Bisalu Ya Bantumwa 8 - Le Nouveau Testament en Kikwango 1950

Sauli monisa dibundu mpasi

¹ Sauli ndimaka lufwa ya yandi. Na kilumbu yina nzomono ya nene kwizaka kwa dibundu mu Yelusalemi; bau yonso mwanganaka mu ntoto ya Yuda ye Samalia, kansi bantumwa ve.

² Babakala ya vumina Nzambi zikaka Stefano, ye dilaka dilu ya nene sambu na yandi.

³ Kansi Sauli pasulaka dibundu, yandi kotaka mu banzo ye bendaka babakala ye bankento ye tulaka bau mu boloko. Bis. 9:1; 22:4, 19; 26:9; Ngal. 1:13

Filipo longa mu Samalia

⁴ Sambu na yai, bau ya mwanganaka kwendaka ye samunaka mambu ya nsamu mbote.

⁵ Filipo kulumukaka ku mbanza ya Samalia ye samunaka Klisto kwa bau. Bis. 6:5

⁶ Bibuka ndimaka na ntima mosi kwa mambu ya Filipo tubaka, bu bau kuwaka ye monaka bidimbu ya yandi salaka.

⁷ Sambu na bampeve ya sumuka basikaka mu bantu mingi ya vandaka na yau, ye bokaka mu ndinga ya nene; mingi ya vandaka na mianzi ye ya tembila belukaka. Bis. 16:18

⁸ Kiese mingi vandaka mu mbanza yina.

Simoni muntu ya biteki

⁹ Muntu mosi vandaka mu mbanza yina, nkumbu ya yandi Simoni, ntete yandi salaka kindoki, ye yitukisaka bantu ya Samalia, yandi disonga bonso nkwa nene. Bis. 13:6; 19:19

¹⁰ Bantu yonso ya fioti ye ya nene ndimaka kwa yandi ye tubaka: Muntu yai ikele ngolo ya Nzambi yina ya bingwa nene.

¹¹ Bau ndimaka kwa yandi sambu na tuka ntama mingi, yandi yitukisaka bau na kindoki ya yandi.

¹² Bu bau kwikilaka Filipo ya samunaka nsamu mbote ya kimfumu ya Nzambi ye nkumbu ya Yesu Klisto, bau botikwaka, babakala ye bankento.

¹³ Simoni yandi kibeni kwikilaka mpe ye botikaka ye landaka Filipo; bu yandi monaka bidimbu ye mambu nene salwaka, yandi yitukwaka.

¹⁴ Bu bantumwa ya vandaka mu Yelusalemi kuwaka na bantu ya Samalia imene kubaka mambu ya Nzambi, bau fidisaka Petelo ye Yoane kwa bau.

¹⁵ Bu bau kulumukaka kuna, bau lombilaka bau, na bau lenda kubaka Mpeve Yanlongo.

¹⁶ Kadi yandi imene kubwa va muntu mosi ve, kansi kaka bau botikwaka mu nkumbu ya Mfumu Yesu.

¹⁷ Buna bau tulaka bau maboko, ye bau bakaka Mpeve Yanlongo.

Petelo ye Simoni muntu ya biteki

¹⁸ Bu Simoni monaka Mpeve Yanlongo ikele kupeswa na kutula maboko ya bantumwa, yandi zolaka kupesa mbongo kwa bau,

¹⁹ yandi tubaka: Pesa mono ngolo yai mpe, na konsonani ya mono tula maboko tabaka Mpeve Yanlongo.

²⁰ Kansi Petelo tubaka kwa yandi: Bika mbongo ya nge vila sikamosi na nge, sambu nge banza nge lenda kubaka matabisi ya Nzambi na mbongo.

²¹ Nge ikele na ndambu ve ye kima ve mu mambu yai, sambu na ntima ya nge ikele mbote ve nantwala na Nzambi.

²² Sambu na yai pindula mabanza, ye bika mbi yai ya nge, ye lomba Mfumu kana yandi tavidisa mabanza ya ntima ya nge. 2 Tim. 2:25

²³ Sambu na mono mona nge ikele mu mambu ya ndudi ye nsinga ya mambu mbi.

²⁴ Simoni vutulaka ye tubaka: Lombila mono Mfumu, na mosi ya mambu yai ya nge imene kutuba takubwila mono ve.

²⁵ Bu bau imene kusonga kitemo ye kutuba mambu ya Mfumu, bau vutukaka ku Yelusalemi ye samunaka nsamu mbote mu mabwala mingi ya bisi Samalia.

Filipo ye mwisi Etiopia

²⁶ Wanjo ya Mfumu tubaka kwa Filipo: Telema ye kwenda ku sude, mu nzila ya kulumuka tuka Yelusalemi ku Gaza, yo ikele nsi ya mpamba.

²⁷ Yandi telemaka ye kwendaka. Tala, mwisi Etiopia, yandi ikele ndingisi ya Kandake ntinu nkento ya bisi Etiopia, yandi ikele muntu ya ngolo ya vandaka nlundi ya mbongo yonso ya ntinu, yandi kwizaka kusambila mu Yelusalemi; Sef. 3:10

²⁸ yandi vandaka kuvutuka ye vandaka mu kalu ya yandi ye tangaka nkanda ya mbikudi Yesaya.

²⁹ Buna Mpeve tubaka kwa Filipo: Kwenda mfinama ye kutana na kalu yai.

³⁰ Filipo tinaka kwa yandi, ye kuwaka yandi kutanga mbikudi Yesaya; yandi tubaka: Nge zaba mambu ya nge ikele kutanga ?

³¹ Yandi tubaka: Mpila nki mono lenda kana muntu songa mono ve ? Yandi bombidilaka Filipo kumata ye kuvanda na yandi.

³² Sika mu masonukwa ya yandi tangaka ikele yai: Bonso dimeme yandi natwaka ku lufwa, bonso mwana dimeme ikele napi nantwala na muntu ya zenga mika ya yandi, mpilayai yandi kangula monoko ya yandi ve. Yes. 53:7, 8

³³ Mu kulumusa ya yandi mfundusu ya yandi katulwa, nani lenda kusamuna mbandu ya yandi ? Kadi moyo ya yandi ikele kukatulwa tuka ntoto.

³⁴ Ndingisi vutulaka kwa Filipo ye tubaka: Mono yuvula nge, mbikudi ikele kutuba sambu na nani, yandi kibeni keti muntu yankaka ?

³⁵ Buna Filipo kangulaka munoko ya yandi, yandi yantikaka na masonukwa yai ye samunaka nsamu mbote ya Yesu.

³⁶ Bu bau kwendaka mu nzila, bau kwizaka ku masa, ndingisi tubaka: Tala masa, nki buya mono kubotikwa ? Bis. 10:47

³⁷ Filipo tubaka: Kana nge kwikila mu ntima ya nge yonso, nge lenda. Yandi vutulaka ye tubaka: Mono kwikila Yesu Klisto ikele Mwana ya Nzambi.

³⁸ Yandi sikidikisaka kalu kutelema, ye bau zole Filipo ye ndingisi kulumukaka mu masa, ye Filipo botikaka yandi.

³⁹ Bu bau tombokaka mu masa Mpeve ya Mfumu bakaka Filipo, ye ndingisi monaka yandi diaka ve, kadi yandi kwendaka mu nzila ya yandi na yangalala.

⁴⁰ Kansi Filipo monikaka mu Azoti, yandi lutaka nakati na yo ye samunaka nsamu mbote mu bambanza yonso ti yandi kuma ku Kaisalia.