Bisalu Ya Bantumwa 3 - Le Nouveau Testament en Kikwango 1950

Petelo belula muntu ya mianzi

¹ Petelo ye Yoane tombokaka ku tempelo mu lokula ya lombilu, yo ikele lokula uvwa.

² Muntu mosi natwaka kuna ya vandaka na maladi ya mianzi tuka lubutuku ya yandi, kilumbu na kilumbu bau tulaka yandi na mwelo ya tempelo, ya bingwa mwelo ya kitoko, kulomba matabisi ya bau ya kota mu tempelo. Bis. 14:8

³ Bu yandi monaka Petelo ye Yoane ikele kukota mu tempelo, yandi lombaka bau matabisi ya nkenda.

⁴ Petelo talaka yandi ngolo sikamosi na Yoane ye tubaka: Tala beto.

⁵ Yandi talaka bau ye vingilaka kubaka kima tuka bau.

⁶ Kansi Petelo tubaka: Palata ye wola ikele na mono ve, kansi yina ya ikele na mono, mono tapesa nge: Mu nkumbu ya Yesu Klisto ya Nazaleti, tambula. Bis. 4:10; 9:34; 14:10

⁷ Yandi simbaka diboko kibakala ya yandi ye telemisaka yandi, nswalu bitambi ya yandi ye mukuwa ya makulu ya yandi bakaka ngolo.

⁸ Yandi dumukaka, ye telemaka ye yantikaka kutambula, ye kotaka sikamosi na bau mu tempelo, kutambula ye kudumuka ye kuzitisa Nzambi. Yes. 35:6

⁹ Bantu yonso monaka yandi kutambula ye kuzitisa Nzambi.

¹⁰ Bau zabaka na yo ikele yandi ya vandaka na mwelo ya kitoko ya tempelo kubaka matabisi; bau fulukaka na nyitukulu ye mabanza mingi sambu na mambu ya kwizaka kwa yandi.

Petelo longaka bantu

¹¹ Bu yandi ikele kusimba Petelo ye Yoane bantu yonso kwiza sikamosi kwa bau ku mbalanda ya Solomo, ye bau yitukaka mingi. Bis. 5:12

¹² Bu Petelo monaka yo, yandi vutulaka kwa bantu: Beno babakala ya Isaeli, sambu na nki beno yituka sambu na muntu yai ? Sambu na nki beno tala beto ngolo, bonso beto salaka yandi kutambula mu ngolo ya beto keti vumi ya beto ya Nzambi ?

¹³ Nzambi ya Abalahami ye ya Isaki ye ya Yakobi, Nzambi ya batata ya beto imene kukembisa sielo ya yandi Yesu, ya beno yekulaka ye buyaka nantwala ya Pilatu, bu yandi zengaka mambu kukangula yandi. 1 Mose 3:6; Mat. 22:32; Mal. 12:26; Luk. 20:37

¹⁴ Kansi beno buyaka Nkwa Nlongo ye Lunungu, ye beno lombaka na muntu ya ikele mufwi tapeswa kwa beno. Mat. 27:20; Mal. 15:11; Luk. 23:18; Yoa. 18:40

¹⁵ Beno kufwaka Mfumu ya moyo, kansi Nzambi fulukisaka yandi tuka bafwa, ye beto ikele bantemo ya yo. Bis. 2:24, 34; 4:10; 5:31; Ef. 1:20

¹⁶ Mu lukwikilu mu nkumbu ya yandi, nkumbu ya yandi imene kusala muntu yai kwiza ngolo, ya beno ikele kumona ye kuzaba. Lukwikilu ya ikele mu yandi imene kusala muntu yai kwiza ngolo yonso nantwala na beno yonso.

¹⁷ Ntangu yai, bampangi, mono zaba beno salaka mambu yai sambu na beno vandaka na ngangu ve, bonso bakuluntu ya beno salaka mpe;

¹⁸ kansi mpilayai Nzambi imene kulungisa mambu ya yandi songaka ntete mu munoko ya bambikudi yonso, na Klisto ya yandi fwiti kumona mpasi.

¹⁹ Sambu na yai, pindula mabanza ye vutuka, na masumu ya beno lenda kuvidiswa, buna ntangu ya kiese lenda kukatuka nantwala na Mfumu,

²⁰ na yandi lenda kufidisa Yesu Klisto, ya yandi imene kusola sambu na beno.

²¹ Zulu fwiti kukeba yandi ti ntangu na bima yonso tavutulwa bonso yo vandaka ntete. Ya Nzambi tubaka mu munoko ya bambikudi ya yandi ya nlongo, ya vandaka tuka ya kinkulu.

²² Mose tubaka kieleka: Mfumu Nzambi ya beno tatelemisa mbikudi kwa beno bonso mono nakati bampangi ya beno, beno takuwa yandi mu mambu yonso konso nki ya yandi tatuba kwa beno.

²³ Yo tavanda mpilayai, konso mwela ya takuwa mbikudi yina ve, yandi takatulwa nakati na bantu.

²⁴ Bambikudi yonso, tuka Samueli ye bau ya landaka, bau yonso ya tubaka, samunaka sambu na bilumbu yai mpe.

²⁵ Beno ikele bana ya bambikudi ye ya luwawanu ya Nzambi salaka na batata ya beno, bu yandi tubaka kwa Abalahami: Mu nkuna ya nge makanda yonso ya ntoto tasakumunwa. 1 Mose 12:3; 22:18; Ngal. 3:8

²⁶ Yo ikele kwa beno ntete ya Nzambi fulukisaka yandi kusakumuna beno, bu yandi pindulaka beno muntu tuka masumu ya beno. Bis. 13:46