata ya beto, ye Mfumu Yesu Klisto. Lom. 1:7

⁴ Mono pesa matondo kwa Nzambi ya mono ntangu yonso, bu mono bambuka nge mu lombilu ya mono. Lom. 1:8; 1 Kol. 1:4; Fili. 1:3; Kolo. 1:3

⁵ Mono imene kuwa nsangu ya zola ya nge, ye lukwikilu ya ikele mu nge kwa Mfumu Yesu ye kwa banlongo yonso. Kolo. 1:4

⁶ Na kintuadi ya lukwikilu ya ikele na beto ye nge lenda kusadisa kuzabisa mambu ya mbote yonso ya ikele na beto mu Klisto.

⁷ Kadi mono bakaka kiese mingi ye mbombolo mu zola ya nge, sambu na mintima ya banlongo imene kubaka kiese sambu na nge, mpangi. 2 Kol. 7:4

⁸ Kansi bu mono ikele na kikesa yonso mu Klisto kusikidikisa nge mambu ya lunga,

⁹ kansi sambu na mono zola nge, mono bombidila nge; sambu na mono ikele Paulu, muntu ya nuna, ye ntangu yai, mono ikele mpe muntu ya boloko ya Klisto Yesu.

¹⁰ Mono bombidila nge sambu na mwana ya mono Onesimo, ya mono imene kubuta mu mambu ya Nzambi mu minyololo ya mono, 1 Kol. 4:15; Kolo. 4:9

¹¹ ntete yandi sadilaka nge mbote ve, kansi ntangu yai, yandi zaba kusadila nge ye mono mbote.

¹² Mono imene kuvutula yandi kwa nge, yandi ikele mpilamosi ntima ya mono kibeni.

¹³ Mono zolaka mingi yandi kubika awa na mono, kusadila mono mu sika ya nge, mu minyololo ya nsamu mbote,

¹⁴ kansi mono zola ve kusala mambu bu mono imene kuyuvula nge ve, mpilayai mambu ya mbote ya nge tavanda mu ngolo ve, kansi mu luzolo ya nge.

¹⁵ Kadi kana yandi katulwaka na nge ntangu fioti, na nge lenda kuvanda na yandi mvu ya mvu,

¹⁶ yandi vutuka kwa nge bonso mpika ve, kansi ya luta mpika mbote, ikele mpangi ya zolwa, ya zolwa mingi kwa mono, kansi ya luta zolwa kwa nge, mu nsuni ye mu Mfumu, 1 Tim. 6:2

¹⁷ Kana nge tanga mono bonso mpangi ya nge, baka yandi mpilamosi mono.

¹⁸ Kansi kana yandi imene kusadila nge mbi, keti kana yandi ikele na mfuka kwa nge, sonika yau bonso mfuka ya mono.

¹⁹ Mono Paulu ya sonika yai na diboko ya mono tafuta yau, kansi mono tuba kwa nge ve, na nge ikele na mfuka kwa mono, ikele moyo ya nge kibeni. 2 Tes. 3:17

²⁰ E, mpangi, bika mono vanda na kiese sambu na nge mu Mfumu, tula kiese mu ntima ya mono mu Klisto.

²¹ Sambu na mono ikele na vuvu mu kulemvuka ya nge, mono sonika kwa nge, sambu na mono zaba nge tasala ya luta yai ya mono tuba kwa nge.

²² Kansi yidikila mono sika ya kulala mpe, kadi mono tula vuvu kumona nge, sambu na lombilu ya nge.

²³ Epafala, muntu ya boloko sikamosi na mono mu Klisto Yesu, fidisa nge mbote. Kolo. 1:7

²⁴ ye Malako, ye Alisatalako, ye Dema, ye Luka, basadi sikamosi na mono.

²⁵ Nlemvo ya Mfumu ya beto Yesu Klisto vanda na mpeve ya beno. Amen.