Ebeleo 3 - Le Nouveau Testament en Kikwango 1950

Bombidila bau tala kwa Yesu

¹ Sambu na yai, bampangi ya nlongo, bintwadi mu mbokolo ya zulu, beno tala Ntumwa ye Nganga nene ya kitemo ya lukwikilu ya beto, yandi ikele Yesu.

² Yandi vandaka ya kwikama kwa yandi ya salaka yandi, bonso Mose mpe mu nzo ya yandi yamvimba. 4 Mose 12:7

³ Kadi yandi lungaka kubaka nkembo ya luta yina ya Mose, mpilamosi ntungi ya nzo luta nzo mu nzitusu.

⁴ Kadi banzo yonso ikele kutungwa kwa muntu; kansi ya tungaka bima yonso ikele Nzambi.

⁵ Mose vandaka ya kwikama mu nzo ya yandi yamvimba bonso sielo, kusonga kitemo mu mambu yina ya bau zola kutuba, 4 Mose 12:7

⁶ kansi Klisto bonso Mwana vandaka na mawete mu nzo ya yandi yonso. Beto ikele nzo ya yandi, kana beto simba kikesa ya nkembo ya vuvu ya beto ti nsuka. Mat. 24:13; 1 Kol. 3:16; 1 Tim. 3:15; Eb. 3:14; 10:21

Konda nkolomono

⁷ Sambu na yai, bonso Mpeve Yanlongo tubaka: Bubu yai kana beno kuwa ndinga ya yandi, Nk. 95:7

⁸ kanga mintima ya beno ngolo ve, bonso mu mfwemono mu kilumbu ya mpukumunu mu nsi ya mpamba, 4 Mose 20:1

⁹ bu batata ya beno yunsaka mono ngolo ye monaka bifu ya mono mvu makumi iya.

¹⁰ Sambu na yai mono vandaka na makasi kwa mbandu yai, ye tubaka: Ntangu yonso bau ikele kuvila mu ntima ya bau, kansi bau zaba nzila ya mono ve,

¹¹ mpilayai, mono kudiaka ndefi mu makasi ya mono: Bau takota mu luvundu ya mono ve.

¹² Beno bampangi, tomatala na mosi ya beno vanda ve na ntima ya mbi ya konda lukwikilu, ye katuka na Nzambi ya ikele na moyo, Eb. 12:15

¹³ kansi beno longana kilumbu na kilumbu, bu beto ikele na kilumbu yai, na ntima ya mosi ya beno ve kwiza ngolo sambu na lukusu ya masumu.

¹⁴ Kadi beto kitula bintwadi ya Klisto, kana beto simba vuvu ya beto ya ntete ngolo ti nsuka. Eb. 3:6

¹⁵ Bu yo tubwa: Bubu yai bu beno kuwa ndinga ya yandi, beno kanga mintima ya beno ngolo ve, bonso mu mfwemono:

¹⁶ kadi banani baminaka bu bau kuwaka mambu ya yandi ? Yo vandaka yonso ve ya basikaka mu nsi ya Ngipiti na Mose ?

¹⁷ Na banani yandi vandaka na makasi mvu makumi iya ? Ikele bau ya salaka masumu, nitu ya bau kubwaka mu nsi ya mpamba. 4 Mose 14:29

¹⁸ Kansi kwa banani yandi kudiaka ndefi ? Bau takota mu luvundu ya yandi ve, yandi kudiaka ndefi kwa bau ya kolamaka. Yoa. 3:36

¹⁹ Beto mona na bau kondaka kukota sambu na bau kondaka lukwikilu. Eb. 4:6