Efeso 2 - Le Nouveau Testament en Kikwango 1950

BaYuda ye bapaien ikele nitu mosi mu Klisto

¹ Beno mpe vandaka bafwa mu kufwa ya nsiku ye masumu ya beno. Kolo. 2:16

² Mu yo beno tambulaka ntete, bonso kifu ya nsi mu ntangu yai, bonso beno landaka nkuluntu ya bangolo ya mupepe. Yandi ikele mpeve ya kusala mu bana ya kolama. Kolo. 3:6

³ Nakati na bau beto vandaka ntete kutambula sikamosi na bau mu luzolo ya nsuni ya beto, beto salaka luzolo ya nsuni ye ya mabanza, mu kimuntu beto vandaka bana ya makasi bonso bankaka mpe.

⁴ Kansi Nzambi ya ikele kimvwama mu nkenda, sambu na zola ya yandi ya nene, ya yandi zolaka beto.

⁵ Yandi pesaka beto moyo mu Klisto, bu beto vandaka ya kufwa mu masumu ya beto. Mu nlemvo yandi vulusaka beto.

⁶ Yandi fulukisaka beto sikamosi na yandi, ye vandisaka beto sikamosi na yandi mu zulu, mu Klisto Yesu,

⁷ sambu na kusonga beto mu bantangu ya ikele kwiza, kimvwama ya nene ya nlemvo ya yandi mu nlembami kwa beto mu Klisto Yesu.

⁸ Kadi, mu nlemvo, beno vuluswaka mu lukwikilu, yo ikele sambu na beno kibeni ve, ikele matabisi ya Nzambi, Lom. 3:24; 4:16; Tit. 3:6

⁹ ikele ve sambu na bisalu, na muntu lenda ve kuyana. Lom. 3:20, 27, 28; 2 Tim. 1:9; Lom. 4:2, 5; Lom. 9:11, 32; 11:6; 1 Kol. 1:29; Ngal. 2:16; 3:2

¹⁰ Kadi beto ikele bisalu ya yandi, beto semwaka mu Klisto Yesu sambu na bisalu ya mbote, ya Nzambi yidikaka ntete na beto tatambula muna. Nk. 100:3; Kolo. 1:10; Tit. 2:14

¹¹ Mpilayai beno bambuka, ntete beno vandaka bapaien mu nsuni, beno bingwaka bankwa konda nzengolo, na bau ya bingwa bankwa nzengolo, ikele yina ya salwa mu nsuni. Lom. 2:26; 1 Kol. 12:2; Kolo. 1:21

¹² Mu ntangu yina beno kondaka Klisto, beno vandaka nanganda na luyalu ya Isaeli, ye nzenza na luwawanu ya nsilulu, beno vandaka ve na vuvu, ye beno kondaka Nzambi mu nsi. Lom. 9:4; Ef. 5:2

¹³ Kansi ntangu yai, mu Klisto Yesu, beno ya vandaka ntama ntete, imene kwiza mfinama mu menga ya Klisto.

¹⁴ Kadi yandi ikele yenge ya beto, ikele yandi ya salaka yau zole mosi, yandi katulaka kibaka ya kabanaka.

¹⁵ Kadi mu nsuni ya yandi, yandi manisaka kimbeni yabasika na bansikudukusu ya nsiku, na yandi lenda kusema mu yandi kibeni muntu mosi yampa, buna yandi sala yenge. Kolo. 2:14; Ngal. 6:16; 2 Kol. 5:17

¹⁶ Ye yandi vutulaka bau zole mu nitu mosi kwa Nzambi, mu kulunsi, bu yandi kufwaka kimbeni va yo. Kolo. 1:20, 22

¹⁷ Yandi kwizaka kusamuna nsamu mbote ya yenge kwa beno ya vandaka ntama, ye yenge kwa bau ya vandaka mfinama, Yes. 57:19

¹⁸ kadi mu Tata beto ye bau bakaka nkotolo ya beto mu mpeve mosi. Yoa. 14:16; Ef. 3:12; Lom. 5:2

¹⁹ Mpilayai beno ikele banzenza ye bantambudi diaka ve, kansi beno ikele bisi sikamosi na banlongo ye bantu ya nzo ya Nzambi. Fili. 3:20

²⁰ beno ikele kutungwa va lufulu ya bantumwa ye bambikudi, Klisto Yesu kibeni ikele ditadi ya fuma. Yes. 28:16; Mat. 21:42; 1 Pet. 2:4; Nzai. 21:14

²¹ Mu yandi ntungulu yonso ikele kubundwa, ikele kutungwa kuvanda tempelo ya nlongo mu Mfumu. 2 Nt. 6:16; 1 Kol. 3:16

²² Mu yandi beno mpe ikele kutungwa sikamosi sambu na kuvanda nzo ya Nzambi mu Mpeve. 1 Pet. 2:5