Efeso 6 - Le Nouveau Testament en Kikwango 1950

Malongi kwa bana ye batata

¹ Beno bana, lemvuka kwa batata ye bangudi ya beno mu Mfumu, kadi mpilayai ikele ya lunga. Kolo. 2:20

² Zitisa tata ya nge ye ngudi ya nge, yai ikele nsikudukusu ya ntete ya ikele na nsilulu. 2 Mose 20:12; 5 Mose 5:16

³ Na mambu tavanda mbote na nge, ye nge tazinga ntangu mingi va ntoto.

⁴ Beno batata, pesa bana ya beno makasi ve, kansi sansa bau mu kupesa ndongi ye lusembo ya Mfumu. Kolo. 3:21; 5 Mose 6:7, 20; Bing. 29:17

Kwa bampika ye bamtumu

⁵ Beno bampika, lemvuka kwa bamfumu ya beno ya nsuni mu vumi ye zakama mu ntima mosi bonso kwa Klisto. Kolo. 3:22; 1 Tim. 6:1; Tit. 2:9

⁶ Ikele mu bisalu kaka ve, bonso beno yangidisa bantu, kansi bonso bampika ya Klisto, beno sala luzolo ya Nzambi mu ntima ya mbote. Kolo. 2:22

⁷ Beno sadila bau mu luzolo ya mbote bonso kwa Mfumu ye kwa bantu ve.

⁸ Bu beno zaba, konso kima ya mbote ya muntu na muntu sala, yandi tabaka yo diaka na Mfumu, kana yandi ikele mpika keti mpwanza.

⁹ Beno bamfumu sala mutindu mosi kwa bau, beno tuba ndinga makasi kwa bau ve, sambu na beno zaba, Mfumu ya beno ye bau ikele na zulu ye yandi ikele kutala luse ya muntu ve. Bis. 10:34; Lom. 2:11; Kolo. 4:1; 3:25; Yak. 2:1

Binwaninu ya Nzambi

¹⁰ Mpilayai beno siamiswa mu Mfumu ye mu kikesa ya ngolo ya yandi.

¹¹ Beno vwata binwaninu yonso ya Nzambi, na beno lenda kutelemina mayele ya diable. Yes. 59:17; 1 Tes. 5:8

¹² Kadi kunwana ya beto ikele na menga ye nsuni ve, kansi na bakuluntu ye bankwa ngolo ye banyadi ya nsi yai ya tombe, ye bampeve mbi mu sika ya zulu.

¹³ Mpilayai beno, vwata binwaninu yonso ya Nzambi, na beno lenda kutelema ngolo mu kilumbu ya mbi, ye bu beno imene kununga, telema ngolo. 2 Kol. 10:4

¹⁴ Sambu na yai beno telema, beno kanga kieleka va tuketo ya beno ye vwata nkaku ya lunungu ya ntulu, 1 Tes. 5:8

¹⁵ ye vwata na makulu ya beno yidika ya nsamu mbote ya yenge.

¹⁶ Na zulu na yai yonso baka nkaku ya lukwikilu, na beno lenda kuzima na yo batolo-tolo ya tiya yonso ya nkwa mbi.

¹⁷ Ye baka nkaku ya ntu ya mpulusu ye mbele ya Mpeve, ya ikele mambu ya Nzambi, Eb. 4:12

¹⁸ mu lombilu yonso ye mu mbombodolo beno lomba ntangu yonso mu Mpeve, mu mambu yai beno tomatala mu mvibudilu yonso ye mu mbombodolo sambu na banlongo yonso, Luk. 18:1; Lom. 12:12

¹⁹ ye sambu na mono mpe, na bu mono kangula munoko ya mono, mono lenda kupeswa mambu kuzabisa mu kikesa mambu ya kinsweki ya nsamu mbote, Bis. 4:29; Kolo. 4:3; 2 Tes. 3:1

²⁰ sambu na yo mono ikele ntumwa mu minyololo, na mu yo mono lenda kutuba na kikesa, bonso mono fwiti kutuba.

Kufidisa ya Tikiko

²¹ Kansi na beno lenda kuzaba mambu ya mono ye mpilamosi mono ikele, Tikiko mpangi ya zolwa ye sielo ya kwikama mu Mfumu, tazabisa beno mambu yonso.

²² Sambu na mambu yai mono fidisaka yandi kwa beno, na beno lenda kuzaba mpilamosi beto ikele ye yandi lenda kubomba ntima ya beno. Zola ye yenge

²³ Yenge kwa bampangi ye zola ye lukwikilu ya katuka na Nzambi, Tata ye Mfumu Yesu Klisto.

²⁴ Bika nlemvo vanda kwa bau yonso ya zola Mfumu ya beto Yesu Klisto mu zola ya konda kusuka.