Efeso 5 - Le Nouveau Testament en Kikwango 1950

Malongi sambu na kulanda Nzambi

¹ Mpilayai, beno vanda balandi ya Nzambi, bonso bana ya zolwa. Mat. 5:45

² Tambula mu zola, bonso Klisto mpe zolaka beno, ye dipesaka sambu na beto, nkailu ye nkailu ya yokwa ya nsunga ya mbote kwa Nzambi. Yoa. 13:34; Yoa. 15:12; 1 Tes. 4:9; 1 Yoa. 3:11; Ngal. 2:20; Eb. 8:3; 1 Pet. 3:18

Kutina masumu

³ Kansi bizumba ye nsumukunu yonso keti zola ya bima, bika yo vanda ta fioti ve nakati na beno, bonso yo lunga kwa banlongo, Mal. 7:21; Kolo. 3:5; Ngal. 5:19

⁴ keti mambu ya nsoni keti ndinga ya buzoba keti nsaka ya lunga ve na beno, kansi kupesa ya matondo. Ef. 4:29; Kolo. 3:15

⁵ Kadi beno zaba yai mbote, muntu ya bizumba keti muntu ya sumuka keti nkwa zola ya bima, ya ikele musambidi ya kiteki, yandi lenda ve kubaka difwa mu kimfumu ya Klisto ye Nzambi.

⁶ Bika muntu kukusa beno ve mu ndinga ya mpamba, kadi sambu na mambu yai, makasi ya Nzambi ikele kwiza va bana ya kolama. Lom. 1:18; Kolo. 3:6; 2 Tes. 2:3

⁷ Sambu na yai, beno vanda na kintuadi na bau ve.

⁸ Kadi ntete beno vandaka mu tombe, kansi ntangu yai beno imene kwiza ku mwini mu Mfumu. Tambula bonso bana ya mwini. Yoa. 12:36; 1 Tes. 5:5

⁹ Kadi mabundu ya mwini ikele mu mambu ya mbote yonso ye lunungu ye kieleka. Ngal. 5:22

¹⁰ Beno teza kuzaba mambu yonso ya Mfumu zola. Lom. 12:2

¹¹ Beno vanda na kintuadi ve na bisalu ya tombe ya konda mabundu, kansi beno semba yau kaka. Lom. 13:12; 1 Kol. 5:8; 10:20; 2 Kol. 6:14; 2 Tes. 3:14

¹² Kadi, mambu ya bau sala mu kinsweki, ikele nsoni mpe kutuba sambu na yau.

¹³ Kansi bu mambu yonso sembwa, yau ikele kumonikwa mu mwini, kadi mwini ikele kuzabisa mambu yonso. Yoa. 3:20

¹⁴ Mpilayai, yandi tubaka: Sikama, nge ya ikele kulala tulu, fulukiswa tuka bafwa, ye Klisto takienzula nge. Lom. 13:11; Kolo. 3:1

Tambula mu ngangu ye fuluka na Mpeve

¹⁵ Mpilayai, beno tomatala, bonso beno fwiti tambula, bonso bazoba ve, kansi bonso bankwa ngangu. Kolo. 4:5

¹⁶ Beno sadila ntangu mbote, sambu na bilumbu ikele mbi.

¹⁷ Mpilayai beno vanda banzoba ve, kansi kuzaba nki ikele luzolo ya Mfumu. Lom. 12:2

¹⁸ Beno kolwa na vinia ve, mu yo ikele kubasika kilau, kansi beno fuluka na Mpeve. Bing. 20:1; 23:29; Yes. 5:11, 22; Luk. 21:34

¹⁹ Tubana mu bankunga ye nkunga ya matondo ye nkunga ya kimpeve, beno yimba ye sika mu ntima ya beno kwa Mfumu. Kolo. 3:16

²⁰ Beno pesa matondo kwa Nzambi ye Tata ntangu yonso, sambu na bima yonso mu nkumbu ya Mfumu ya beto Yesu Klisto. Kolo. 3:17

²¹ Beno lemvuka, muntu kwa babamfinangani ya yandi mu vumi ya Klisto. 1 Pet. 5:5

Malongi kwa babakala ye bankento

²² Beno bankento, lemvuka kwa babakala ya beno kibeni, bonso kwa Mfumu. 1 Mose 3:16; 1 Kol. 14:34; Kolo. 3:18; Tit. 2:5; 1 Pet. 3:1

²³ Kadi bakala ikele ntu ya nkento, bonso Klisto mpe ikele ntu ya dibundu. Yandi kibeni ikele mvulusi ya nitu,

²⁴ Bonso dibundu lemvuka kwa Klisto, buna mpe bankento lemvuka kwa babakala ya bau mu mambu yonso.

²⁵ Beno babakala, zola bankento ya beno, bonso Klisto mpe zola dibundu, ye dipesaka sambu na yo, Kolo. 3:19; 1 Pet. 3:7; Ngal. 2:20; Lom. 4:25

²⁶ na yandi lenda kutula yo nlongo, bu yandi vedisaka yo mu ngiobolo ya masa ye mu mambu ya yandi, Yoa. 3:5; Tit. 3:5

²⁷ na yandi kibeni lenda kudipesila dibundu ya nkembo, ya konda tona keti mbi keti kima ya mpilayina, kansi na yo lenda kuvanda nlongo ya konda kieta. Kolo. 1:22

²⁸ Mpilayai mpe babakala fwiti kuzola bankento ya bau kibeni, bonso nitu ya bau kibeni. Yandi ya zola nkento ya yandi kibeni, ikele kudizola.

²⁹ Kadi muntu ikele na makasi na nitu na yandi kibeni ta ntangu mosi ve, kansi yandi ikele kusansa yo ye kukeba yo, bonso Klisto kwa dibundu,

³⁰ kadi beto ikele biela ya nitu ya yandi.

³¹ Sambu na yai, muntu fwiti kubika tata ya yandi ye ngudi ya yandi ye vanda na nkento ya yandi, ye bau zole tavanda nsuni mosi. 1 Mose 2:24; Mat. 19:6; 1 Kol. 6:15

³² Mambu ya kinsweki yai ikele ya nene, kansi mono tuba yo sambu na Klisto ye sambu na dibundu.

³³ Sambu na yai, beno mpe muntu na muntu zola nkento ya yandi, bonso yandi kibeni, ye bika nkento zitisa bakala ya yandi.