Ebeleo 5 - Le Nouveau Testament en Kikwango 1950

Klisto ikele nganga nene bonso Melekisedeki

¹ Kadi konso nganga nene, bu yandi solwa nakati ya bantu, yandi tulwa sambu na bantu, mu mambu yonso ya Nzambi, na yandi lenda kupesa matabisi ye nkailu sambu na masumu, Eb. 8:3; 9:9

² yandi lenda kulemvula bau ya konda kuzaba ye ya vila, kadi yandi mpe kibeni ikele lebakana,

³ sambu na mambu yai, yandi fwiti kunata nkailu ya masumu ya yandi ye ya masumu ya bantu mpe.

⁴ Muntu kibeni lenda kudibakila luzitu yina ve, kansi yandi bingwa kwa Nzambi, bonso Alona. 2 Mose 28:1

⁵ Mpilayai mpe Klisto dikembilaka ve kuvanda nganga nene, kansi yandi ya tubaka kwa yandi: Nge ikele Mwana ya mono, bubu yai mono imene kubuta nge, Nk. 2:7

⁶ bonso yandi tubaka sika yankaka mpe: Nge ikele nganga ya mvu ya mvu, bonso ikele kinganga ya Melekisedeki. Nk. 110:4

⁷ Ikele yandi ya mu bilumbu ya nsuni ya yandi, pesaka lombilu ye bombidilu mu kuboka ya ngolo ye mu kudila kwa yandi ya vandaka ngolo kuvulusa yandi tuka lufwa, yandi wilwaka sambu na vuvu ya yandi mu Nzambi. Mat. 27:46, 50; Mal. 14:33; Luk. 22:42, 44

⁸ Yandi vandaka Mwana, kansi yandi longukaka kulemvuka mu mambu ya yandi monaka mpasi.

⁹ Bu yandi imene kulunga, yandi kitukaka mfumu ya mpulusu ya mvu ya mvu kwa bau yonso ya lemvuka yandi. Eb. 2:10

¹⁰ Yandi bingwa kwa Nzambi nganga nene, bonso kinganga ya Melekisedeki.

¹¹ Beto ikele na mambu mingi kutuba sambu na yandi, ikele mpasi kutendula sambu na beno imene kubaka makutu ya kanga.

¹² Kadi tuka ntama beno fwiti kuvanda banlongi, kansi beno ikele na mfunu diaka na muntu longa beno luyantiku ya nsamu ya Nzambi; beno imene kituka bonso bana ya ikele na nsatu ya mabele, kansi madia ya ngolo ve. 1 Kol. 3:1

¹³ Kadi konso muntu ya baka mabele, yandi imene kwiza ngolo ve mu mambu ya lunungu, kadi yandi ikele mwana kaka,

¹⁴ kansi madia ya ngolo ikele kwa bau ya imene kukula, ikele bau ya sadila mabanza ya bau zaba mambu ya mbote ye ya mbi.