Bisalu Ya Bantumwa 4 - Le Nouveau Testament en Kikwango 1950

Petelo ye Yoane tulwa mu boloko

¹ Bu bau ikele kutuba kwa bantu, banganga ye bakuluntu ya tempelo ye basaduki kwizaka kwa bau,

² bau vandaka na makasi sambu na bau longaka bantu, ye samunaka na mfulukulu ya bafwa ikele mu Yesu.

³ Bau simbaka bau na maboko ye tulaka bau mu boloko ti kilumbu ya kulanda; kadi nkokila imene kubwa. Bis. 5:18

⁴ Mingi ya kuwaka mambu yina kwikilaka, ntalu ya babakala vandaka, mafunda tanu.

Bau funduswaka ye kangulwaka

⁵ Yo vandaka mpilayai, mu kilumbu ya landa, bakuluntu ya bau ye bambuta ya bantu ye bansoniki kutakanaka mu Yelusalemi,

⁶ ye Anasi nganga ya nene ye Kayafa ye Yoane ye Alesandelo ye bau yonso ya ikele bampangi ya nganga ya nene vandaka kuna.

⁷ Bu bau tulaka bau nantwala na bau, bau yuvulaka bau: Mu ngolo nki ye mu nkumbu nki beno imene kusala mambu yai ?

⁸ Buna Petelo fuluka na Mpeve Yanlongo, tubaka kwa bau: Beno bakuluntu ya bantu ye bambuta!

⁹ Kana beno ikele kusosa mambu ya beto kilumbu yai, sambu na mambu ya mbote ya salwaka kwa muntu ya vandaka na maladi, ye nki belulaka yandi,

¹⁰ bika beno yonso ye bantu yonso ya Isaeli zaba, muntu yai ikele kutelema awa nantwala na beno na ngolo yonso mu nkumbu ya Yesu Klisto ya Nazaleti ya beno komaka va kulunsi, ya Nzambi fulukisaka tuka bafwa. Bis. 3:6, 15

¹¹ Yandi ikele ditadi ya beno bantungi imene kubuya, yandi salwaka ditadi ya ntu ya fuma. Nk. 118:22; Yes. 28:16; Mat. 21:42; Mal. 12:10; Luk. 20:17; Lom. 9:33; 1 Pet. 2:6

¹² Mpulusu ikele mu yankaka ve, kadi nkumbu yankaka ikele ve nansi ya zulu, ya peswa nakati na bantu ya fwiti kuvulusa beto. Mat. 1:21; Yoa. 3:16; Bis. 5:31; 10:43

Bau buyaka bantumwa kulonga mu nkumbu ya Yesu

¹³ Bu bau monaka kikesa ya Petelo ye Yoane, ye bau zabaka na bau ikele bantu ya longuka ve, ye ya konda ngangu, bau yitukaka ye zabaka na bau vandaka na Yesu.

¹⁴ Bu bau monaka muntu ya belulaka ikele kutelema sikamosi na bau, bau lendaka ve kutuba mambu sambu na yo. Bis. 3:8

¹⁵ Bu bau imene kusikidikisaka bau kukatuka nakati na bamfundisi, bau tubanaka mu kinsweki,

¹⁶ bau tubaka: Beto tasala nki kwa bantu yai ? Kadi yo imene kumonika kwa yonso ya vanda mu Yelusalemi na kidimbu ya luta nene imene kusalwa mu bau, ye beto lenda kubuya yo ve.

¹⁷ Bika beto tuba ndinga ya makasi kwa bau, na bau tatuba kwa muntu diaka ve mu nkumbu yai, na mambu yai tamwangana diaka ve nakati bantu. Bis. 5:28, 40

¹⁸ Bau bingaka bau ye kanikinaka bau kutuba tafioti ve keti kulonga mu nkumbu ya Yesu.

¹⁹ Petelo ye Yoane vutulaka ye tubaka kwa bau: Yo ikele mbote na meso ya Nzambi kuwa beno keti kuwa Nzambi, beno zenga yo, Bis. 5:29

²⁰ kadi beto lenda ve kubuya kutuba mambu ya beto monaka ye kuwaka. 1 Yoa. 1:1

²¹ Bu bau imene kutuba ndinga ya makasi yankaka kwa bau, bau bikaka bau kwenda, sambu na bau monaka mambu ve kubula bau, sambu na bantu, kadi bantu yonso kembisaka Nzambi sambu na mambu ya salwaka.

²² Kadi muntu yai ya salwa kidimbu yai ya beluka lutaka mvu makumi iya.

Petelo ye Yoane vutukaka kwa bantumwa yankaka

²³ Bu bau bikaka bau, bau kwizaka kwa bantu ya bau, ye songaka bau mambu yonso ya bambuta banganga ye bambuta ya bantu tubaak kwa bau.

²⁴ Bu bau kuwaka yo, bau tulaka ndinga ya bau sikamosi kwa Nzambi, ye tubaka: Mfumu, nge ya salaka zulu ye ntoto ye mbu ye bima yonso mu yau; Yes. 37:16; Yel. 32:17

²⁵ nge tubaka mu Mpeve Yanlongo mu munoko ya sielo ya nge Davidi, tata ya beto: Sambu na nki bapaien vandaka na makasi ye bantu banzaka mambu mpamba ? Nk. 2:1

²⁶ Bantinu ya ntoto telemaka na ndonga ye bakuluntu yonso kutakanaka sikamosi kutelemina Mfumu ye Klisto ya yandi.

²⁷ Kadi kieleka mu mbanza yai Elode ye Pontio Pilatu ye bapaien ye bantu ya Isaeli kutakanaka sikamosi kutelemina Yesu, Sielo ya nge ya nlongo, ya nge sitaka,

²⁸ kusala mambu yonso ya diboko ya nge, ye lukanu ya nge songaka na yo tavanda mpilayai.

²⁹ Ntangu yai, Mfumu, tala ndinga ya makasi ya bau, ye pesa beto bampika ya nge kikesa yonso kutuba mambu ya nge. 1 Kol. 7:22

³⁰ Bu nge tula diboko ya nge kubelula, bika bidimbu ye nyitukulu salwa mu nkumbu ya Yesu sielo ya nge ya nlongo.

³¹ Bu bau imene kulomba, sika ya bau kutakanaka nikukaka ngolo, ye bau yonso fulukaka na Mpeve Yanlongo, bau tubaka mambu ya Nzambi mu kikesa.

Kitezo ya dibundu ya ntete vandaka

³² Kibuka ya bau ya kwikilaka vandaka na ntima mosi ye mwela mosi, ye muntu mosi tubaka ve na bima ya yandi ikele bima ya yandi mosi, kansi bima yonso vandaka ya bau yonso. Yoa. 17:21; Bis. 2:44; Ngal. 3:28; Fili. 1:27; 2:2, 20

³³ Bantumwa songaka kitemo ya mfulukulu ya Mfumu Yesu Klisto mu ngolo mingi, ye nlemvo mingi vandaka na bau yonso.

³⁴ Mpe nakati na bau muntu mosi vandaka ve ya konda bima; kadi bau yonso ya vandaka na ntoto ye banzo tekaka yau, ye twalaka ntalu ya bima ya tekwaka,

³⁵ bau tulaka yau na makulu ya bantumwa, ye bau kabaka yau kwa muntu na muntu bonso vandaka nsatu ya yandi. Bis. 2:45

³⁶ Yosefi ya bantumwa pesaka nkumbu Banaba, na tendula ikele yai: Mwana ya bombodolo, yandi ikele muntu ya Levi ya kikanda mwisi Kipelo,

³⁷ yandi vandaka na dilanga ye tekaka yo, ye twalaka mbongo ya yo, ye tulaka yo na makulu ya bantumwa.