Ebeleo 6 - Le Nouveau Testament en Kikwango 1950

Kuvanda ya lunga

¹ Mpilayai, beto bika malongi ya mambu ya luyantiku ya Klisto, ye landa mambu ya lunga, ye kutula lufulu diaka ve mu mpindulu ya mabanza mu bisalu ya lufwa ye mu lukwikilu mu Nzambi 1 Kol. 3:10; Eb. 5:12

² ye malongi ya mbotika ye kutulwa ya maboko, ye ya mfulukulu ya bafwa ye ya mfundusu ya mvu ya mvu.

³ Yai beto tasala kana Nzambi zola.

Kubedisa bau tita kukatuka mu Nzambi

⁴ Kansi sambu na bau ya kienzulwa ntete, ye bau ya mekaka matabisi ya zulu ye bau ya vandaka bintwadi mu Mpeve Yanlongo Eb. 10:26

⁵ ye mekaka mambu yambote ya Nzambi, ye bangolo ya ntangu ya ikele kwiza,

⁶ nanima bau vengumukaka, buna bau lenda ve kuvutuka diaka ku mpindulu ya mabanza bu bau koma Mwana ya Nzambi va kulunsi diaka kwa bau kibeni, ye monisa yandi nsoni nantwala na bantu. 2 Pet. 2:20

⁷ Kadi ntoto ya imene kunwa mvula ya noka va yo ntangu na ntangu, ye buta mabundu ya ikele mfunu kwa bau ya sala yau, yo ikele kubaka nsakumunu ya Nzambi,

⁸ kansi kana yo mena nsende ye matiti ya nsende, buna bau buya yo, ye yo ikele mfinama kutulwa ndola, ye na nsuka yo tayokwa. 1 Mose 3:17; Yes. 5:2, 4, 6; Hos. 10:8

Vuvu ikele kwa baEbeleo

⁹ Beno bazolwa, beto tuba yai, kansi beto kwikidiswa mambu ya luta mbote sambu na beno, ya ikele sikamosi na mpulusu.

¹⁰ Kadi Nzambi ikele konda lunungu ve, yandi ikele kuvila ve kisalu ya beno ye zola ya beno songa kwa nkumbu ya yandii bu beno sadilaka banlongo ye beno ikele kusadila bau. Mat. 10:42; 25:40; Mal. 9:4; Yoa. 13:20; 1 Tes. 1:3

¹¹ Beto tonda muntu na muntu mu beno tula ngolo ya mutindu mosi kukeba vuvu ya lunga ti nsuka.

¹² Beno vanda na bumolo ve, kansi vanda bonso bau ya ikele kuvingila difwa ya nsilulu mu lukwikilu ye mu mvibudulu.

¹³ Kadi bu Nzambi silaka nsilulu kwa Abalahami, sambu na yandi lendaka kudia ndefi mu muntu ya luta nene ve, yandi kudiaka ndefi mu yandi kibeni, kutuba: 1 Mose 22:16; Nk. 105:8

¹⁴ Kieleka, mono tasakumuna nge ye mono tasakumuna nge, mono tatula nge kwiza mingi.

¹⁵ Bu yandi songaka mvibudulu, buna yandi bakaka nsilulu.

¹⁶ Kadi bantu ikele kudia ndefi mu yina ya luta nene; Ndefi ikele kitemo ya ngolo kumanisa ntembe yonso.

¹⁷ Buna bu Nzambi zolaka kusonga kwa bamvingidi ya difwa ya nsilulu, makani ya yandi ya lenda kupinduka ve, buna yandi kudiaka ndefi,

¹⁸ mu mambu zole ya ngolo, Nzambi lenda kutuba luvunu ve. Beto lenda kuvanda na mbombolo ya ngolo, beto ya imene kutinina ku mpulusu kusimba vuvu ya ikele nantwala na beto. 4 Mose 23:19; Tit. 1:2

¹⁹ Yo ikele na beto bonso longo ya mwela, vuvu ya kieleka ye ngolo ye kukota mu yina ya ikele nanima na ngumbu; 3 Mose 16:2

²⁰ muna Yesu kotaka, yandi ikele ntekidi sambu na beto, yandi kwizaka nganga nene mvu ya mvu mu kinganga ya Melekisedeki. Eb. 3:1; 4:14; 5:6; 8:1; 9:11