Ebeleo 2 - Le Nouveau Testament en Kikwango 1950

Kukeha mambu ya Klisto

¹ Sambu na yai beto fwiti kuluta kukeba mambu ya beto kuwaka, na beto bika yau ve.

² Kadi kana ndinga ya tubwaka mu banjo vandaka ngolo, ye kana kufwa nsiku yonso ye nkolomono yonso vutulwaka ndinda ya lunga, 5 Mose 27:26; Ngal. 3:19

³ mpila nki beto tatina kana beto konda kubaka mpulusu yai yanene ? Mfumu samunaka yo ntete, ye bau ya kuwaka yau sikidikisaka yau kwa beto. Eb. 12:25

⁴ Nzambi mpe siamisaka kitemo ya bau mu bidimbu, ye mu nyitukulu, ye mu mambu ya ngolo ya mutindu mingi ye mu bankailu ya Mpeve Yanlongo, mpilamosi luzolo ya yandi.

Kudikulumusa ye kutombolwa ya Yesu

⁵ Kadi Nzambi tulaka nsi ya kwiza, yina ya beto tuba, nansi ya luyalu ya banjo ve.

⁶ Kansi muntu yankaka songaka kitemo sika nkaka, kutuba: Muntu ikele nki, na nge ikele kubambuka yandi; keti mwana ya muntu na nge ikele kulunda yandi. Nk. 8:4

⁷ Nge tulaka yandi nansi ya banjo ntangu fioti, nge pesaka yandi koloa ya nkembo ye ya nzitusu, ye tulaka yandi va zulu ya bisalu ya maboko ya nge. Nk. 8:5

⁸ Nge lemvulaka bima yonso nansi ya makulu ya yandi, kadi bu yandi lemvulaka bima yonso kwa yandi, yandi bikaka kima ve ya konda kulemvula kwa yandi. Kansi ti na ntangu yai beto imene kumona ve bima yonso kulemvulwa kwa yandi. Nk. 8:6; Mat. 28:18; Bis. 2:36; 1 Kol. 15:27; Ef. 1:22; Fili. 2:9

⁹ Kansi beto ikele kumona yandi ya salwa nansi ya banjo ntangu fioti, yandi ikele Yesu, yandi monaka mpasi ye lufwa, yandi tulwa koloa ya nkembo ye ya nzitusu, yandi salaka yai na yandi mekaka mpasi ya lufwa sambu na bantu yonso, mu nlemvo ya Nzambi.

¹⁰ Kadi yo lungaka yandi sambu na kwa yandi, ye mu yandi bima yonso ikele; sambu na kutwala bana mingi kwa nkembo, yandi kulungisa mfumu ya mpulusu mu mpasi mingi.

¹¹ Kadi yandi ya tula nlongo ye bau ya tulwa nlongo, yonso basikaka mu mosi; sambu na mambu yai, yandi kuwa nsoni ve kubinga bau bampangi, kutuba:

¹² Mono tasamuna nkumbu ya nge kwa bampangi ya mono; nakati ya dibundu, mono tayimbila nge nzitusu. Nk. 22:22

¹³ Diaka: Mono tatula vuvu mu yandi, diaka: Tala mono ye bana ya Nzambi pesaka mono. 2 Sam. 22:3; Yes. 8:17, 18

¹⁴ Buna, bu bana ikele bintwadi mu menga ye nsuni, buna yandi mpe bakaka mutindu mosi, buna mu lufwa yandi lenda kubevisa yandi ya vandaka na ngolo ya lufwa, yandi ikele diable. Yoa. 1:14; 1 Kol. 15:26, 54; 2 Tim. 1:10

¹⁵ Klisto lenda kuvulusa bau yonso ya vandaka mu kimpika, mu boma ya lufwa mu luzingu yonso ya bau.

¹⁶ Kadi mu kieleka yandi sadisa banjo ve, kansi yandi sadisa bana ya Abalahami.

¹⁷ Mpilayai yo lunga yandi kufwanikiswa bonso bampangi ya yandi mu mambu yonso, na yandi lenda kwiza nganga ya nene ya nkenda ye ya kwikama mu kisalu ya Nzambi, kufuta masumu ya bantu. Eb. 4:15; 5:2

¹⁸ Kadi bu yandi kibeni monaka mpasi mu kuyunswa, buna yandi lenda kusadisa bau ya yunswa.