Efeso 3 - Le Nouveau Testament en Kikwango 1950

Mpulusu ya bapaien swekwaka ntete

¹ Sambu na beno, bapaien, mono Paulu ikele muntu ya boloko ya Klisto Yesu—

² kadi beno kuwaka sambu na nsadulu ya nlemvo ya Nzambi ya peswaka kwa mono, sambu na beno,

³ na mambu ya kinsweki zabiswaka kwa mono mu nzaikusu, bonso mono sonikaka kwa beno ntete mu mambu fioti. Ef. 1:9; Ngal. 1:12

⁴ Bu beno tanga yo, beno lenda kubakisa nzailu ya mono mu mambu ya kinsweki ya Klisto. Kolo. 4:3

⁵ Yo zabiswaka ve mu bambandu yankaka kwa bana ya bantu, bonso yo imene kuzabiswa ntangu yai mu Mpeve kwa bantumwa ya yandi ya nlongo ye bambikudi.

⁶ Na, bapaien ikele bamvingidi ya difwa sikamosi na beto, ye ikele na beto nitu mosi, ye ikele na beto kintuadi mu nsilulu mu Klisto Yesu mu nsamu mbote.

⁷ Sambu na yo, mono kitulwa sielo, bonso matabisi ya nlemvo ya Nzambi, ya peswaka kwa mono, bonso nsadulu ya ngolo ya yandi. Kolo. 1:23, 25; 1 Kol. 4:1; 2 Kol. 3:6; Luk. 1:2

⁸ Kwa mono, ya luta fioti na banlongo yonso ya fioti, peswaka nlemvo yai, kusamuna kwa bapaien nsamu mbote ya kimvwama ya Klisto, ya lenda ve kuteswa. 1 Kol. 15:9; Lom. 1:6; 11:33; Ngal. 1:16; 2:3; Kolo. 1:27

⁹ na bantu yonso lenda kumona, nki ikele nsadulu ya mambu ya kinsweki ya swekwaka tuka bantangu yantikaka, mu Nzambi, ya semaka bima yonso. Ef. 1:18; Kolo. 1:26; Lom. 16:25

¹⁰ Na nduenga ya Nzambi ya mutindu mingi lenda kuzabiswa ntangu yai, mu dibundu kwa banyadi ye bakuluntu mu zulu. Ef. 1:20, 21; Kolo. 1:16; Lom. 11:33

¹¹ Bonso ikele lukanu ya mvu ya mvu, ya yandi kanaka mu Klisto Yesu Mfumu ya beto. Ef. 1:11; 2 Tim. 1:9

¹² Mu yandi beto ikele na kikesa ye vuvu kwiza mfinama na Nzambi, mu lukwikilu. Lom. 5:2; 8:15; Ef. 2:18; 1 Pet. 3:18

¹³ Sambu na yai, mono lomba, na beno takonda kikesa ve, mu mpasi ya mono sambu na beno, yai ikele nkembo ya beno. Ngal. 6:9; Kolo. 1:24

Lombilu ya Paulu sambu na bakwikidi mu Efeso

¹⁴ Sambu na yai, mono ikele kufukama na makungunu ya mono kwa Tata.

¹⁵ Tuka yandi kikanda yonso ikele kubingwa mu zulu ye va ntoto,

¹⁶ na yandi tapesa beno, bonso ikele kimvwama ya nkembo ya yandi, na beno lenda kusiamiswa na ngolo, mu mpeve ya yandi, mu muntu ya kati. Lom. 15:13; 2 Kol. 4:16; Ef. 6:10; Kolo. 1:11

¹⁷ na Klisto lenda kuvanda mu ntima ya beno mu lukwikilu,

¹⁸ buna bu beno tulwa mianzi ye kanga ngolo mu zola, beno lenda kuvanda ngolo, kuzaba sikamosi na banlongo yonso, nki ikele nene ye nda ye ntela ye mudindu,

¹⁹ ye kuzaba zola ya Klisto ya luta nzailu, na beno lenda kufuluswa na kifulusilu ya Nzambi.

²⁰ Kansi kwa yandi ya lenda kusala mambu ya luta mingi, yonso ya beto lomba keti banza, bonso ngolo, ya ikele kusala mu beto. Lom. 16:26

²¹ Kwa yandi nkembo mu dibundu, ye mu Klisto Yesu kwa mbandu yonso mvu ya mvu. Amen.