Ebeleo 9 - Le Nouveau Testament en Kikwango 1950

Mutindu bau sambilaka Nzambi mu luwawanu ya nkulu

¹ Buna luwawanu ya ntete vandaka na bansiku ya sadila Nzambi ye na kinlongo ya nsi yai. 2 Mose 25:1; 40:3

² Kadi Nzo ya lele salwaka, mu ndambu ya ntete vandaka lundilu ya mwinda ye meza ye mampa ya tala, yo bingwa kinlongo.

³ Kansi nanima na ngumbu ya zole, Nzo ya lele ya bingwa sika ya kinlongo ya nlongo, 2 Mose 26:31

⁴ ya vandaka na zikwa ya wola ya fwitisila mwisi, ye nkela ya luwawanu ya sitwa wola na ndambu yonso, mu yo vandaka kopo ya wole ya vandaka na mana ye nkawa ya Alona ya menaka ye matadi ya luwawanu. 2 Mose 16:22; 25:16; 4 Mose 17:10

⁵ Va zulu na yo bakeluba ya nkembo fukaka kiti ya nlemvo. Beto lenda kutuba sambu na mambu yina mosi mosi ntangu yai ve.

⁶ Bu bima yina yidikwa mpilayai, banganga kotaka ntangu yonso mu Nzo ya lele ya ntete, kumanisa bisalu ya bau.

⁷ Kansi mu yina ya zole, nganga kaka kotaka muna, mbala mosi mvu mosi; ya konda menga ve, ya yandi pesaka sambu na yandi kibeni ye sambu na masumu ya bantu. 2 Mose 30:10; 3 Mose 16:1, 17, 34

⁸ Mpeve Yanlongo songaka mu yai, na nzila ku sika ya kinlongo ya longo imene kuzaikiswa ve, bu Nzo ya lele ya ntete ikele kutelema. Eb. 10:19

⁹ Yai ikele kingana ya ntangu yai, kusonga matabisi ye bankailu ikele kupeswa, kansi yau konda kuvedisa kansansa ya bau ya pesaka yau.

¹⁰ Mambu yai yonso ikele nsikudukusu ya nsuni, mu kudia, ye kunwa ye kusukula mpila mu mpila, yo tulwaka ti na ntangu ya nsungukulu. 2 Mose 19:10; 29:4; 30:18; 3 Mose 11:1; 4 Mose 19:7; Kolo. 2:16

Nkailu ya zikwa, nganga nene ikele Yesu Klisto

¹¹ Kansi bu Klisto kituka nganga nene ya bima ya mbote ya ikele kwiza mu kinlongo ya luta nene ye ya lunga. Yai konda kusalwa na maboko, ikele ya nsemono yai ve, Eb. 8:1; 10:1

¹² ikele mu menga ya bankombo ye mu menga ya bana ya bangombe mpe ve, kansi mu menga ya yandi kibeni, yandi kotaka mbala mosi mu sika ya nlongo, bu yandi bakaka nkudulu ya mvu ya mvu. Bis. 20:28; Eb. 10:10; 1 Pet. 1:18

¹³ Kadi kana menga ya bankombo ye ya bangombe bobakala ye putulu ya ngombe nkento ya lembwa va bau ya sumuka vedisa ku mvedoso ya nsuni; 3 Mose 16:1; 4 Mose 19:1

¹⁴ buna menga ya Klisto luta, bu yandi dipesaka nkailu ya zikwa mu Mpeve ya mvu ya mvu ye konda kieta kwa Nzambi, yo luta kusukula kansansa ya beno mu bisalu ya lufwa kusadila Nzambi ya ikele na moyo. Ngal. 1:4; 2:20; Tit. 2:14; 1 Yoa. 1:7

¹⁵ Sambu na mambu yai, yandi ikele nwawasi ya luwawanu yampa, bau ya bingwa lenda kubaka difwa ya mvu ya mvu ya silwaka kwa bau sambu na mosi kufwaka sambu na nkudulu ya kufwa nsiku ya vandaka nansi ya luwawanu ya ntete. Lom. 3:25; 1 Tim. 2:5; Eb. 12:24; 1 Pet. 3:18

¹⁶ Kadi sika ya nkanda ya difwa ikele, sika yina fwiti kuvanda kitemo ya lufwa ya yandi ya sonikaka yo.

¹⁷ Kadi nkanda ya difwa ikele ngolo ya kusalwa bu muntu imene kufwa, kadi yo kibeni ikele ngolo ve bu muntu ikele na moyo.

¹⁸ Mpilayai, luwawanu yantete kondwa menga ve, bu yo tulwaka.

¹⁹ Kadi bu Mose tubaka nsikudukusu yonso kwa bantu yonso, bonso ikele mu nsiku, buna yandi bakaka menga ya bana bangombe ye bankombo ye masa ye mika ya mbwaki ye isopi, yandi lembaka yo va nkanda yai ye va bantu yonso, kutuba:

²⁰ Yai ikele menga ya luwawanu ya Nzambi sikidikisaka kwa beno. 2 Mose 24:8

²¹ Yandi lembaka mpe menga va Nzo ya lele ye wumbwa yonso ya kisielo.

²² Bonso ikele mu nsiku, fioti bikaka kana yonso vediswa mu menga, kondwa kutiamuka ya menga, mvidusu ya masumu ikele ve. 3 Mose 17:11

²³ Mpilayai, yo vandaka na nsatu, na bifwani ya bima ya zulu kusukulwa mpilayina, kansi bima ya zulu kibeni na nkailu ya luta mbote.

²⁴ Kadi Klisto kotaka ve mu sika ya kinlongo ya salwaka na maboko, ya ikele kifwani ya yina ya kieleka, kansi mu zulu kibeni kumonika na luse ya Nzambi sambu na beto.

²⁵ Yandi kotaka mpe ve kudipesa va zikwa mbala na mbala, bonso nganga nene kotaka mu sika ya kinlongo mvu na mvu na menga ya ikele ya yandi ve. 2 Mose 30:10; 3 Mose 16:1; Eb. 7:27

²⁶ Kana mpilayai yandi fwiti kumona mpasi mbala mingi tuka kutulwa ya lufulu ya nsi, kansi yandi monikaka mbala mosi na nsuka ya ntangu kukatula masumu, bu yandi dipesaka bonso nkailu.

²⁷ Yo zengwa kwa bantu kufwa mbala mosi, ye nanima ikele mfundusu,

²⁸ buna Klisto mpe, bu yandi peswaka va zikwa mbala mosi kunata masumu ya bantu mingi, yandi tamonika mbala ya zole mu kukatula ya masumu ve, kansi kuvulusa bau ya vingila yandi. Mat. 26:28; Lom. 5:6, 9; 1 Pet. 3:18