Ebeleo 11 - Le Nouveau Testament en Kikwango 1950

Ngolo ya lukwikilu monika mu bau ya vanda na lukwikilu ya nene

¹ Kansi lukwikilu ikele vuvu ya yina ya beto vingila, ye mpesulu ya bima ya konda kumonika,

² kadi sambu na yau, kitemo tubwaka kwa bambuta.

³ Mu lukwikilu beto zaba bansi salwaka na ndinga ya Nzambi, buna yina ya beto ikele kumona, salwaka ve na bima ya monika. 1 Mose 1:1; Nk. 33:6; 148:5

⁴ Mu lukwikilu Abeli pesaka nkailu kwa Nzambi, ya luta yina ya Kaini mbote, yo vandaka kitemo kwa yandi, na yandi vandaka nkwa lunungu, ye Nzambi pesaka kitemo mu nkailu ya yandi, ye mu yo yandi ikele kutuba, bu yandi imene kufwa. 1 Mose 4:4

⁵ Mu lukwikilu Hanoki katulwaka, na yandi tamona lufwa ve, yandi vandaka ve, sambu na Nzambi katulaka yandi, kadi ntete yandi katulwaka ve, kitemo tubwaka sambu na yandi, na Nzambi zolaka yandi.

⁶ Kansi muntu ya konda lukwikilu lenda ve kuyangidisa Nzambi, kadi yandi ya kwiza kwa Nzambi fwiti kukwikila yandi ikele, ye ikele kufuta bau ya sosa yandi.

⁷ Mu lukwikilu Nzambi luengisaka Noa sambu na bima ya monikaka ntete ve, ye yandi kwikilaka Nzambi, ye salaka nzaza kuvulusa nzo ya yandi, mu yo yandi bedisaka nsi, ye kitukaka mvingidi ya difwa ya lunungu yina, ya ikele mu lukwikilu. 1 Mose 6:8

⁸ Mu lukwikilu Abalahami, bu yandi bingwaka, yandi lemvukaka ye kwendaka ku sika ya yandi tabaka mpilamosi difwa, ye yandi basikaka ye zabaka ve sika ya yandi ikele kwenda. 1 Mose 12:1

⁹ Mu lukwikilu yandi vandaka nzenza mu ntoto ya nsilulu, bonso mu ntoto ya nzenza, yandi vandaka mu banzo ya lele sikamosi na Isaki ye Yakobi ya vandaka bamvingidi ya difwa sikamosi na yandi mu nsilulu mosi.

¹⁰ Kadi yandi vingilaka mbanza yina ya ikele na lufulu, mutungi ye musadi ya yo ikele Nzambi. Eb. 12:22; 13:14

¹¹ Mu lukwikilu Sala kibeni bakaka ngolo kuyimita, bu yandi imene kuluta mvu mingi, kadi yandi banzaka, yandi ya silaka nsilulu ikele ya kwikama. 1 Mose 17:19; Lom. 4:19

¹² Mpilayai, kwa muntu ya vandaka bonso ya kufwa, butwaka mingi bonso bambwetete ya zulu mu ntalu, ye bonso zelo ya konda kutangwa na simu ya mbu. 1 Mose 15:5; 22:17

¹³ Bayai yonso kufwaka mu lukwikilu, bu bau imene kubaka ve, yina ya silwaka kwa bau, kansi bau monaka yau ntama, ye pesaka yau mbote, ye bau tubaka kitemo na bau ikele banzenza ye bantambudi awa va ntoto. 1 Mose 23:4; Nk. 39:13; 119:19

¹⁴ Kadi bau ya tuba mambu ya mpilayai ikele kusonga bau ikele kusosa ntoto ya bau kibeni.

¹⁵ Ye kana bau banzaka sambu na ntoto yina ya bau basikaka, buna bau vandaka na ntangu ya vutuka.

¹⁶ Kansi ntangu yai bau ikele kusosa ntoto ya luta mbote, yo ikele, yina ya zulu. Mpilayai Nzambi ikele kuwa nsoni ve kubingwa Nzambi ya bau, sambu na yandi imene kuyidikila bau mbanza. 2 Mose 3:6

¹⁷ Mu lukwikilu Abalahami, bu yandi yunswaka, pesaka Isaki va zikwa, yandi pesaka mwana ya yandi mosi kaka, ikele yandi ya yandi bakaka mu nsilulu, 1 Mose 22:1

¹⁸ yo tubwaka kwa yandi: Mu Isaki nkuna ya nge tatangwa, 1 Mose 21:12

¹⁹ yandi zabaka, Nzambi lenda mpe kufulukisa yandi na bafwa, mpilayai yandi bakaka yandi diaka mu kifwani.

²⁰ Mu lukwikilu Isaki sakumunaka Yakobi ye Esau sambu na bima yina ya ikele kwiza. 1 Mose 27:27, 38

²¹ Mu lukwikilu Yakobi, bu yandi vandaka mfinama ku lufwa, sakumunaka bana ya Yosefi mosi mosi, ye sambilaka, bu yandi yekemaka va nkawa ya yandi. 1 Mose 48:1

²² Mu lukwikilu Yosefi, bu yandi vandaka mfinama na lufwa, tubaka sambu na kubasika ya bana ya Isaeli, yandi sikidikisaka bau sambu na mikuwa ya yandi. 1 Mose 50:24

²³ Mu lukwikilu Mose, bu yandi butukaka, swekwaka ngonda tatu kwa tata ye mama ya yandi, kadi bau monaka yandi ikele mwana ya mbote, bau titaka nsikudukusu ya ntinu ve. 2 Mose 1:16, 22; 2:1

²⁴ Mu lukwikilu Mose, bu yandi imene kukula, buyaka kubingwa mwana ya mwana nkento ya Falao, 2 Mose 2:10

²⁵ yandi lutaka kusola kumoniswa mpasi sikamosi na bantu ya Nzambi na kumona kiese ya masumu ntangu ndambu,

²⁶ kadi yandi banzaka, kusaula ya Klisto ikele kimvwama mingi ya luta balundulu ya Ngipiti, kadi yandi talaka ku nsendo ya ikele nantwala.

²⁷ Mu lukwikilu yandi bikaka Ngipiti, ye titaka makasi ya ntinu ve, kadi yandi vibidilaka bonso yandi monaka yandi ya konda kumonika.

²⁸ Mu lukwikilu yandi salaka Pake ye ndembolo ya menga, na mufwi ya bana ya mbuta lenda kuvalakana bau ve. 2 Mose 12:1

²⁹ Mu lukwikilu bau lutaka nakati na mbu ya Mbwaki bonso nantoto ya kuyuma, kansi bantu ya Ngipiti mekaka mpilayai ye bau minwaka. 2 Mose 12:21

³⁰ Mu lukwikilu lupangu ya Yeliko kubwaka, bu yo zungwaka bilumbu nsambwadi. Yos. 6:2

³¹ Mu lukwikilu Lahabi, nkwa bizumba, kufwaka ve sikamosi na bankolami, sambu na yandi bakaka banlangididi mu yenge. Yos. 2:1; 6:23

³² Nki mono tatuba diaka ? Sambu na ntangu tavanda nkufi, kana mono tuba sambu na Ngidioni, Balaki, Samisoni, Yefeti, Davidi, Samueli ye bambikudi, 1 Sam. 1:1; 16:1; Nk. 4:1; 6:1; 11:1; 13:1

³³ mu lukwikilu bau bedisaka bantinu, bau salaka lunungu, bau bakaka bansilulu, bau kangaka minoko ya bankosi,

³⁴ bau zimaka ngolo ya tiya, bau vuluswaka tuka meno ya mbele ya mvita, bau siamiswaka mu lebakana, bau vandaka ngolo mu mvita, bau tinisaka bibuka ya basoldat ya banzenza.

³⁵ Bankento bakaka bafwa ya bau mu mfulukulu, bankaka moniswaka mpasi mingi, kansi bau zolaka ve mpulusu, na bau lenda kubaka mfulukulu ya luta mbote.

³⁶ Bankaka saulwaka, bau bulwaka fimbu, bau tulwaka mu minyololo ye mu boloko.

³⁷ Bau loswaka matadi, bau yunswaka, bau zengwaka nakati, bankaka kufwaka na mbele ya mvita, bau zietaka mu mikanda ya mameme ye bankombo, bau kondaka bima yonso, bau moniswaka mpasi, ye tatimiswaka.

³⁸ Nsi lungaka kwa bau ve. Bau tambulaka mu nsi ya mpamba ye mu miongo ye mu mabulu ya matadi ye mu mabulu ya ntoto.

³⁹ Kitemo tubwaka kwa bau yonso mu lukwikilu ya bau, kansi bau bakaka ve yina ya silwaka kwa bau.

⁴⁰ Nzambi imene kuyidikila beto mambu yankaka ya luta mbote, sambu na kondwa beto, bau lenda ve kuvonda yalunga.