Bisalu Ya Bantumwa 5 - Le Nouveau Testament en Kikwango 1950

Anania ye Safila

¹ Bakala nkumbu ya yandi Anania ye Safila nkento ya yandi tekaka ndambu ya ntoto,

² yandi katulaka ndambu ya ntalu ya yo, nkento ya yandi zabaka yo, yandi twalaka ndambu ye tulaka yo na makulu ya bantumwa.

³ Petelo tubaka: Anania, sambu na nki Satana imene kufulusa ntima ya nge kukusa Mpeve Yanlongo ye kukatula ndambu ya ntalu ya ntoto ? Yoa. 13:2, 27; Luk. 22:31; Bis. 13:10

⁴ Bu yo vandaka, yo vandaka ya nge ve ? Bu nge imene kuteka yo, yo vandaka mu diboko ya nge ve ? Sambu na nki nge imene kubanza mambu yai mu ntima ya nge ? Nge imene kutuba luvunu kwa bantu ve kansi kwa Nzambi.

⁵ Bu Anania kuwaka mambu yai, yandi kubwaka ye bikaka mpeve ya yandi, boma mingi bwilaka bau yonso ya kuwaka yo.

⁶ Batoko telemaka ye zingilaka yandi na lele ye nataka yandi nanganda ye zikaka yandi.

⁷ Mfinama na lokula tatu nanima na yai, nkento ya yandi kotaka, kansi yandi zabaka ve mambu ya salwaka.

⁸ Petelo tubaka kwa yandi: Songa mono kana beno tekaka ntoto na ntalu yai ? Yandi tubaka: E, ntalu ya yo ikele yai.

⁹ Kansi Petelo tubaka kwa yandi: Sambu na nki beno kangaka ntima ya beno sikamosi kuyunsa Mpeve ya Mfumu ? Tala, makulu ya bau ya zikaka bakala ya nge ikele na mwelo, bau tanata nge nanganda.

¹⁰ Nswalu yandi kubwaka na makulu ya yandi ye bikaka mpeve ya yandi, batoko kotaka ye monaka yandi ya kufwa, bau nataka yandi nanganda ye zikaka yandi na lweka ya bakala ya yandi.

¹¹ Boma mingi bwilaka dibundu yamvimba ye bau yonso ya kuwaka mambu yai. Luk. 7:16; Bis. 2:43; 19:17

Bantumwa sala bidimbu

¹² Bidimbu mingi ye nyitukulu salwaka na maboko ya bantumwa nakati na bantu, bau yonso vandaka sikamosi mu kintuadi va mbalanda ya Solomo. Bis. 3:11; 4:30; 6:8; 2 Kol. 12:12

¹³ Kansi na bankaka muntu mosi ve vandaka na kikesa kukota sikamosi na bau, kansi bantu zitisaka bau mingi.

¹⁴ Mingi ya kwikilaka kotaka mu mambu ya Mfumu, bibuka ya babakala ye bankento,

¹⁵ bau nataka bambevo nanganda mu banzila ye tulaka bau na bafulu ye bambeto, bu Petelo lutaka kana kini ya yandi lenda kufuka mosi ya bau.

¹⁶ Kibuka katukaka na mabwala ndambu ya Yelusalemi ye kutakanaka, bau twalaka bambevo, ye bau ya moniswa mpasi ya bampeve ya sumuka, ye bau yonso belukaka. Bis. 8:7

Mpasi ya zole ya kwiza kwa bantumwa

¹⁷ Kansi nganga nene telemaka ye bau yonso ya vandaka na yandi, bau ikele basaduki, bau fulukaka na kimpala,

¹⁸ bau tulaka maboko va bantumwa ye tulaka bau mu boloko ya mbanza. Bis. 4:3

¹⁹ Kansi mu mpimpa, wanjo ya Mfumu kangulaka mielo ya boloko ye basisaka bau, ye tubaka: Bis. 12:7; 27:23

²⁰ Beno kwenda ye telema mu tempelo, ye tuba kwa bantu mambu yonso ya Moyo yai.

Bau longa mu tempelo

²¹ Bu bau kuwaka mambu yai, bau kotaka mu tempelo bu kuma kia, ye longaka. Nganga nene kwizaka ye bau ya vandaka na yandi, bau kutikisaka bamfundisi ye bakuluntu yonso ya bana ya Isaeli, ye fidisaka ku boloko kutwala bau.

²² Kansi bapolisi ya kwizaka kuna monaka bau ve mu boloko, bau vutukaka ye songaka bau kutuba:

²³ Beto monaka boloko ikele kukanga ngolo, ye bankengi ikele kutelema na mielo, kansi bu beto kangulaka yo, beto monaka muntu ve nakati.

²⁴ Bu nkuluntu ya tempelo ye bambuta banganga kuwaka mambu yai, bau banzaka ngolo sambu na bau, na mambu yai tavanda mpila nki ?

²⁵ Kansi muntu kwizaka ye tubaka kwa bau: Tala, babakala ya beno tulaka mu boloko ikele mu tempelo, bau ikele kutelema ye kulonga bantu.

²⁶ Buna nkuluntu ye bapolisi kwendaka ye twalaka bau, kansi na ngolo ve, kadi bau titaka bantu keti bau takufwa bau na matadi. Bis. 4:21

²⁷ Bu bau imene kutwala bau, bau tulaka bau nantwala na bamfundisi. Nganga nene yuvulaka bau, kutuba:

²⁸ Beto kanikinaka beno ve kulonga mu nkumbu yai ve ? Kansi tala, beno imene kufulusa Yelusalemi na malongi ya beno, ye beno zola kutwala menga ya muntu yai va beto.

²⁹ Petelo ye bantumwa vutulaka ye tubaka: Beto fwiti kulemvuka Nzambi ye bantu ve. Bis. 4:19

³⁰ Nzambi ya batata ya beto fulukisaka Yesu ya beno kufwaka bu beno kangaka yandi va nti. Bis. 2:24, 32; 3:13, 15

³¹ Nzambi kembisaka yandi na diboko kibakala ya yandi, kuvanda Mfumu ye Mvulusi, kupesa bana ya Isaeli nzila ya pindula mabanza ye mvidisilu ya masumu. Luk. 24:47; Bis. 2:33, 36

³² Beto ikele bantemo na mambu yai, ye Mpeve Yanlongo mpe, ya Nzambi pesaka kwa bau ya lemvuka yandi. Luk. 24:48; Yoa. 15:26; Bis. 1:8, 22; 10:39

³³ Bu bau kuwaka mambu yai, makasi simbaka bau mu ntima, bau tubaka sambu na kufwa bau. Bis. 7:54

Ngamalieli pesaka ngangu

³⁴ Mufalisi mosi, nkumbu ya yandi Ngamalieli, nlongi ya nsiku, ya bantu yonso zitisa, telemaka nakati sikidikisaka kubasisa bantumwa ntangu fioti.

³⁵ Yandi tubaka kwa bau: Beno babakala ya Isaeli, tomatala sambu na mambu ya beno tasala kwa bantu yai. Bis. 4:16

³⁶ Kadi ntete na bilumbu yai, Teuda telemaka ye salaka bonso yandi ikele muntu nene, babakala mfinama nkama iya landaka yandi. Bantu kufwaka yandi, ye bau yonso ya lemvukaka yandi mwanganaka ye yonso kwizaka mpamba.

³⁷ Nanima na yandi Yuda mwisi Ngalili telemaka mu bilumbu ya bau sonikaka bankumbu, ye bantu ndambu landaka yandi. Yandi kufwaka mpe ye bau yonso ya lemvukaka yandi kwendaka ndambu nkaka nkaka.

³⁸ Ntangu yai mono tuba kwa beno: Sala kima ve kwa bantu yai, bika bau; kadi kana lukanu yai keti kisalu yai katuka na bantu yo takubwa,

³⁹ kansi kana yo katuka na Nzambi, beno lenda ve kubwisa bantu yai, keti beno tamona beno ikele kunwana na Nzambi.

⁴⁰ Bau ndimaka kwa yandi, bu bau imene kubinga bantumwa, bau bulaka bau na fimbo ye kanikinaka bau kutuba mu nkumbu ya Yesu ve, ye bikaka bau kwenda. Bantumwa kangulwa

⁴¹ Buna bau katukaka nantwala na bamfundisi, bau vandaka na kiese na bau lungaka kubaka mpasi ya nsoni sambu na nkumbu yai. Mat. 5:11

⁴² Kilumbu na kilumbu bau bikaka ve kulonga mu tempelo ye mu banzo ye kusamuna nsamu mbote ya Klisto Yesu.