Bisalu Ya Bantumwa 9 - Le Nouveau Testament en Kikwango 1950

Sauli vuluswa

¹ Sauli bika ve kumonisa mpasi ye kufwa banlonguki ya Mfumu, yandi kwendaka kwa nganga nene, Bis. 7:58; 8:1; Ngal. 1:13; 1 Tim. 1:13

² yandi lombaka nkanda ku nata ku Damasko ku banzo ya sambilu, kana yandi mona bankaka ya ikele kulanda mambu yai, kana babakala keti bankento, yandi lenda kutwala bau ya kanga ku Yelusalemi. Bis. 22:5; 26:12

³ Bu yandi kwendaka na nzila, bu yandi mfinamaka ku Damasko, nswalu mwini katuka na zulu ye kienzulaka ndambu yonso ya yandi.

⁴ Yandi kubwaka va ntoto ye kuwaka ndinga kutuba kwa yandi: Sauli, Sauli, sambu na nki nge zoma mono ?

⁵ Yandi tubaka: Mfumu, nge ikele nani ? Yandi tubaka: Mono ikele Yesu ya nge ikele kuzoma. 1 Kol. 15:8

⁶ Telema, kwenda kukota mu mbanza, ye yo tasongwa nge mambu ya nge fwiti kusala.

⁷ Babakala ya kwendaka na yandi telemaka kibaba, bau kuwaka ndinga kansi bau monaka muntu ve.

⁸ Sauli telemaka na ntoto, kansi bu meso ya yandi kangulwaka, yandi monaka kima ve, bau simbaka yandi na diboko ye twalaka yandi ku Damasko.

⁹ Bilumbu tatu yandi monaka ve ye kudiaka ye kunwaka ve.

¹⁰ Nlonguki mosi vandaka mu Damasko, nkumbu ya yandi Anania. Mfumu tubaka kwa yandi mu mona-meso: Anania. Yandi tubaka: Mono ikele awa, Mfumu.

¹¹ Mfumu tubaka kwa yandi: Telema, kwenda mu nzila ya bingwa yasungama, yuvula na nzo ya Yuda, sambu na muntu nkumbu ya yandi Sauli, yandi katuka na Talaso; kadi tala, yandi ikele kulomba.

¹² Yandi monaka muntu, nkumbu ya yandi Anania kota ye tula maboko va yandi, na yandi lenda kumona diaka.

¹³ Anania vutulaka: Mfumu, mono imene kuwa na bantu mingi, sambu na mambu mingi ya mbi ya muntu yai salaka kwa banlongo ya nge mu Yelusalemi;

¹⁴ ye awa yandi ikele na ngolo ya katuka na bambuta banganga sambu na kukanga bantu yonso ya binga nkumbu ya nge.

¹⁵ Mfumu tubaka kwa yandi: Kwenda, kadi yandi ikele musadi ya solwa kwa mono kunata nkumbu ya mono kwa bapaien ye kwa bantinu ye kwa bana ya Isaeli;

¹⁶ kadi mono tasonga yandi mpasi ya yandi fwiti kumona sambu na nkumbu ya mono. Bis. 20:23

¹⁷ Anama kwendaka ye kotaka mu nzo; ye tulaka maboko va yandi, ye tubaka: Mpangi, Sauli, Mfumu fidisaka mono, yandi Yesu ya monikaka kwa nge mu nzila, ya nge kwizaka, na nge lenda kumona diaka ye fuluswa na Mpeve Yanlongo.

¹⁸ Nswalu bima katukaka na meso ya yandi bonso mpusu ya ngolo, ye yandi monaka diaka, ye telemaka ye botikwaka.

¹⁹ Yandi kudiaka ye bakaka ngolo. Yandi vandaka bilumbu ndambu sikamosi na banlonguki ya vandaka mu Damasko.

²⁰ Nswalu mu banzo ya sambilu yandi samunaka Yesu, na yandi ikele Mwana ya Nzambi.

²¹ Bantu yonso ya kuwaka yo yitukaka ye tubaka: Yai ikele yandi ve ya monisaka mpasi kwa bau ya bombidila mu nkumbu yai mu Yelusalemi ? Ye yandi kwizaka kwaku sambu na mambu yai, na yandi lenda kutwala bau ya kangwa nantwala na bambuta banganga. Bis. 8:1; 9:2

²² Sauli lutaka mu ngolo, ye yitukisaka baYuda ya ikele mu Damasko, sambu na yandi songaka bau Yesu ikele Klisto kibeni.

²³ Bu bilumbu mingi imene kuluta, baYuda tubaka mu kinsweki kufwa yandi. 2 Kol. 11:32

²⁴ Kansi mambu yina monikaka kwa Sauli. Bau kengaka mielo ya mbanza mpe mu ntangu ye mpimpa sambu na kufwa yandi.

²⁵ Mu mpimpa banlonguki bakaka yandi ye basisaka yandi na lupangu ye kulumusaka yandi mu kitunga.

Paulu kwenda ku Yelusalemi

²⁶ Bu yandi kwizaka ku Yelusalemi, yandi sosaka kubundana na banlonguki, kansi bau yonso titaka yandi, kadi bau kwikilaka ve, yandi ikele nlonguki.

²⁷ Banaba bakaka yandi, ye twalaka yandi kwa bantumwa, ye songaka bau mpilamosi Mfumu monikaka kwa yandi mu nzila ye tubaka kwa yandi, ye yandi samunaka na kikesa mu nkumbu ya Yesu mu Damasko. Bis. 4:36

²⁸ Yandi vandaka sikamosi na bau ye kotaka ye basikaka mu Yelusalemi, yandi samunaka na kikesa mu nkumbu ya Mfumu.

²⁹ Yandi tubaka ye tulaka ntembe na baYuda ya baElene, kansi bau sosaka kufwa yandi.

³⁰ Bu bampangi imene kuzaba yo, bau twalaka yandi ku Kaisalia ye fidisaka yandi ku Talaso. Bis. 11:25

³¹ Buna dibundu vandaka na yenge mu Yuda yonso ye Ngalili ye Samalia, bau tungwaka ye tambulaka mu vumi ya Mfumu ye mu bombola ya Mpeve Yanlongo, ye bau kwizaka mingi. Ef. 2:20

Petelo belula Ene

³² Yo vandaka, bu Petelo zieataka ndambu yonso, yandi kwizaka mpe kwa banlongo ya vandaka mu Lida.

³³ Kuna yandi monaka muntu, nkumbu ya yandi Ene, yandi imene kulala na mbeto ya yandi mvu nana, sambu yandi vandaka na mianzi.

³⁴ Petelo tubaka kwa yandi: Ene, Yesu Klisto belula nge, telema ye yidika mbeto ya nge. Nswalu yandi telemaka. Bis. 3:6

³⁵ Bau yonso ya vandaka mu Lida ye Saloni monaka yandi, ye bau pindulaka kwa Mfumu.

Tabita fuluka tuka lufwa

³⁶ Nlonguki mosi ya nkento vandaka mu Yope, nkumbu ya yandi Tabita, na tendula ikele Doloka. Yandi fulukaka na bisalu mbote ye matabisi ya nkenda ya yandi salaka.

³⁷ Yo vandaka mu bilumbu yina yandi bakaka maladi ye kufwaka. Bu bau imene kusukula yandi, bau tulaka yandi mu nzo ya zulu.

³⁸ Sambu na Lida vandaka mfinama Yope, banlonguki kuwaka Petelo ikele kuna, bau fidisaka bantu zole kwa yandi kubombidila yandi: Vingila ve kwiza kwa beto.

³⁹ Petelo telemaka ye kwendaka sikamosi na bau, Bu yandi kwizaka, bau twalaka yandi ku nzo ya zulu, bafwola yonso telemaka mfinama na yandi ye dilaka ye songaka yandi bakazaku ye mvwatu yonso ya Doloka salaka bu yandi vandaka na bau.

⁴⁰ Petelo basisaka bau yonso, ye fukamaka, ye lombaka; ye pindulaka ku mvumbi, ye tubaka: Tabita, telema! Yandi kangulaka meso ya yandi, bu yandi monaka Petelo, yandi vumbukaka.

⁴¹ Yandi pesaka yandi diboko, ye telemisaka yandi, bu yandi imene kubinga banlongo ye bafwola, yandi pesaka yandi kwa bau na moyo.

⁴² Bantu yonso ya Yope zabaka mambu yina, ye mingi kwikilaka Mfumu.

⁴³ Petelo vandaka bilumbu mingi mu Yope mu nzo ya Simoni ya yidika mikanda ya bambizi. Bis. 10:6