Ebeleo 4 - Le Nouveau Testament en Kikwango 1950

Nsilulu ya luvundu ya mbote

¹ Mpilayai, sambu na beto ikele na nsilulu kukota mu luvundu ya yandi, bika beto keba na mosi ya beno konda ve kubaka yo.

² Kadi kieleka, nsamu ya mbote samunwaka kwa beto bonso kwa bau, kansi ndinga ya bau kuwaka vandaka mfunu ve kwa bau, sambu na bau kondaka kintwadi mu lukwikilu, ya bau ya bakaka yau.

³ Kadi beto ya kwikilaka ikele kota mu luvundu, bonso yandi tubaka: Mpilamosi mono kudiaka ndefi mu makasi ya mono; Bau takota mu luvundu ya mono ve, kansi bisalu imene kusalwa tuka kutula ya lufulu ya nsi.

⁴ Kadi sika yankaka yandi tubaka sambu na kilumbu ya nsambwadi: Ye Nzambi vundaka kilumbu ya nsambwadi; mu bisalu ya yandi yonso; 1 Mose 2:2

⁵ na sika yai diaka: Bau takota ve mu luvundu ya mono. Nk. 95:11

⁶ Yo ikele mpilayai, bankaka takota mu yo, kansi bau ya bakaka nsamu mbote ntete kotaka ve sambu na nkolomono.

⁷ Buna yandi tula kilumbu diaka: Bubu yai, kutuba mu Davidi bu ntangu mingi imene kuluta, bonso bau tubaka ntete: Bubu yai, bu beno kuwa ndinga ya yandi, kanga mintima ya beno ngolo ve.

⁸ Kadi kana Yosue pesaka bau luvundu, buna yandi tondaka ve kutuba diaka sambu na kilumbu yankaka. 5 Mose 31:7; Yos. 22:4

⁹ Mpilayai, luvundu ya kilumbu ya luvundu bika kwa bantu ya Nzambi.

¹⁰ Kadi yandi ya kotaka mu luvundu ya yandi, yandi mpe imene kuvunda mu bisalu ya yandi, bonso Nzambi mu bisalu ya yandi. Nzai. 14:13

Bombidila sambu na kota mu luvundu

¹¹ Mpilayai, bika beto vibidila kukota mu luvundu yina, na muntu mosi kubwa ve mu nkolomono mutindu mosi ya bau.

¹² Kadi ndinga ya Nzambi ikele moyo, ye ngolo, ye makasi ya yo luta makasi na konso mbele ya makasi ya lweka zole, ye ikele kutobula ti kukaba mwela ye mpeve, ye takabwa madikulu ye wongongo, ye ikele na ngolo kufundisa mabanza ye makani ya ntima; Yes. 49:2; 1 Pet. 1:23

¹³ kima ikele ve ya kuswama na luse ya yandi, kansi bima yonso ikele kinkonga ye kumonika nantwala na meso ya yandi, na yandi beto yidika mambu.

¹⁴ Buna sambu na beto ikele na nganga nene ya luta, ya lutaka mu mazulu, Yesu Mwana ya Nzambi, bika beto simba ngolo kitemo ya beto ya lukwikilu. 2 Tes. 2:15; Eb. 3:1; 7:26; 8:3; 9:11, 24; 10:23

¹⁵ Kadi beto ikele na nganga nene ve ya lenda ve kuwila beto nkenda mu lebakana ya beto, kansi mosi ya imene kuyunswa mu mambu yonso bonso beto, kansi yandi salaka masumu ve. Eb. 2:17; 5:2

¹⁶ Mpilayai, beto kwenda na kikesa ku kiti ya nlemvo, na beto lenda kubaka nkenda ye mona nlemvo kusadisa beto mu ntangu ya nsatu.