Bisalu Ya Bantumwa 6 - Le Nouveau Testament en Kikwango 1950

Basielo ya ntete ya dibundu

¹ Mu bilumbu yina bu ntalu ya banlonguki ikele kwiza mingi, baYuda ya Elene vandaka na kimbeni na baEbelo sambu na bafwola ya bau bakaka makabu ve ya kilumbu na kilumbu.

² Bantumwa kumi ye zole bingaka kibuka ya banlonguki, ye tubaka: Yo lunga ve na beto bika mambu ya Nzambi ye sala mesa.

³ Kansi bampangi, sola babakala nsambwadi nakati na beno ya ikele bantu ya mbote, ya fuluka na Mpeve ye ngangu, ya beto lenda kutula mu kisalu yai.

⁴ Kansi beto tavanda ngolo mu lombilu ye mu kisielo ya longa mambu.

⁵ Kibuka yamvimba zolaka mambu yai; bau solaka Stefano muntu ya fuluka na lukwikilu ye Mpeve Yanlongo, ye Filipo ye Pokolo ye Nikanoli ye Timoni ye Pamena ye Nikolao mposilitia ya katuka na Antiokia.

⁶ Bau tulaka bau nantwala na bantumwa, ye lombaka ye tulaka bau maboko.

⁷ Mambu ya Nzambi mwanganaka ye ntalu ya banlonguki kwizaka mingi mu Yelusalemi, ye banganga mingi lemvukaka lukwikilu yina. Bis. 12:24; 19:20; Yoa. 12:42

Stefano nantwala ya bamfundisi

⁸ Stefano fulukaka na nlemvo ye ngolo ye salaka nyitukulu ye bidimbu nakati na bantu.

⁹ Kansi bantu yankaka mu nzo ya sambilu ya bingwa ya balibetino, ye bantu ya Kilene, ye ya Alesandia ye bau ya katuka na Kilikia ye Asia, bau telemaka ye kutulaka ntembe na Stefano.

¹⁰ Ye bau lendaka ve kuluta ngangu ya yandi ye Mpeve ya tubisaka yandi.

¹¹ Buna bau longaka babakala yankaka ya tubaka: Beto kuwaka yandi tuba mambu ya mbi kwa Mose ye kwa Nzambi.

¹² Bau telemisaka ntima ya bantu ye bambuta ye bansoniki, ye bau kwizaka kwa yandi ye simbaka yandi ye nataka yandi kwa bamfundisi,

¹³ bau twalaka bantemo ya luvunu ya tubaka: Muntu yai bika ve kutuba mambu mbi sambu na sika yai ya nlongo ye sambu na nsiku. Mat. 26:59; Bis. 21:28

¹⁴ Kadi beto kuwaka yandi tuba, na Yesu yai ya Nazaleti takatula sika yai ye tapindula bansiku ya Mose pesaka beto.

¹⁵ Bau yonso ya vandaka mu nzo ya bamfundisi talaka yandi ngolo, ye monaka luse ya yandi mpilamosi luse ya wanjo.