Ebeleo 10 - Le Nouveau Testament en Kikwango 1950

Ndungunu ikele mu nkailu ya zikwa ve, kansi mu nkailu ya Klisto

¹ Kadi nsiku ikele kini ya yina ya mbote ya ikele kwiza, kansi ikele nitu ya yo kibeni ve, bankailu ya peswa mvu ya mvu, ntangu na ntangu lenda ve kulungisa bau ya kufinama.

² Kana ve bau bikaka ve kuyoka nkailu, kana basambidi vedisaka kima kulu, bau lenda kuvanda na kansansa sambu na masumu diaka ve.

³ Kansi mu bankailu yina kibambukilu ya masumu ikele mvu ya mvu.

⁴ Kadi menga ya bangombe babakala ye ya bankombo lenda ve kukatula masumu.

⁵ Sambu na yai, bu yandi kwizaka mu nsi, yandi tubaka: Nkailu ye nkailu ya yokwa nge tondaka ve, kansi nge yidikilaka mono nitu. Nk. 40:6; 51:16

⁶ Nge tonda ve nkailu ya yokwa ye nkailu ya masumu.

⁷ Buna mono tubaka: Tala, mono ikele kwiza, mu nkanda yo sonamaka sambu na mono: Kusala luzolo ya nge, O Nzambi.

⁸ Buna yandi tubaka: Nkailu ye nkailu va zikwa ye nkailu ya yokwa yamvimba ya nkailu ya masumu nge zola ve, ye nge mona kiese mu yau ve, yau ikele kupesa bonso ikele mu nsiku.

⁹ Buna yandi tubaka: Tala, mono kwizaka kusala luzolo ya nge. Yandi katulaka yantete na yandi lenda kusikidikisa yazole.

¹⁰ Mu luzolo yina beto imene kutulwa nlongo mu peswa ya nitu ya Yesu Klisto mbala mosi. Kolo. 1:22; 1 Pet. 2:24

¹¹ Ye nganga yonso telemaka lumbu na lumbu kusala kisalu ya bau, ye pesaka ntangu mingi nkailu mutindu mosi, ya lenda ve katula masumu ta mbala mosi ve.

¹² Kansi yandi, bu yandi imene kupesa nkailu mosi kaka sambu na masumu, yandi vandaka kimakulu na diboko kibakala ya Nzambi, Eb. 1:3, 13; 8:1

¹³ tuka ntangu yai, yandi ikele kuvingila, ti bambeni ya yandi imene kutulwa mfiduku ya makulu ya yandi. Nk. 110:1; Mat. 22:44; 1 Kol. 15:25

¹⁴ Kadi mu nkailu mosi kaka, yandi imene kulungisa mvu ya mvu bantu ya tulwa nlongo.

¹⁵ Mpeve Yanlongo mpe ikele kitemo kwa beto, bu yandi tubaka:

¹⁶ Yai ikele luwawanu ya mono tasala na bau, nanima na bilumbu yina, Mfumu ikele kutuba: Mono tatula bansiku ya mono mu ntima ya bau, ye mono tasonika yau mu mabanza ya bau mpe, Yel. 31:31

¹⁷ masumu ya bau ye kimpumbulu ya bau mono tabambuka yau diaka ve.

¹⁸ Kansi sika ya mvidusu ya masumu ikele, mambu ya nkailu ya masumu ikele diaka ve.

Kubedisa bau kufinama kwa Nzambi

¹⁹ Mpilayai, beno bampangi, beto ikele na kikesa kukota mu kinlongo mu menga ya Yesu, Eb. 4:14; 9:7

²⁰ mu nzila yampa ya moyo, ya yandi tudilaka beto mu ngumbu, yo ikele mu nsuni ya yandi,

²¹ beto ikele na nganga nene yandi ikele kuyala nzo ya Nzambi,

²² bika beto kufinama mu ntima ya kieleka mu lukwikilu ya lunga, ntima ya beto sukulwa tuka kansansa ya mbi, ye nitu ya beto sukulwa mu masa ya vedila;

²³ bika beto simba ngolo kitemo ya lukwikilu ya beto na yo vanda ntembe ve, kadi yandi ya tulaka nsilulu ikele ya kwikama

²⁴ Bika beto banzana kusadisana kuzola ye bisalu ya mbote:

²⁵ kubika ve kutakana ya beto mu dibundu mpilamosi ikele kifu ya bankaka, kansi longana ye luta kusala yo, bu beno mona kilumbu yina ikele mfinama. Lom. 13:11; 2 Pet. 3:9

Kana muntu kwikila Klisto ve, mfundusu vingila yandi

²⁶ Kadi, kana beto zola kusala masumu, bu beto imene kubaka ngangu ya kieleka, buna nkailu yankaka bika diaka ve sambu na masumu,

²⁷ kansi kutita ya mpasi ya ngolo ya mfundusu ye makasi ya tiya ya tamanisa bambeni. Yes. 26:11; Sef. 1:18

²⁸ Muntu ya kufwaka nsiku ya Mose, bau ikele kufwa yandi mu kondwa ya nkenda, mu kitemo ya bantu zole keti tatu; 4 Mose 35:30; 5 Mose 17:6; 19:15

²⁹ buna mpasi nki ya luta talunga yandi ya diata Mwana ya Nzambi, ye yandi banza menga ya luwawanu, ya yandi tulwaka nlongo ikele kima ya sumuka, ye yandi saula Mpeve ya nlemvo ?

³⁰ Kadi beto zaba yandi ya tubaka: Ndinda ikele ya mono, mono tavutula; ye diaka: Mfumu tafundisa bantu ya yandi. 5 Mose 32:35; Nk. 135:14; Lom. 12:19

³¹ Ikele boma mingi kubwa mu maboko ya Nzambi ya moyo,

Kuvanda na mvibudulu

³² Beno bambuka bilumbu ya ntete, bu beno kienzulwaka, beno vibidilaka mu ndwanunu ya mpasi mingi,

³³ bu beno tulwaka bonso kima ya kutala mu mafingu ya bampasi ya ngolo, ye beno vandaka na kintwadi na bau ya moniswaka mpasi mutindu mosi.

³⁴ Kadi beno wilaka bantu ya boloko nkenda, ye vandaka na kiese mu kubotulwa ya bima ya beno, sambu na beno zabaka, beno kibeni ikele na bima ya tavanda mvu ya mvu. Mat. 5:12; 6:19; 19:21

³⁵ Mpilayai, losa ve kikesa ya beno, yo ikele na mvutulu ya nsendo ya nene.

³⁶ Kadi beno ikele na nsatu ya mvibudulu, bu beno imene kusala luzolo ya Nzambi, beno lenda kubaka nsilulu.

³⁷ Kadi ntangu fioti kubika, buna yandi ya ikele kwiza takwiza, ye tavingila ve. Hab. 2:3

³⁸ Kansi nkwa lunungu ya mono tavanda na moyo mu lukwikilu; kana yandi vutuka nanima, mwela ya mono ikele na luzolo mu yandi ve. Hab. 2:4

³⁹ Kansi beto ikele nakati ya bau ve ya vutuka nanima ku mbungulu, kansi ya bau ya kwikila mu kuvulusa ya moyo ya bau.