Ebeleo 1 - Le Nouveau Testament en Kikwango 1950

Klisto luta banjo mu nene

¹ Nzambi tubaka mu nsungi ya nkulu kwa batata ya beto mu bambikudi mu mambu mingi ye mu mutindu mpila ya mpila.

² Mu bilumbu yai ya nsuka, yandi tubaka kwa beto mu Mwana ya yandi, ya yandi tulaka mvingidi ya difwa ya bima yonso. Mu yandi mpe yandi salaka bansi; 4 Mose 12:6; Yoa. 1:3; Lom. 8:17; Kolo. 1:15

³ yandi ikele ntentina ya nkembo ya Nzambi, ye kifwani ya mutindu ya yandi, ye yandi simba bima yonso mu ndinga ya ngolo ya yandi. Buna, bu yandi manisaka kuvedisa masumu, yandi vandaka na diboko kibakala ya Nkwa nene mu zulu. Nk. 110:1; Eb. 8:1

Klisto luta banjo

⁴ yandi luta banjo, sambu na yandi bakaka nkumbu ya luta bankumbu ya bau mu nzitusu.

⁵ Kadi kwa nani ya banjo yandi tubaka konso ntangu: Nge ikele mwana ya mono, kilumbu yai mono imene kubuta nge ? Diaka: Mono tavanda tata kwa yandi, ye yandi tavanda mwana kwa mono ? 2 Sam. 7:14; Nk. 2:7; Eb. 5:5

⁶ Bu yandi twala diaka mwana ya yandi ya mbuta mu nsi, yandi tuba: Banjo yonso ya Nzambi, bika bau kusambila yandi.

⁷ Sambu na banjo, yandi tuba: Yandi kitula banjo ya yandi mupepe, yandi kitula basielo ya yandi bonso nlemo ya tiya. Nk. 14:4

⁸ Kansi sambu na Mwana yandi tuba: Kiti ya nge ya nkembo, O Nzambi, ikele kuvanda mvu ya mvu, ye nkawa ya kintinu ya nge ikele nkawa ya lunungu. Nk. 45:6

⁹ Nge zola lunungu, kansi kimpumbulu nge kuwa kimbeni, mpilayai Nzambi, Nzambi ya nge, imene kusita nge mafuta mingi ya kiese, ye bau ya kuvanda na nge ndambu.

¹⁰ Ye: Nge Mfumu, mu luyantiku nge tulaka lufulu ya ntoto, ye mazulu ikele bisalu ya maboko ya nge. Nk. 102:26

¹¹ Yau takufwa, kansi nge ikele kuvanda, yau yonso takituka nkulu bonso mvwatu, Nk. 102:27

¹² bonso kazaku nge tabundika yau, bonso mvwatu yau tapinduka, kansi nge ikele kupinduka ve, bamvu ya nge ikele kumana ve. Nk. 102:28

¹³ Kansi kwa nani ya banjo yandi tubaka konso ntangu: Vanda na diboko kibakala ya mono, ti mono tula bambeni ya nge mfiduku ya makulu ya nge ? Nk. 110:1; Mat. 22:44; Bis. 2:34; 1 Kol. 15:25; Eb. 10:12

¹⁴ Kadi bau yonso ikele bampeve ya kisielo ya fidiswa kusadila bau ya tavingila difwa ya mpulusu. Nk. 34:7; 91:11