Bisalu Ya Bantumwa 7 - Le Nouveau Testament en Kikwango 1950

Kitemo ya Stefano

¹ Nganga nene tubaka: Mambu yai ikele mpilayai ?

² Yandi tubaka: Bampangi ye batata, kuwa: Nzambi ya nkembo monikaka kwa tata ya beto Abalahami bu yandi vandaka mu Mesopotamia ntete na yandi vandaka na Halani. 1 Mose 12:1

³ Yandi tubaka kwa yandi: Katuka na ntoto ya nge ye na bampangi ya nge, ye kwiza ku ntoto ya mono tasonga nge.

⁴ Buna yandi katukaka na nsi ya Kaladea ye kwizaka kuvanda mu Halani. Bu tata ya yandi kufwaka, Nzambi twalaka yandi ku nsi yai ya beto ikele kuvanda ntangu yai.

⁵ Yandi pesaka yandi difwa muna ve, ntoto ta ndambu ve ya tula dikulu ya yandi, kansi yandi silaka na yandi tapesa yo kuvanda ntoto ya yandi, ye ya nkuna ya yandi ya takwiza nanima, bu yandi vandaka na mwana ve. 1 Mose 12:7

⁶ Nzambi tubaka kwa yandi mpilayai: Nkuna ya yandi tavanda nzenza mu nsi ya nzenza, ye bau tatula bau bampika ye monisa bau mpasi mu mvu nkama iya. 1 Mose 15:13

⁷ Nzambi tubaka: Mono tafundisa kikanda yina ya tula bau kimpika, buna bau tabasika ye sadila mono mu sika yai.

⁸ Yandi pesaka yandi luwawanu ya nzengolo, buna Abalahami butaka Isaki ye zengaka yandi kilumbu ya nana, Isaki butaka Yakobi ye Yakobi butaka batata kumi ye zole ya makanda. 1 Mose 17:9; 21:2; 25:24; 29:32; 30:5; 35:16

⁹ Batata ya makanda bakaka kimpala na Yosefi, ye tekaka yandi ku Ngipiti, kansi Nzambi vandaka na yandi, 1 Mose 37:28; 39:2

¹⁰ Ye katulaka yandi na mpasi yonso ya yandi, ye pesaka yandi nlemvo ye ngangu nantwala na Falao, ntinu ya Ngipiti, yandi tulaka yandi nyadi mu Ngipiti ye mu nzo ya yandi yamvimba.

¹¹ Bu malema ye mpasi mingi kwizaka mu Ngipiti yamvimba ye Kanana, batata ya beto monaka madia ve. 1 Mose 41:54

¹² Kansi Yakobi kuwaka madia ikele mu Ngipiti, yandi fidisaka batata ya beto mbala ya ntete. 1 Mose 42:1

¹³ Mbala ya zole Yosefi disongaka kwa bampangi ya yandi, ye kikanda ya yandi monikaka kwa Falao. 1 Mose 45:3

¹⁴ Yosefi fidisaka kubinga tata ya yandi Yakobi ye bampangi yonso ya yandi, miela makumi nsambwadi ye tanu. 1 Mose 45:9; 46:6, 27; 5 Mose 10:22

¹⁵ Yakobi kulumukaka ku Ngipiti, yandi kufwaka ye batata ya beto kufwaka. 1 Mose 49:33

¹⁶ Bau natwaka ku Sekemi, ye tulwaka mu ndiamu ya Abalahami sumbaka na ntalu ya mbongo na bana ya Hamoli mu Sekemi.

¹⁷ Bantu butaka ye kwizaka mingi mu Ngipiti bu ntangu ya nsilulu finamaka ya Nzambi silaka kwa Abalahami, 1 Mose 24:7; 2 Mose 1:7

¹⁸ ti ntinu yankaka telemaka mu Ngipiti ya zabaka Yosefi ve.

¹⁹ Yandi salaka na mayele na kikanda ya beto ye monisaka batata ya beto mpasi, sambu na kulosa bana ya bau nanganda, na bau lenda kuvanda na moyo ve. 2 Mose 1:10

²⁰ Ntangu yina Mose butukaka, yandi vandaka kitoko kwa Nzambi, bau sansaka yandi bangonda tatu mu nzo ya tata ya yandi; 2 Mose 2:2; Eb. 11:23

²¹ Bu bau tulaka yandi nanganda, mwana nkento ya Falao bakaka yandi, ye sansaka yandi bonso mwana ya yandi kibeni. 2 Mose 2:3

²² Mose longwaka mu ngangu yonso ya bantu ya Ngipiti; yandi vandaka ngolo mu mambu ye bisalu ya yandi.

²³ Bu yandi lungaka mvu makumi iya, mabanza kwizaka mu ntima ya yandi kwenda kutala bampangi ya yandi bana ya Isaeli.

²⁴ Bu yandi monaka mosi ya bau ikele kumoniswa mpasi, yandi sadisaka yandi ye zengaka mambu ya mwisi Ngipiti ye kufwaka yandi. 2 Mose 2:11

²⁵ Yandi banzaka bampangi ya yandi zabaka na Nzambi ikele kuvulusa bau mu maboko ya yandi, kansi bau zabaka yo ve.

²⁶ Kilumbu ya landa, yandi monikaka kwa bau bu bau ikele kunwana, yandi zolaka kutula yenge nakati na bau, ye tubaka: Beno babakala, beno ikele bampangi, sambu na nki beno ikele kusalana mbi ? 2 Mose 2:13

²⁷ Kansi yandi ya salaka mfinangani ya yandi mbi kulaka yandi, kutuba: Nani tula nge nkuluntu ye mfundisi va zulu ya beto ? 2 Mose 2:14

²⁸ Nge zola kufwa mono bonso nge kufwaka muntu ya Ngipiti mazono ?

²⁹ Mose tinaka sambu na mambu yai, ye vandaka nzenza mu nsi ya Midiani, kuna yandi butaka bana zole babakala.

³⁰ Bu mvu makumi iya lungaka, wanjo monikaka kwa yandi mu nlemo ya tiya mu nti ya fioti mu nsi ya mpamba va mongo ya Sinai. 2 Mose 3:1

³¹ Bu Mose monaka yo, yandi yitukaka sambu na mambu yina, bu yandi kwizaka mfinama kutala, ndinga ya Mfumu kwizaka:

³² Mono ikele Nzambi ya batata ya nge, Nzambi ya Abalahami ye Isaki ye Yakobi. Mose zakamaka ye ntima vandaka ngolo ve kutala. Mat. 22:32; Luk. 20:37

³³ Mfumu tubaka kwa yandi: Katula nsampatu na makulu ya nge sambu na sika ya nge ikele kutelema ikele ntoto ya nlongo.

³⁴ Mono imene kumona mpasi ya bantu ya mono mu Ngipiti, ye kuwa dilu ya bau, ye mono imene kwiza kuvulusa bau. Ntangu yai kwiza, mono tafidisa nge ku Ngipiti.

³⁵ Mose yai ya bau buyaka ye tubaka: Nani tulaka nge nkuluntu ye mfundisi ? Ikele yandi ya Nzambi fidisaka na diboko ya wanjo ya monikaka kwa yandi mu nti ya fioti, kuvanda mfumu ye mvulusi.

³⁶ Yandi basisaka bau, bu yandi imene kusala nyitukulu ye bidimbu mu nsi ya Ngipiti ye mu mbu ya mbwaki ye mu nsi ya mpamba, mvu makumi iya.

³⁷ Yai ikele Mose yina ya tubaka kwa bana ya Isaeli: Nzambi tatelemisa mbikudi bonso mono tuka bampangi ya beno. 5 Mose 18:15, 18; Bis. 3:22

³⁸ Yai ikele yandi ya vandaka mu dibundu mu nsi ya mpamba, sikamosi na wanjo ya tubaka kwa yandi va mongo ya Sinai, ye yandi vandaka na batata ya beto, ye bakaka mambu ya moyo kupesa kwa beto.

³⁹ Batata ya beto lemvukaka yandi ve, kansi buyaka yandi, ye ntima ya bau vutukaka ku Ngipiti.

⁴⁰ Bau tubaka kwa Alona: Sadila beto banzambi ya takwenda nantwala ya beto, sambu na Mose yai ya basisaka beto tuka nsi ya Ngipiti, beto zaba ve kana yandi ikele wapi.

⁴¹ Mu bilumbu yina bau salaka mwana ngombe ye twalaka nkailu kwa kiteki, ye yangalalaka sambu na bisalu ya maboko ya bau. 2 Mose 32:6

⁴² Nzambi pindulaka ye bikaka bau kusadila bima yonso ya zulu, bonso yo ikele kusonama mu nkanda ya bambikudi: O nzo ya Isaeli, bu beno vandaka mu nsi ya mpamba mvu makumi iya, beno pesaka mono bambizi ya kufwa ye nkailu ?

⁴³ Beno bakaka nzo ya lele ya Moloki ye mbwetete ya nzambi Lefani, ikele bifwani ya beno salaka kusambila yau, Mono tanata beno kuna nanima na Babeli. Yel. 19:13

⁴⁴ Batata ya beto vandaka mu nzo ya lele ya kitemo mu nsi ya mpamba, bonso yandi songaka ya tubaka kwa Mose, na yandi tasala yo mpilamosi kifwani ya yandi monaka; 2 Mose 25:40; Eb. 8:5

⁴⁵ Nanima na yandi batata ya beto ye Yosua twalaka yo, bu bau kotaka ye bakaka nsi ya bapaien, ya Nzambi katulaka nantwala ya batata ya beto ti kilumbu ya Davidi. Yos. 3:14

⁴⁶ Davidi monaka nlemvo na luse ya Nzambi, yandi yuvulaka, kusadila Nzambi ya Yakobi nzo ya kuvanda. 2 Sam. 7:2; Nk. 132:4

⁴⁷ Kansi Solomo tungilaka yandi nzo. 1 Nt. 6:1

⁴⁸ Kansi Nzambi Mpungu ikele kuvanda ve mu nzo ya tungwa na maboko, bonso mbikudi tubaka: Bis. 17:24

⁴⁹ Zulu ikele kiti ya mono, ye ntoto ikele mfiduku ya makulu ya mono Mfumu tubaka: Beno tatungila mono nzo mutindu nki, keti nki ikele sika ya luvundu ya mono ?

⁵⁰ Diboko ya mono salaka bima yai yonso ve ?

⁵¹ Beno bankwa nkingu ya ngolo ya zengwa ve mu ntima ye makutu, ntangu yonso beno buya Mpeve Yanlongo, bonso batata ya beno salaka, beno sala mpe.

⁵² Nani mu bambikudi, ya batata ya beno zomaka ve ? Bau kufwaka bau ya samunaka ntete kwiza ya Nkwa Lunungu, ye ntangu yai beno imene kwiza bayekudi ye bafwi ya yandi. 1 Nt. 19:10; Mat. 23:29

⁵³ Ikele beno ya bakaka nsiku ya peswaka ya banjo, kansi beno kebaka yo ve. 2 Mose 19:3; Ngal. 3:19; Eb. 2:2

Lufwa ya Stefano

⁵⁴ Bu bau kuwaka mambu yai, makasi simbaka bau mu ntima ye bau kwetilaka yandi meno.

⁵⁵ Yandi fulukaka na Mpeve Yanlongo ye talaka ngolo ku zulu, ye monaka nkembo ya Nzambi, ye Yesu telema na diboko kibakala ya Nzambi,

⁵⁶ yandi tubaka: Tala mono mona zulu kanguka, ye Mwana ya muntu telema na diboko kibakala ya Nzambi.

⁵⁷ Bau bokaka na ndinga nene ye kangaka makutu ya bau, ye bau zunga yandi na ntima mosi,

⁵⁸ bau losaka yandi nanganda ya mbanza, ye kufwaka yandi na matadi. Bantemo tulaka bakazaku ya bau va makulu ya toko, ya bingwa Sauli. Bis. 9:1; 22:20

⁵⁹ Bau kufwaka Stefano na matadi, bu yandi bombidilaka ye kutuba: Mfumu Yesu baka mpeve ya mono. Luk. 23:46

⁶⁰ Yandi fukamaka ye bokaka na ndinga nene: Mfumu, tudila bau masumu yai ve. Bu yandi imene kutuba yai, yandi lalaka tulu. Mat. 5:39; Luk. 6:27; 23:34