Ebeleo 12 - Le Nouveau Testament en Kikwango 1950

Bedisa bau nwana bonso Yesu

¹ Mpilayai, sambu na beto ikele na dituti yina yanene ya bantemo ya zunga beto, bika beto katula kizitu yonso ye masumu ya ikele kusimba beto nswalu, ye bika beto tambula mu mvibudulu mu nzila nantwala na beto;

² beto tala kwa Yesu, mfumu ye mulungisi ya lukwikilu ya beto, sambu na kiese ya tulwaka nantwala na yandi, yandi vibidilaka kulunsi, yandi monaka yo nsoni ve, ye yandi imene kuvanda na diboko ya kibakala ya kiti ya Nzambi. Eb. 1:3; 2:10

³ Kadi banza sambu na yandi ya vibidilaka mu mbangika ya mpilayai ya bankwa masumu, na beno lembwa ve, ye konda kikesa ve mu mwela ya beno.

Moniswa ya mpasi ikele ndongi ya mbote

⁴ Kadi ti ntangu yai beno nwanaka na masumu ve ti menga basika. 1 Kol. 10:13

⁵ Beno vilaka malongi ya tubaka kwa beno bonso bana: Mwana ya mono, buya malongi ya Mfumu ve, ye lembwa ve bu yandi monisa nge mpasi. Bing. 3:11; Yak. 5:17; Nzai. 3:19

⁶ Yandi ikele kulonga bau ya yandi zola, ye bula konso mwana ya yandi baka.

⁷ Bu beno vibidila ndongi, Nzambi ikele kusala kwa beno, bonso kwa bana ya yandi. Kadi mwana nki ikele ya tata ikele kupesa ndongi ve ?

⁸ Kansi kana beno konda ndongi, ya yonso ikele na yo ntuadi beno ikele bana ya bizumba, ye beno ikele bana ya kieleka ve.

⁹ Diaka: Batata ya beto ya nsuni pesaka beto ndongi, ye beto zitisaka bau, yo luta mbote kulemvuka kwa Tata ya bampeve ye vanda na moyo.

¹⁰ Kadi bau longaka beto bilumbu fioti, mpilamosi bau banzaka ikele mbote, kansi yandi sambu na kusadisa beto, na beto lenda kuvanda kintwadi ya nlongo ya yandi.

¹¹ Ndongi yonso ikele kumonwa mu ntangu na yau, kiese ve, kansi ntantu, kansi nanima yo buta mabundu ya yenge ya lunungu kwa bau ya yikama na yo.

Bombidila bau konda kulembwa

¹² Mpilayai, beno siamisa maboko ya lebakana, ye makungunu ya zakama. Yes. 35:3

¹³ Ye sungika tunzila ya makulu ya beno, na yina ya tembila tavengumuka ve mu nzila, kansi tabeluka. Bing. 4:26

¹⁴ Beno landa yenge na bantu yonso, ye vanda ya nlongo, kadi yandi ya konda yo tamona Mfumu ve. Mat. 5:9; Lom. 12:18; 1 Tim. 5:22

¹⁵ Tomatala na muntu katuka ve na nlemvo ya Nzambi, keti mwanzi ya ndudi tamena ye monisa beno mpasi, ye mingi sumunwana yo. 5 Mose 29:18; 1 Kol. 6:1; Eb. 3:12

¹⁶ Tomatala na muntu vanda ve, nkwa bizumba keti muntu ya saula bonso Esau ya tekaka kimbuta ya yandi na ndambu ya madia. 1 Mose 25:31

¹⁷ Kadi beno zaba, nanima yandi mpe, bu yandi zolaka kuvingila difwa ya nsakumunu, yandi buywaka, sambu na yandi monaka ve nzila ya kupindula mabanza ya tata ya yandi, kansi yandi sosaka yo na mansanga.

Kiese ya bau ya kwikila

¹⁸ Kadi beno imene kwiza ve mfinama na mongo ya lenda kusimbwa, Ye ikele kulema na tiya, ye kwa ndombe ye tombe ye kitembo 2 Mose 19:12; 5 Mose 4:10; 5:22

¹⁹ ye ndinga ya mpungi, ye ndinga ya mambu, bu bantu kuwaka ndinga yina, bau lombaka na ndinga yina tatuba kwa bau diaka ve. 2 Mose 19:16; 20:19; 5 Mose 5:25; 18:16

²⁰ Kadi bau lendaka ve kubaka yina ya sikidikiswaka: Kana mbizi mpe kusimba mongo, bau takufwa yandi na matadi.

²¹ Monameso yina vandaka ya boma mingi, Mose tubaka: Mono ikele na boma mingi ye ikele kuzakama.

²² Kansi beno imene kwiza kwa mongo ya Sioni ye kwa mbanza ya Nzambi ya ikele na moyo, ikele Yelusalemi ya Zulu, ye kwa kibuka ya banjo ya konda kutangwa, Ngal. 4:26; Nzai. 3:12; 12:2, 10

²³ kwa dibundu ya bana ya mbuta ya sonikwa mu zulu, ye kwa mfundisi, ikele Nzambi ya bantu yonso, ye kwa bampeve ya lunungu ya imene kulunga,

²⁴ kwa Yesu Nwawasi ya luwawanu yampa, ye kwa menga ya lemba ya tuba mbote ya luta yina ya Abeli. 1 Mose 4:10; 1 Tim. 2:5; Eb. 8:6; 9:15; 10:22

Ndongisila na konda kukatuka mu Nzambi

²⁵ Tomatala, beno buya ve yandi ya tubaka: kadi kana bau lendaka ve kutina mfundusu, bu bau buyaka yandi ya longaka bau va ntoto, buna beto mpe lenda ve kutina, kana beto tula nima kwa yandi ya tubaka mambu tuka zulu.

²⁶ Ntangu yina ndinga ya yandi nikisaka ntoto, kansi ntangu yai, yandi silaka kutuba: Mono tanikisa ntoto kaka ve, kansi zulumpe.

²⁷ Kansi ndinga yai, mbala mosi diaka songa kukatula ya bima yina ya lenda kunikiswa, ikele mpilamosi bima ya salwaka, na bima yina ya lenda ve kunikiswa tavanda ngolo. Mat. 24:35; 2 Pet. 3:10

²⁸ Mpilayai, sambu na beto ikele kubaka kimfumu ya lenda ve kunuka, bika beto pesa matondo, ye beto fwiti kusadila Nzambi, bonso yandi zola, mu luzitu yonso ye boma.

²⁹ Kadi Nzambi ya beto ikele tiya ya kumanisa. 5 Mose 4:24; 9:3