Bisalu Ya Bantumwa 25 - Le Nouveau Testament en Kikwango 1950

Paulu nantwala na Festo

¹ Bu Festo kotaka mu kinyadi, nanima na bilumbu tatu yandi katuka na Kaisalia ye kwenda ku Yelusalemi;

² bambuta banganga ye bantu ya nene ya baYuda fundaka Paulu kwa yandi, ye bombidilaka yandi; Bis. 24:1

³ Bau yuvulaka yandi kusala bau mbote ye binga Paulu ku Yelusalemi; sambu na bau imene kutubana kufwa yandi mu nzila. Bis. 22:15

⁴ Buna Festo vutulaka, na Paulu ikele kukebwa mu Kaisalia, ye yandi kibeni ikele kwenda kuna nswalu.

⁵ Yandi tubaka: Sambu na yai, bika bau ya ikele na ngolo nakati na beno kulumuka sikamosi na mono kufunda yandi, kana mambu ya mbi ikele mu yandi.

⁶ Bu yandi vandaka na bau bilumbu nana keti kumi, yandi kulumukaka ku Kaisalia; kilumbu ya landa, yandi vandaka va kiti ya mfundisi, ye fidisaka kutwala Paulu.

⁷ Bu yandi kwizaka, baYuda ya katuka na Yelusalemi telemaka mfinama na yandi, bau fundaka yandi na mambu mingi ya mbi, ya bau lenda ve kusonga kieleka.

⁸ Kansi Paulu tubaka: Mono salaka mbi ve kwa nsiku ya baYuda keti kwa tempelo keti kwa Kaisali. Bis. 24:12; 28:17

⁹ Kansi Festo zolaka luzolo ya baYuda, ye vutulaka kwa Paulu, ye tubaka: Nge zola kwenda ku Yelusalemi ye fundiswa kuna nantwala na mono sambu na mambu yai ? Bis. 24:27

¹⁰ Kansi Paulu tubaka: Mono ikele kutelema nantwala na kiti ya mfundusu ya Kaisali, sika ya mono fwiti kufundiswa. Mono imene kusala mbi kwa baYuda ve, bonso nge mpe zaba mbote.

¹¹ Buna kana mono imene kusala mbi, ye imene kusala mambu ya lunga lufwa, mono buya lufwa ve, kansi mambu yai ya bau funda mono ikele kieleka ve, muntu lenda kuyekula mono kwa bau ve. Mono yuvula kwenda kwa Kaisali. Bis. 28:19

¹² Bu Festo imene kutuba na bamfundisi, vutulaka: Nge yuvula kwenda kwa Kaisali, kwa Kaisali nge takwenda. Bis. 19:21; 23:11

Ntinu Angalipa kwenda kwa Festo

¹³ Nanima ya bilumbu ndambu, ntinu Angalipa ye Benike kwizaka ku Kaisalia, ye pesaka mbote kwa Festo.

¹⁴ Bu bau vandaka kuna bilumbu mingi, Festo songaka mambu ya Paulu kwa ntinu, ye tubaka: Muntu ikele awa mu boloko ya Feliki bikaka. Bis. 24:27

¹⁵ Bu mono vandaka mu Yelusalemi, bambuta banganga ye bambuta ya baYuda fundaka yandi ye lombaka mono fundisa yandi.

¹⁶ Mono vutulaka kwa bau na yo ikele nsiku ya baLoma kupesa muntu ve ntete na yandi ya fundwa mona meso ya bamfundi ya yandi, na yandi lenda kuditubila mambu ya yandi fundwaka.

¹⁷ Sambu na yai, bu bau imene kutakana, mono vingilaka ve, kansi na kilumbu ya landa, mono vandaka va kiti ya mfundusu ye sikidikisaka kutwala muntu yina.

¹⁸ Bu bamfundi ya yandi telemaka, bau fundaka yandi na mambu ya mbi ve bonso mono banzaka. Bis. 23:29; 26:31

¹⁹ Kansi bau tubaka mambu yankaka sambu na sambilu ya Nzambi ya bau, ye sambu na Yesu kufwaka, kansi Paulu tubaka yandi ikele na moyo.

²⁰ Bu mono zabaka ve bonso mono fwiti kuyuvula mambu yai, mono yuvulaka yandi, kana yandi zola kwenda ku Yelusalemi ye fundiswa kuna sambu na mambu yai.

²¹ Kansi bu Paulu lombaka kukebwa sambu na mfundusu ya ntinu ya nene, buna mono sikidikisaka yandi takebwa ti mono lenda kufidisa yandi kwa Kaisali. Bis. 27:1

²² Angalipa tubaka kwa Festo: Mono kibeni mpe zola kuwa muntu yai. Yandi tubaka: Mbazi nge takuwa yandi.

Bau basisa Paulu

²³ Buna na kilumbu ya landa Angalipa ye Benike kwizaka na nkembo mingi, bau kotaka mu nzo ya kuwa mambu, sikamosi na bakommandant ye bantu ya nene ya mbanza; buna bau twalaka Paulu bonso Festo tubaka.

²⁴ Festo tubaka: Ntinu Angalipa ye babakala yonso ya ikele na beto, beno mona muntu yai ya bibuka yonso ya baYuda fundaka nantwala na mono mu Yelusalemi ye awa, ye bau bokaka, yo lunga ve yandi vanda na moyo diaka. Bis. 22:22

²⁵ Kansi mono monaka yandi imene kusala kima ve ya lunga lufwa, kansi sambu na yandi kibeni yuvulaka kwenda kwa ntinu ya nene, mono tubaka, mono tafidisa yandi. Bis. 23:9, 29; 26:31

²⁶ Mono ikele na mambu ve kusonika kwa mfumu ya mono sambu na yandi; sambu na yai mono twala yandi nantwala na beno ye kwa nge ntinu Angalipa, bu beno imene kuyuvula mambu ya yandi, mono lenda kuvanda na mambu kusonika,

²⁷ kadi mono banza yo lunga ve kufidisa muntu ya boloko ye songa ve mambu ya bau fundaka yandi.