Ebeleo 7 - Le Nouveau Testament en Kikwango 1950

Melekisedeki

¹ Melekisedeki yai, ntinu ya Salemi, nganga ya Nzambi-Mpungu, yandi kutanaka na Abalahami, bu yandi vutukaka na mvita ya bantinu, ye sakumunaka yandi, 1 Mose 14:18

² Abalahami kabilaka yandi mosi ya kumi ya bima yonso; ntete yandi ikele ntinu ya lunungu. Bonso ikele kutendula ya nkumbu ya yandi, buna ntinu ya Salemi mpe, yo ikele ntinu ya yenge,

³ yandi konda tata, ye konda mama, ye konda mbutukulu, yandi konda luyantiku ya kilumbu ye nsuka ya moyo, kansi yandi fwanukiswa Mwana ya Nzambi, yandi ikele kuvanda nganga ya ntangu na ntangu. Melekisedeki luta Abalahami ye Levi

⁴ Beno tala bonso muntu yai vandaka nene mingi, kwa yandi Abalahami, tata ya makanda pesaka mosi ya kumi na yina ya yandi botulaka.

⁵ Ye bau kieleka, bana ya Levi ya baka kisalu ya kinganga, nsikudukusu pesa bau nzila kubaka mosi ya kumi ya bantu, yo ikele ya bampangi ya bau, sambu na bau basikaka na luketo ya Abalahami. 4 Mose 18:21; 5 Mose 18:1

⁶ Kansi yandi ya tangwa ve mu mbutukulu ya bau, bakaka mosi ya kumi ya Abalahami ye yandi sakumunaka yandi ya vandaka na bansilulu.

⁷ Kansi yai ikele ntembe ve, ya fioti sakumunwa kwa yanene.

⁸ Awa bantu ya takufwa ikele kubaka mosi ya kumi, kansi kuna ikele mosi ya bau tubila yandi kitemo, yandi ikele na moyo.

⁹ Mpilayai, beto lenda kutuba: Levi ikele kubaka mosi ya kumi, yandi pesaka mosi ya kumi mu Abalahami,

¹⁰ kadi yandi vandaka mu luketo ya tata ya yandi, bu Melekisedeki kutanaka na Abalahami. Kinganga ya Melekesideki

¹¹ Kansi kana lunungu lenda kulunga mu kinganga ya Levi, sambu na mu yo bantu peswa nsiku, buna nki nsatu ikele diaka na nganga ya mpila nkaka telema bonso kinganga ya Melekisedeki, ya konda kutangwa mu kinganga ya Alona ?

¹² Kadi kana kinganga pinduka, buna nsiku fwiti kupindulwa mpe.

¹³ Kadi yandi ya bau ikele kutuba mambu yai vandaka na kikanda yankaka ya konda muntu ya salaka na zikwa.

¹⁴ Kadi yai zabakana, Mfumu ya beto basikaka na Yuda, Mose kondaka kutuba sambu na banganga ya kikanda yai.

¹⁵ Yo luta kuzabakana bu beto kumona, kana nganga yankaka telema bonso ikele kinganga ya Melekisedeki,

¹⁶ yandi kituka nganga, bonso mu nsikudukusu ya kinsuni ve, kansi bonso ngolo ya moyo ya konda kufwa.

¹⁷ Kadi bau tubaka kitemo sambu na yandi: Nge ikele nganga mvu ya mvu bonso ikele kinganga ya Melekisedeki.

¹⁸ Kadi nsikudukusu ya vandaka ntete kitulwaka mpamba, sambu na yo vandaka lebakana ye konda kusadisa,

¹⁹ kadi nsiku lungisaka kima ve. Kansi na sika na yo, beto ikele kutulwa vuvu ya luta mbote, mu yo beto ikele kwiza mfinama kwa Nzambi. Bis. 13:38; Ef. 2:18; 3:11

²⁰ Bu yo tulwaka, yo kondaka ndefi ve.

²¹ Kadi bau kitukaka banganga mu ndefi ve, kansi yandi mu ndefi ya yandi ya tubaka kwa yandi: Mfumu kudiaka ndefi, ye yandi lenda kupindula ve: Nge ikele nganga ya mvu ya mvu.

²² Buna Yesu kitukaka musadi ya nsilulu mu luwawanu ya luta mbote. Eb. 8:6

Banganga ya kinganga ya Alona kufwaka; Klisto ikele na moyo mvu ya mvu

²³ Ye kieleka bayai tulwaka banganga mingi, kadi mu lufwa kisalu ya bau manaka.

²⁴ Kansi sambu na yandi ikele kuvanda mvu ya mvu, yandi ikele na kinganga ya lenda kupeswa kwa muntu yankaka ve, Eb. 9:24

²⁵ mpilayai, yandi lenda kuvulusa bau ya kwiza mfinama kwa Nzambi mu yandi, kadi yandi ikele na moyo ntangu yonso ma kutubila bau. Yoa. 14:6

Nganga nene ya luwawanu yampa

²⁶ Kadi nganga nene ya mpilayai lunga kwa beto, yandi ikele ya nlongo, ya konda mbi, ya konda kusumunwa, ya kutanaka na bankwa masumu ve, ye ya tombolwaka va zulu ya bimba yonso, Eb. 4:14

²⁷ yandi ikele na nsatu ve, bonso banganga nene yina, kupesa nkailu kilumbu na kilumbu, ntete sambu na masumu ya yandi kibeni, buna sambu na masumu ya bantu, kansi yandi salaka yo kima kulu, bu yandi dipesaka. Eb. 5:3; 9:7, 12

²⁸ Kadi nsiku tulwaka bantu ya ikele lebakana kuvanda banganga nene, kansi mambu ya ndefi ya landaka nsiku, tulaka Mwana, yandi ikele ya lunga mvu ya mvu. Eb. 5:1