Efeso 4 - Le Nouveau Testament en Kikwango 1950

Bantu ya Nzambi tavanda mosi mu yandi

¹ Mpilayai, mono muntu ya boloko mu Mfumu, ikele kubombidila beno, kutambula ya lunga mu mbokolo ya beno bingwaka. Ef. 2:1

² Mu kudikulumusa yonso ye nlembami ye mvibidulu, kuvibidilana mu zola,

³ beno tula ngolo kukeba kintuadi ya Mpeve mu kangu ya yenge.

⁴ Nitu mosi ye Mpeve mosi ikele, bonso beno bingwaka mpe mu vuvu mosi ya mbokolo ya beno, Lom. 12:5; 1 Kol. 10:17; 12:4, 11

⁵ Mfumu mosi, lukwikilu mosi, mbotika mosi, 1 Kol. 8:5; 12:5; 1 Tim. 2:5

⁶ Nzambi mosi ye Tata ya bantu yonso, ya ikele na zulu na bantu yonso, ye nakati na bantu yonso ye mu bantu yonso.

Nkailu ya mutindu mu mutindu

⁷ Kansi beto muntu na muntu ikele kupeswa nlemvo, bonso kitezo ya matabisi ya Klisto. Lom. 12:3, 6; 1 Kol. 12:1

⁸ Mpilayai, yandi tubaka: Bu yandi tombokaka ku zulu, yandi tulaka bampika mu kimpika, ye pesaka matabisi kwa bantu. Nk. 68:18

⁹ Kansi yai: Yandi tombokaka, ikele mpila nki ? kansi na yandi kulumukaka ntete ku sika ya ikele nansi ya ntoto.

¹⁰ Yandi ya kulumukaka ikele yandi ya tombokaka diaka mu zulu ya mazulu yonso, na yandi lenda kufulusa bima yonso.

¹¹ Yandi pesaka bankaka kuvanda bantumwa, bankaka bambikudi, bankaka bansamuni ya nsamu mbote, bankaka bamvungi ye banlongi, 1 Kol. 12:18

¹² Sambu na kulungisa banlongo kwa kisalu ya kisielo ye kutunga ya nitu ya Klisto.

¹³ Ti beto yonso imene kukuma ku kintuadi ya lukwikilu ye nzailu ya Mwana ya Nzambi, kwa muntu ya imene kukula, ku kitezo ya ntela ya kifulusilu ya Klisto.

¹⁴ Na beto tavanda bana diaka ve, ya natwa ye twalwa na mupepe yonso mu kimpa ya bantu ye mu bungubi ye kinkita ya vengumuna. 1 Kol. 14:20; Eb. 13:9

¹⁵ Kansi beto ikele kutuba kieleka mu zola, beto lenda kukula mu mambu yonso kwa yandi, yaikele ntu, ya ikele Klisto. Ef. 1:22; 5:23; Kolo. 1:18

¹⁶ Tuka yandi, nitu yamvimba ikele kubundwa ye kangwa mu lusadusu ya biela yonso ya ikele kusadisana, bonso kisalu ya kiela na kiela, mpilayai nitu ikele kukula mu kuditunga ye mu zola. Lom. 12:5; 1 Kol. 12:27; Kolo. 2:19

Muntu ya nkulu ye yampa

¹⁷ Sambu na yai, mono ikele kutuba ye kusonga kitemo mu Mfumu, beno tambula diaka ve, bonso bapaien ikele kutambula mu mabanza ya bau ya lulendo.

¹⁸ Bau ikele tombe mu nzailu ya bau, ye ikele banzenza ya moyo ya Nzambi, sambu na buzoba ya ikele na bau, ye sambu na ngolo ya ntima ya bau. Ef. 5:8; Kolo. 1:21

¹⁹ Bu bau konda nsoni bau diyekulaka mu luzolo ya bizumba, kusala mambu sumuka yonso, mu zola ya bima. Lom. 6:18

²⁰ Kansi beno longukaka Klisto mpilayai ve.

²¹ Kana yo ikele, na beno kuwaka yandi, ye longwaka mu yandi, bonso kieleka ikele mu Yesu.

²² Katula muntu ya nkulu ya moyo ya beno ya ntete, ya ikele kubiviswa mu luzolo ya nsuni ya luvunu, Lom. 6:6; Kolo. 3:9

²³ na beno takitulwa yampa mu mpeve ya mabanza ya beno. Lom. 12:2

²⁴ Ye vwata muntu yampa, ya semwa bonso Nzambi mu lunungu ye nlongo ya kieleka. 2 Kol. 5:17

Kutina mambu ya mbi

²⁵ Mpilayai, beno bika luvunu, ye tuba kieleka muntu kwa bamfinangani ya yandi, kadi beto ikele biela ya kintuadi. Zak. 8:16; Lom. 12:5; 1 Pet. 2:1

²⁶ Vanda na makasi, kansi sala masumu ve, vanda na makasi ve ti ntangu kukota.

²⁷ Pesa diable sika ve.

²⁸ Yandi ya ikele mwivi, bika yandi kuyiba diaka ve, kansi yandi tasala kisalu na maboko ya yandi, yina ya ikele mbote, na yandi tavanda na bima kukabila kwa bau ya ikele na nsatu. 1 Tes. 4:11; 2 Tes. 3:8

²⁹ Bika mambu ya nsoni kubasika na munoko ya beno ta fioti ve, kansi yina ya ikele mbote ku ntungulu ya bankaka, bonso nsatu ikele, na yo lenda kupesa nlemvo kwa bau ya kuwa. Kolo. 2:16

³⁰ Beno pesa ntantu ve kwa Mpeve Yanlongo ya Nzambi, mu yandi beno tulwaka kidimbu ti kilumbu ya nkudulu. 2 Kol. 1:22; 5:6

³¹ Bika ndudi yonso ye kimbeni ye makasi ye makalele ye kutuba mbi ye mbi yonso katulwa na beno. Kolo. 3:8

³² Beno vandana na nlembami ye nkenda, vidisana masumu, bonso Nzambi imene kuvidisa masumu ya beno mu Klisto. Mat. 6:14; 11:26; Kolo. 3:12